Ezekiel 32 - MUKANDA USANDU WA ZAMBI 1975

¹ Ha mwaka kumi ni wamuchiali, ni kakweji kumi ni wamuchiali, ha tangwa litangu lia kakweji, liji lia Yehova yiliza kuli yami ngwenyi,

² Mwana mutu, imba mwaso wa lungungu hali Falau mwanangana wa Engitu wambe kuli iye ngwe, Ena wakulimona ngwe uli ndumba hakachi ka mavungu, alioze uli ngwe ndragau wa mu kalungalwiji. Wakufwapukila mu njiji je, ni kuvundula meya ni molu je, ni kupihisa njiji jo.

³ Mwene Yehova kanambe ngwenyi, Mungukakukongela wanda wami hamwe ni chihuji cha mavungu anji, mba mungukakusosa ni wanda wami.

⁴ Mungukakumbila hashi, mwe mu yambu mungukakunyasa, mba mungukakoka tujila a mu tetela akapwile hali yena; mungukakuchisa tushitu a hashi heswe ni yifwo ye.

⁵ Mungukamwanga musunya we ha milundu, mungukazalisa yana ni mujimba we.

⁶ Mungukawulisa chifuchi ni manyinga je a kupukuka ndo ku milundu, ni njiji jeswe mujikazala ni yena.

⁷ Ha kukujimisa mungukafuka malilu, mungukalayisa matongonoshi jamo. Mungukafuka tangwa ni lelwa, chipwe kakweji kechi katemuka.

⁸ Mapangu eswe a kutemuka kanawa mwilu mungukaalayisa mumu hali yena, mungukasa milima ha chifuchi che. Chocho kanambe Mwene Yehova.

⁹ Mungukapinjisa mbunge ja mavungu anji muze mungukakutwala ku ufunge hakachi ka mavungu, ku yifuchi yize te kanda unyingikako.

¹⁰ Mungukavwisa mwongo mavungu anji mumu hali yena, ni mianangana jo makevwa lwaji hali yena muze mungukatelumuna katana kami kumeso jo. Makachikima shimbu ha shimbu; mutu mweswe makachikimina mwono wenyi ha tangwa lia kununguka che.

¹¹ Mumu Mwene Yehova kanambe ngwenyi, Katana ka mwanangana wa Babilonia makuhulumukina.

¹² Mungukashihisa chihuji che ni tutana twa akwa ndundo, eswe kole ni mwongo hakachi ka mavungu. Kumakasulisa kulengumuka cha Engitu, ni chihuji chako cheswe muchikanonga.

¹³ Mungwonwona tushitu twamo eswe ku njiji jinji. Chiliato cha mutu kuchichi kajivundula nawa, chipwe sende ja tushitu kujichi kajivundula.

¹⁴ Mungukapwisa meya jajo apema, mungukendesa njiji jako ngwe maji. Chocho kanambe Mwene Yehova.

¹⁵ Muze mungukapwisa chifuchi cha Engitu cha kwenyeka, muze hinachizako yuma yize yeswe yakuchizalisa, muze mungukalamba waze eswe atwamamo, henaho makanyingika yami nguli Yehova.

¹⁶ We mwaso wa lungungu muwimba wenawo. Mapwo a mavungu mawimba. Hali Engitu ni chihuji chako cheswe mawimba. Chocho kanambe Mwene Yehova.

¹⁷ Ha mwaka kumi ni wamuchiali, ha tangwa kumi ni liamuchitano lia kakweji, liji lia Yehova yiliza kuli yami ngwenyi,

¹⁸ Mwana mutu, lila mbimbi ha mbunga ya A-Engitu, ukaatume, ni iye ni ana a mapwo a ku mavungu a uhenya, muma mushi lia munomuze, kuli waze akuya ku jondo, ngwe,

¹⁹ Wahiana iya ni upeme? Palumuka ukapombe ni yilima.

²⁰ Makalimbukila hakachi ka waze anaashihi ni katana, mba mbunga jenyi jeswe mujikapomba hamuwika nenyi.

²¹ Tusongo a ndundo maata pande, ni yikwashi jo muchima lia Shiole ngwo, Haneza, kanapombo kúlú, wano yilima a kushiha ni katana.

²² Asuria kokwali ni atu jenyi eswe, mafuka jo kanamujingilika, eswe hanafu, a kushiha ni katana,

²³ waze mafuka jo hanaase kwe ku songo lia jondo, ni atu jenyi kanajingilika fuka lienyi. Eswe hanafu, a kushiha ni katana, waze te akolesele mwongo mu chifuchi cha akwa mwono.

²⁴ Elame kokwali ni mbunga yenyi ya kujingilika fuka lienyi; eswe a kufwa, a kushiha ni katana, waze apalumukine ni ulima wo muma mushi lia muno-muze, waze te akolesele mwongo mu chifuchi cha akwa mwono, mba haliapwila sonyi anevu hamwe ni waze akuya ku jondo.

²⁵ Hamwalila muhela hakachi ka waze ashihile, hamwe ni mbunga yenyi yeswe, ni mafuka jo a kumujingilika, eswe yilima a kushiha ni katana. Mumu mwongo wo walitanjile mu chifuchi cha akwa mwono, mba haliapwila sonyi anevu hamwe ni waze akuya ku jondo. Kakwasa hakachi ka waze haashiha.

²⁶ Mesheke ni Tupale kokwali ni mbunga yo yeswe, ni mafuka jo a kwajingilika, eswe yilima a kushiha ni katana; mumu akolesele mwongo mu chifuchi cha akwa mwono.

²⁷ Kapombele ni yilima a ndundo aze afwile, aze ayile ku Shiole ni yitwa yo ya jita, aze te tutana two haasa mushi lia mitwe yo, ni kepwe jo ha yifwaha yo. Mumu mwongo wa akwa ndundo wapwile mu chifuchi cha akwa mwono.

²⁸ Chocho mukamakuka ukapombe hakachi ka yilima hamwe ni waze aashihile ni katana.

²⁹ Endome kokwali, ni mianangana jenyi ni alemu jenyi eswe. Chipwe apwile ni ndundo, hindu hanaapombesa ni waze haashiha ni katana. Kanapombo ni yilima, hamwe ni waze akuya ku jondo.

³⁰ Akwa kuyula a ku Norte kokwali e eswe, ni A-Sendone eswe, waze halimbuka ni sonyi hamwe ni waze aashihile, mumu ha mwongo weswe akolesele akwo ni ndundo jo. Kanapombo ni ulima wo hamwe ni waze haashiha ni katana. Kanevu sonyi hamwe ni waze akuya ku jondo.

³¹ Muze Falau maamona malilembejeka mumu ha mbunga yenyi; Falau ni tujita twenyi eswe, a kushiha ni katana. Chocho kanambe Mwene Yehova.

³² Mumu wakolesele mwongo mu chifuchi cha akwa mwono, kashika makamupombesa hakachi ka yilima hamwe ni waze aashihile ni katana, mwe Falau ni mbunga yenyi yeswe. Chocho kanambe Mwene Yehova.