Ezekiel 33 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, hanjika ni atu je wambe kuli ayo ngwe, Nyi munguneha katana ku chifuchi, ni akwa chifuchi masakula umwe lunga hakachi ko akamupwise kalayi ko;

³ nyi iye mamona katana kaneza ha chifuchi mahumuna chitavwi nikutoweza atu;

⁴ nyi umwe mevwa liji lia chitavwi alioze kachisele mbunge, nyi katana meza ni kumwanda, manyinga jenyi mapwa ha mutwe wenyi mwene.

⁵ Wevwile liji lia chitavwi alioze kachisele mbunge, kashika manyinga jenyi mapwa hali mwene. Alioze nyi hatá kumutoweza, kachi halilamwina mwono.

⁶ Alioze nyi kalayi mamona katana kaneza hindu kahumwine chitavwi, atu kevwile liji lia kutoweza, mba katana meza, manda mweswawo hakachi ko; au lunga hamwanda mu uhenge wenyi, alioze manyinga jenyi mungufwetesa hali mwe kalayi.

⁷ Chocho ni yena mwana mutu. Hinakupwisa kalayi ha munyachi wa Izalele. Ha kwivwa liji lia mu kanwa liami muatoweza kuli yami.

⁸ Nyi mungwamba kuli chingulungulu ngwami, Ena chingulungulu, pundu kumuofwa, mba yena kwahanjikile kutoweza chingulungulu akakatuke ku ndako jenyi, chingulungulu kumafwa mu uhenge wenyi, alioze manyinga jenyi mungwafwetesa hali yena.

⁹ Alioze nyi yena mutoweza chingulungulu kukatuka ku ndako jenyi, aye kakatukileko, kumafwa mu uhenge wenyi, alioze yena hiwalamwina mwono we.

¹⁰ Ni yena mwana mutu, amba kuli akwa munyachi wa Izalele ngwe, Enu hinwamba ngwenu, Utanguko wetu ni milonga yetu hiyatushata, mba tunawangama nayo; kuchi mutuhasa kutwama ni mwono?

¹¹ Amba kuli ayo ngwe, Mwene Yehova kanambe ngwenyi, Ni mwono wami, chevwile kuwaha ni kufwa cha chingulungulu. Ngunazange chingulungulu ahichike ndako jenyi atwame ni mwono. Alumukenu! Alumukenu! Katukenu ku ndako jenu jipi. Kuchi te nunazange kufwa, enu akwa munyachi wa Izalele?

¹² Ni yena mwana mutu, amba kuli atu je ngwe, Ululi wa mukwa ululi kuuchi kamupulula muze mavulumuna. Ha kutwala ku ungulungulu wa chingulungulu, kechi kalimbuka nawo nyi makatuka ku ungulungulu wenyi. Chipwe mukwa ululi kechi hahasa kutwama ni mwono mumu ha ululi wenyi ha tangwa lize mavulumuna.

¹³ Chipwe mungwamba kuli mukwa ululi ngwami, Mutwama ni mwono, hindu nyi mafuliela ululi wenyi akalinge uhenge, kechi kwiwuluka chitanga chenyi cha ululi nichimwe, alioze uhenge uze halinga mafwilamo.

¹⁴ Alioze nyi mungwamba kuli chingulungulu ngwami, Pundu kumuofwa, hindu nyi malumuka ni kuhichika shili yenyi ni kulinga chize chinalite ni shimbi, chize Chinalulama,

¹⁵ nyi chingulungulu mahilwisa chifungo, ni kuhilwisa chize hatambula ni wiji, ni kwenda mu yiyulo ya mwono, ni kulinga uhenge ka; kumakatwama ni mwono, kechi kufwa.

¹⁶ Kechi kamwiwulukila niumwe mulonga uze hanavulumuna. Halinga chize chinalite ni shimbi, chize Chinalulama; kumakatwama ni mwono.

¹⁷ Hindu atu je kakwamba ngwo, Ndako ya Mwene hi ya ululi ko, alioze kumanyi ndako yize kuyalulamine, ninyo.

¹⁸ Muze mukwa ululi mahichika ululi wenyi nikulinga uhenge maufwila.

¹⁹ Mba muze chingulungulu mahichika ungulungulu wenyi akalinge chize chinalite ni shimbi, chize Chinalulama, makatwama ni mwono wacho.

²⁰ Hindu nunambe ngwenu, Ndako ya Mwene hi ya ululi ko. Enu akwa munyachi wa Izalele, mungupatwila mutu mweswe nikulita ni ndako jenyi.

²¹ Ha mwaka kumi ni wamuchiali wa unjize wetu, ni kakweji wamuchikumi, ni tangwa liamuchitano lia kakweji, umwe lunga te hanakatuka ni mwono ku Yerusaleme, heza kuli yami ngwenyi, Che chihunda hachipupa.

²² Achi kwoko lia Yehova te linakangupwila ha chingoloshi shimbu te mwe mukwa kuchina kanda achiheta. Alioze hanangupakwila kanwa liami muze mwe mutu manguheta ha chimene. Chocho kanwa liami linapakuka; chapwile nawa kamama.

²³ Liji lia Yehova yiliza kuli yami ngwenyi,

²⁴ Mwana mutu, wano atwama mu yihela yino ya kwenyeka mu chifuchi cha Izalele kakwambamba ngwo, Apalahama wapwile mutu umuwika, hindu wazukile chifuchi; mba yetu tuli anji; hatwaha chifuchi tukachizuke.

²⁵ Kashika amba kuli ayo ngwe, Mwene Yehova kanambe ngwenyi, Nwakulia yifwo ni manyinga, ni kuhetula meso jenu ku mahamba jenu, ni kumwanga manyinga; mba munukazuka chifuchi chocho?

²⁶ Nwakukwata katana; nwakulinga yuma ya lwaji, mba mweswe hakachi kenu kukulumbula pwo lia mukwo. Munukazuka chifuchi chocho?

²⁷ Amba chino kuli ayo ngwe, Mwene Yehova kanambe ngwenyi, Ni mwono wami, pundu, waze anatwama mu yihela ya kwenyeka makafwa ni katana, mba yoze uli mu yambu mungukamuhana kuli tushitu akamulie; ni waze ali mu yihunda ya kukolesa ni mu yivwenge makafwa ni chilungo.

²⁸ Mungukapwisa chifuchi cha kwenyeka, cha hululu, mba ndundo jenyi ja kulengumuka mujikasula. Milundu ya Izalele muyipwa ya kwenyeka, chocho niumwe mapalikamo.

²⁹ Henaho makanyingika yami nguli Yehova muze hinapwisa chifuchi cha kwenyeka, cha hululu, mumu ha yuma yo yeswe ya lwaji o halinga.

³⁰ Ha kutwala kuli yena, mwana mutu, atu je waze akukutela pande hamuwika ku yipanga ni ku yikolo ya mazuwo, kakwamba umwe kuli mukwo ni mukwo ngwo, Tweya wivwe liji lia kukatuka kuli Yehova.

³¹ Kakwizaza kuli yena ngwe atu kakwiza; kakutwama kumeso je ngwe atu jami. Kakwivwa chize muwamba, alioze kechi kuchilinga; mumu kakusolola zango linji ku mivumbo yo, alioze mbunge jo hanajise ku kufumbula.

³² Ni yena kuwapwa kuli ayo ngwe umwe mukwa kwimba miaso ya zango ni liji lipema, nikwimba kanawa ha chisaji, mumu kwivwa kakwivwa chize muwamba, alioze kulinga kechi kuchilinga.

³³ Muze chino muchiaheta, mumu kuheta muchiheta, henaho makanyingika ngwo, Pundu twapwile ni profeta hakachi ketu.