Ezekiel 35 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, talikisa meso je ku mulundu wa Sere uprofeteze kulimika nawo,

³ wambe ngwe, Mwene Yehova kanambe ngwenyi, Kunalimika ni yena mulundu wa Sere, kashika mungukazoza kwoko liami kulimika ni yena, mba mungukakupwisa wa kwenyeka, wa hululu.

⁴ Mungukapwisa yihunda ye ya hululu, mukalumuka wa kwenyeka, mba mukanyingika yami nguli Yehova.

⁵ Mumu wafungile kole ya mutolo; wahanyine A-Izalele ku tachi ja katana ha mwaka wa lamba lio, ha mwaka wa kastigu yo yasula,

⁶ kashika Mwene Yehova kanambe ngwenyi, Ni mwono wami mungukululika ha manyinga, mba manyinga makakukaula. Se wahila manyinga kashika manyinga makakukaula.

⁷ Mungukapwisa mulundu wa Sere wa kwenyeka, wa hululu, mba mungukatetako waze akwiza ni waze akuya.

⁸ Mungukazalisa milundu ye ni atu a kushiha. Ha milundu ye, ni mu yikulo ye, ni mu mishitu ye yeswe makalimbukila waze makaashiha ni katana.

⁹ Mungukakupwisa wa kwenyeka wa mutolo; yihunda ye kuyichi kapwa ni atu. Henaho mukanyingika yami nguli Yehova.

¹⁰ Mumu wambile ngwe, Mavungu wano aali ni yifuchi yino yiali, yeswe muyikapwa niyami mba mutuyizuka—chipwe Yehova kokwene kwali—

¹¹ kashika Mwene Yehova kanambe ngwenyi, Ni mwono wami, mungukalinga ni yenu nikulita ni utenu ni ukwa uze nwasolwele mumu ha kole yenu kuli ayo. Mungukalisolola hakachi kenu ha kunupatwila.

¹² Mba munukanyingika ngwenu, Yehova wevwile matuka aze eswe twatukile no milundu ya Izalele ngwetu, Hayipwisa ya kwenyeka, hatwahayo tukayiwumbule.

¹³ Enu nwalifujile kulimika ni yami ni makanwa jenu. Nwokesele maliji jenu kulimika ni yami, mba ami nachivwile.

¹⁴ Mwene Yehova kanambe ngwenyi, Mungukanupwisa a kwenyeka hanga akwa hashi eswe akawahilile.

¹⁵ Chizechene ngwe yenu nwawahililile ha chihinga cha munyachi wa Izalele mumu chalumukine cha kwenyeka, chochene nawa mungukalinga ni yenu. Kumuopwa wa kwenyeka, yena mulundu wa Sere, ni mweswe mu Endome, kwe kweswe. Henaho makanyingika yami nguli Yehova.