Ezekiel 37 - MUKANDA USANDU WA ZAMBI 1975

¹ Kwoko lia Yehova yilipwa hali yami; yanguchiza ku tachi ja Spiritu ya Yehova, yangusa hakachi ka chana cha tò ni yifwaha.

² Yangupalikisa hakachi kayo, kwapwile yinji chikolo mu chana, yeswe ya chau.

³ Yamba kuli yami ngwenyi, Mwana mutu, yifwaha yino muyihasa kutwama ni mwono? Yingukumbulula ngwami, Mwene Yehova, yena muchinyingika.

⁴ Cheka nawa yamba kuli yami ngwenyi, Profeteza ku yifwaha yino uyambe ngwe, Enu yifwaha yumu, ivwenu liji lia Yehova.

⁵ Mwene Yehova kanambe ku yifwaha yino ngwenyi, Mungutuma mwiku muli yenu, mba munupwa ni mwono.

⁶ Mba mungusa mijipa hali yenu, mungusaho musunya nawa, ni kunufuka ni kowa, ni kunusa mwiku, munukapwa ni mwono, mba munukanyingika yami nguli Yehova.

⁷ Chocho naprofetezele ngwe angutumine, mba shimbu munguchiprofeteza kwapwile Chizungozungo, kumanyi ndwa ndwa, mba ye yifwaha yiyilipalakenya, chifwaha ni chifwaha zwa.

⁸ Shimbu munguchitala, mijipa yayo yiyi, ni musunya hiwezaho, ni chikowa hichayifuka, alioze mwiku kuushimo.

⁹ Aye yamba kuli yami ngwenyi, Profeteza ku mwiku; profeteza, mwana mutu, wambe ku mwiku ngwe, Mwene Yehova kanambe ngwenyi, Tweya ku fuji jiwana, ena mwiku, ufuze hali wano haashiha, akatwame ni mwono.

¹⁰ Chocho yinguprofeteza ngwe hangutuma, mba mwiku yiwizamo, yapwa ni mwono, yamana ha molu jo, chihuji chinene chikolo.

¹¹ Mba iye yamba kuli yami ngwenyi, Mwana mutu, yifwaha yino we munyachi weswe wa Izalele. O kakwamba ngwo, Yifwaha yetu hiyoma; kutalatala chetu hichatoka; hanatutetaho ngwi.

¹² Kashika profeteza wambe kuli ayo ngwe, Mwene Yehova kanambe ngwenyi, Kumungukapakula mafuka jenu; mungukanuhindwisa ku mafuka jenu, enu atu jami. Kumungukanuneha ku mahienu mu chifuchi cha Izalele.

¹³ Enu atu jami, munukanyingika yami nguli Yehova muze hinapakula mafuka jenu ni kunuhindwisa ku mafuka jenu.

¹⁴ Mba mungukasa Spiritu yami muli yenu nukatwame ni mwono. Mungukanusa mu chifuchi cha yenwene. Henaho munukanyingika yami Yehova nachambile, mba hinachilinga. Chocho kanambe Yehova.

¹⁵ Liji lia Yehova yiliza kuli yami ngwenyi,

¹⁶ Mwana mutu, anda mutondo usonekeho: Hali Yunda ni A-Izalele aze halifutula nenyi. Mba anda mutondo ukwo usonekeho: Hali José (mutondo wa Eframe) ni akwa munyachi wa Izalele aze halifutula nenyi,

¹⁷ ukayinunge mutondo umuwika, yikalumuke umuwika mu kwoko lie.

¹⁸ Mba muze atu je makuhula ngwo, Kuchi kutulweza ulumbunwiso wayo?

¹⁹ hi amba kuli ayo ngwe, Mwene Yehova kanambe ngwenyi, Ngunambe kwanda mutondo wa José (uli mu kwoko lia Eframe) ni minyachi ya Izalele yize halifutula nenyi, mba mungununga hamuwika nawo mutondo wa Yunda ngukayilinge mutondo umuwika, yikapwe umuwika mu kwoko liami.

²⁰ Mitondo yize hiwasonekaho, muze muyipwa mu kwoho lie kumeso jo,

²¹ hi amba kuli ayo ngwe, Mwene Yehova kanambe ngwenyi, Munguchiza A-Izalele ku mavungu kuze hanayi; mungwakonga sali ni sali ngukaanehe mu chifuchi cha ayo ene.

²² Mba mungukaapwisa vungu limuwika mu chifuchi ha milundu ya Izalele; mwanangana umuwika makaayula eswe; kechi kapwa nawa mavungu aali, ni kulihandununa mu mawanangana aali.

²³ Kechi kalichisa nawa ni mahamba jo ni yuma yo ya kuvwisa kupiha, hanji Utanguko wo weswawo, alioze mungukaalamwina ku kukokoloka cho kuze havulumuna. Mungukaapemesa, mba kumakapwa atu jami, ni yami mungukapwa Zambi yo.

²⁴ Kavumbi kami David kumapwa mwanangana wo, no eswe kumakapwa ni kafunga umuwika. Kumakakaula shimbi jami; kumakatala kanawa kufunga yiyulo yami.

²⁵ Kumakatwama mu chifuchi kuze tulamba twenu atwamine, chize nahanyine kuli kavumbi kami Yakomba. O, ni ana jo, ni ana ja ana jo kumakatwamamo ndo ku miaka yeswe, ni kavumbi kami David kumakapwa mwe mulemu ndo ku miaka yeswe.

²⁶ Mungukakolesa no usendo wa sambukila. Muukapwa usendo wa mutolo, mba mungukaawahisa, nikwaokesa; mungukasa zuwo liami lisandu hakachi ko ndo ku miaka yeswe.

²⁷ Zuwo liami lisandu mulikatwama hamwe no, mba mungukapwa Zambi yo, no makapwa atu jami.

²⁸ Henaho mavungu makanyingika yami Yehova nakusela Izalele ku usandu muze mungusa tembele yami hakachi ko ndo ku miaka yeswe.