Ezekiel 36 - MUKANDA USANDU WA ZAMBI 1975

¹ Ni yena mwana mutu, profeteza ku milundu ya Izalele ngwe, Milundu ya Izalele, ivwenu liji lia Yehova.

² Mwene Yehova kanambe ngwenyi, Mumu mukwa kole yanwamba ngwenyi, Oló! Chikwo nawa yamba ngwenyi, Milundu ya shakulu hiyapwa upite wetu;

³ kashika profeteza wambe ngwe, Mwene Yehova kanambe ngwenyi, Ha chikuma chino chene, mumu anupwishile a kwenyeka nikunupalakenya sali ni sali, chocho hinwalumuka upite wa akwa mavungu akwo, hinwalumuka pande ni saki ja atu,

⁴ kashika enu milundu ya Izalele, ivwenu liji lia Mwene Yehova: Mwene Yehova kanambe ku milundu, ni ku mindundena, ni ku mishitu, ni ku yikulo, ni ku puya ja kwenyeka, ni ku yihunda yize atu jayo hayichina, yize hiyalumuka ya kupupa, ya kulenya ku mavungu akwo a kujingilika,

⁵ kashika Mwene Yehova kanambe ngwenyi, Ngunahanjika ni ukwa wami usasu kulimika ni mavungu akwo, ni kulimika ni A-Endome eswe, waze ahanyine chifuchi chami kuli ayo ene achipite ni uwahililo wunji ni kaleleso mweswe akachipite ni kuchipupa.

⁶ Kashika profeteza ha kutwala ku chifuchi cha Izalele wambe ku milundu, ni ku mindundena, ni ku mishitu, ni ku yikulo ngwe, Mwene Yehova kanambe ngwenyi, Ngunahanjika mu ufwatulo wami wa ukwa mumu mavungu hanuchoka;

⁷ kashika Mwene Yehova kanambe ngwenyi, Ngunalishingi ngwami, Mavungu a kunujingilika no nawa makaachoka.

⁸ Alioze yenu milundu ya Izalele, munukasokesa mitango yenu nikwima mihuko yenu kuli atu jami A-Izalele; mumu nikawashi mahiluka ku mahio.

⁹ Mumu nyingikenu yami nguli sali lia yenu; mungukatewulukila kuli yenu, mba makanuchipa ni kunulima.

¹⁰ Mba mungukaokesa atu hali yenu, munyachi wa Izalele, we weswe; yihunda muyikapwa ni atu, ni yihela ya hululu makayitungulula.

¹¹ Mba mungukaokesa hali yenu ni atu ni tushitu, no makaoka ni kusema, mba makatwama muli yenu ngwe ku miaka ya shakulu. Makanulinga chipema kuhiana chipema chize cheswe cha kunyima. Henaho munukanyingika yami nguli Yehova.

¹² Ewa, mungukatayiza atu kwenda hali yenu atu jami A-Izalele; mba o makanuzuka, ni yenu munukapwa chihinga cho, mba kunuchi kaashihisa ana jo.

¹³ Mwene Yehova kanambe ngwenyi, Mumu atu kakwamba kuli yenu ngwo, Nwakulia atu; nwakushihisa ana ja vungu lienu,

¹⁴ kashika kunuchi kalia nawa atu; kunuchi kashihisa ana ja vungu lienu. Chocho kanambe Mwene Yehova.

¹⁵ Chichi katayiza nawa nukevwe kuchoka cha mavungu; kunuchi katambula nawa sau lia mavungu; ni yenu kunuchi katalingisa nawa vungu lienu. Chocho kanambe Mwene Yehova.

¹⁶ Liji lia Yehova yiliza kuli yami ngwenyi,

¹⁷ Mwana mutu, muze akwa munyachi wa Izalele atwamine mu chifuchi cho ene achichishile ni ndako jo ni yitanga yo. Yitanga yo yapwile kumeso jami ngwe luchisa wa pwo yoze uli ku mazuwo.

¹⁸ Chocho nazukwile ufwatulo wami hali ayo ha mukunda wa manyinga aze hamwanga mu chifuchi, ni ha mahamba aze achichishile no.

¹⁹ Naamwangine hakachi ka mavungu, amwanganyine mu yifuchi. Naapatwile nikulita ni ndako jo ni yitanga yo.

²⁰ Alioze ha kuheta ku mavungu, kweswako ayile ajilwile jina liami lisandu, se atu ambile ha kutwala kuli ayo ngwo, Wano e atu a Yehova, haakatwisa ku chifuchi chenyi.

²¹ Alioze yami nanyongene jina liami lisandu lize akwa munyachi wa Izalele hajilwisa hakachi ka mavungu kuze ayile.

²² Kashika amba kuli akwa munyachi wa Izalele ngwe, Mwene Yehova kanambe ngwenyi, Enu akwa munyachi wa Izalele, chambile kulinga yuma yino haliapwila mumu hali yenu, alioze ha mukunda wa jina liami lisandu yenu hinwalijilula hakachi ka mavungu kuze nwayile.

²³ Mungukasolola usandu wa jina liami linene lize hanalijilula hakachi ka mavungu, ni yenu nawa hinwalijilula hakachi ko. Mba mavungu makanyingika yami nguli Yehova muze mungusolola usandu wami kumeso jo muli yenu. Chocho kanambe Mwene Yehova.

²⁴ Mumu mungukanuchiza ku mavungu, mungukanukonga ku yifuchi yeswe ngukanunehe ku chifuchi cha yenwene.

²⁵ Mungukanusapwila meya apema mba munukapema ku luchisa wenu mweswe. Mungukanupemesa ku mahamba jenu eswe.

²⁶ Mungukanwaha mbunge yaha; mungukasa Spiritu yaha muli yenu. Mungukachiza mu mijimba yenu mbunge jize ja mawe; mungukanwaha mbunge ja musunya.

²⁷ Mba mungukasa Spiritu yami muli yenu; mungukanwendesa nikulita ni yiyulo yami, munukatala kanawa kufunga shimbi jami.

²⁸ Munukatwama mu chifuchi chize nahanyine kuli tulamba twenu; mba kumunukapwa atu jami, ni yami mungukapwa Zambi yenu.

²⁹ Mungukanupulula ku luchisa wenu mweswe; mungukasanyika mbuto nikuyokesa. Chichi katuma nawa kapunga.

³⁰ Mungukalumbamisa mihuko ya mitondo ni mbuto ya mu minda; kunuchi kapinda nawa ni sau lia kapunga hakachi ka mavungu.

³¹ Henaho munukewuluka ndako jenu jipi ni yitanga yenu yize kuyapemene; mba munukalivwila lwaji ha mukunda wa uhenge wenu ni yitanga yenu ya lwaji.

³² Mwene Yehova kanambe ngwenyi, Nyingikenu kanawa, chalingile yino yuma ha mukunda wa yenu. Ivwenu sonyi nukalitupieke mumu ha ndako jenu, enu akwa munyachi wa Izalele.

³³ Mwene Yehova kanambe ngwenyi, Ha tangwa lize mungukanupemesa ku uhenge wenu weswe, mungukapwisa yihunda yenu ni atu anji, mba yihela ya hululu makayitungulula.

³⁴ Ni chifuchi chize chapwile cha kwenyeka muchikapwa cha kulima, kuchichi kapwa nawa cha kwenyeka kumeso ja akwa kupalika.

³⁵ Mba kumakamba ngwo, Chifuchi chino chapwile cha kwenyeka haliapwila hichalumuka ngwe munda wa Endene, ni yihunda yize ya kwenyeka, ya hululu, ya kupuzula, haliapwila yapwa ni atu, yapwa ya kukolesa.

³⁶ Henaho mavungu aze asala ha kunujingilika makanyingika yami Yehova hinatungulula yihela ya kupuzula, hinatumba nawa kuze kwapwile kwa kwenyeka. Yami Yehova hinachamba, mba mungukachilinga.

³⁷ Mwene Yehova kanambe ngwenyi, Chino nawa mungutayiza akwa munyachi wa Izalele akete kuli yami, ngukaokese malunga jo ngwe mbunga ya mapanga.

³⁸ Ngwe mbunga ya mapanga ha yitapo, ngwe mbunga ya mapanga ku Yerusaleme ha mwaka wa yiwanyino yenyi ya kufunjika, chocho yihunda yize ya hululu muyikazala ni mbunga ja malunga. Henaho makanyingika yami nguli Yehova.