Ezekiel 31 - MUKANDA USANDU WA ZAMBI 1975

¹ Ha mwaka kumi ni kashi, ni kakweji wamuchitatu, ni tangwa litangu lia kakweji, liji lia Yehova yiliza kuli yami ngwenyi,

² Mwana mutu, amba kuli Falau mwanangana wa Engitu, ni ku chihuji chenyi ngwe, Mu unene we walifwa neya?

³ Mungukutesa ngwe musedru mu Lebano ni mitango ya tachi ni chihuhumuke cha usaki, ni chizundamo chinene, songo liawo hakachi ka malelwa.

⁴ Meya autekwile, jondo yautatwishile nikupalikisa njiji kuma kuze autumbile, ni kutalikisa njiji jako ku mitondo yeswe ya mu yambu.

⁵ Chocho watunjile helu lia mitondo yeswe ya usaki. Mitango yawo yatohele ni ana jawo asuku mumu ha meya a kulumbama mu mitango yawo.

⁶ Tujila eswe a mu tetela atungile yaswa yo mu mitango yawo. Mushi lia ana jawo tushitu eswe a mu yambu asemene ana jo. Mu chihuhumuke chawo mavungu eswe anene atwamine.

⁷ Wapemene chikolo ni unene wawo ni kusuha cha ana jawo mumu miji yawo yayile ku meya a kulumbama.

⁸ Misedru ya munda wa Zambi kuyahashile kulitesa nawo, chipwe mitondo ya kupresu kuyahashile kulitesa ni mitango yawo. Mitondo ya kastanyeru kuyapwile nichimwe ha kulieseka ni mitango yawo. Niumwe mutondo wa mu munda wa Zambi walifwile nawo ha upeme.

⁹ Naupemesene ni kulumbama cha mitango yawo, kashika mitondo yeswe ya mu Endene yauvwilile ukwa, yize yapwile mu munda wa Zambi.

¹⁰ Kashika Mwene Yehova kanambe ngwenyi, Se watunjile kwilu nikusa songo liawo mu malelwa, ni kulengumuka mu mbunge mumu ha Chizundamo chawo,

¹¹ kashika mungukaukunjika mu kwoko lia mwe mukwa ndundo hakachi ka mavungu. Iye makaulinga nikulita ni ungulungulu wawo. Yami hinaumbila.

¹² Tundaka, e ahiana kukolesa mwongo hakachi ka mavungu, makaupakula ni kuuhichika. Ha milundu ni ha yikulo yeswe ana jawo makaholoka; mitango yawo muyikapomba ya kumakwona mu mingulunga yeswe ya chifuchi, mba atu eswe a hashi makakatuka mu chihuhumuke chawo nikuuhichika.

¹³ Tujila eswe a mu tetela makatwama ha yipuzupuzu yawo, ni tushitu eswe a mu yambu makamana ha mitango yawo.

¹⁴ Chino cheswe muchikapwa kukanjisa mitondo ya ku meya kanda yitunda naye, chipwe kusa masongo jayo hakachi ka malelwa, mitondo yize ya kutambula meya kanda yihetako ha kutolomoka. Mumu yeswe hanayikunjika ku kufwa muma mushi lia muno-muze hakachi ka atu a kufwa hamwe ni waze akuya ku jondo.

¹⁵ Mwene Yehova kanambe ngwenyi, Muze muukapalumuka ku Shiole mungukalinga akaulilile mbimbi; mungukakwika njiji jawo, mba meya anji makamana. Ha mukunda wawo mungukafuka Lebano ni milima, ni mitondo yeswe ya mu yambu muyikalezumuka ha mukunda wawo.

¹⁶ Ha kukulunguza cha kulimbuka chawo mungukanyikisa mavungu eswe, muze mungukaunyasa ku Shiole ni atu aze eswe akuya ku jondo. Mba mitondo yeswe ya mu Endene, yeswe ya kutongola, ni yipema ya mu Lebano, yize yeswe yakutambula meya, makayilembejeka muma mushi lia muno-muze.

¹⁷ Neyo muyikaya ku Shiole nawa hamuwika nawo, kuli waze a kushiha ni katana, waze te apwile ngwe kwoko liawo, atwamine mu chihuhumuke chawo hakachi ka mavungu.

¹⁸ Chocho walifwa neya mu uhenya ni ulemu hakachi ka mitondo ya Endene? Kumakakuhulumuna muma mushi lia muno-muze hamwe ni mitondo ya Endene. Kumukapomba hakachi ka yilima, hamwe ni waze haashiha ni katana. Mwene Yehova kanambe ngwenyi, Chocho apwa Falau ni chihuji chenyi cheswe.