Ezekiel 30 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, profeteza wambe ngwe, Mwene Yehova kanambe ngwenyi, Lilenu mbimbi ngwenu, Mama yami, lie tangwa!

³ Mumu lie tangwa hiliakundama; lie tangwa lia Yehova hiliakundama. Kumulikapwa tangwa lia malelwa; mwaka wa akwa mavungu.

⁴ Katana makahulumukina hali A-Engitu, mu Etiopia kumukukapwa kupinda, muze waze makaashiha mu Engitu halimbuka; muze hambata upite wenyi, hapuzula fundamentu jenyi.

⁵ Etiopia, ni Pute, ni Lutu, ni Arabia mweswe, ni Kube, ni akwa chifuchi chize chalikata, makalimbuka hamuwika ni katana.

⁶ Yehova kanambe ngwenyi, Waze akujikijisa Engitu makalimbuka, mba ndundo jenyi ja kulengumuka mujikahwa. Chize ku Mingondole ndo ku Sevene muli iye makalimbuka ni katana. Chocho kanambe Mwene Yehova.

⁷ Makapwa wa kwenyeka hakachi ka yifuchi ya kwenyeka, ni yihunda yenyi muyikapwa hakachi ka yihunda ya hululu.

⁸ Henaho makanyingika yami nguli Yehova, muze hinachocheka kahia ku Engitu, ni yikwashi jenyi eswe hanamakuka.

⁹ Ha tangwa lize mikeji makakatuka kuli yami mu mato akavwise woma e A-Etiopia, akwa kulengelela. Kashika kupinda muchikaakwata ha tangwa lia kufwa Engitu; mumu nyingikenu, kulineza!

¹⁰ Mwene Yehova kanambe ngwenyi, Ni kwoko lia Nabukanezore mwanangana wa Babilonia mungukasulisa upite wa Engitu.

¹¹ Iye ni atu jenyi hamuwika (e ahiana kukolesa mwongo hakachi ka mavungu) maaneha akonwone chifuchi. Makatomona tutana two kulimika ni Engitu, mba makazalisa chifuchi ni waze haashiha.

¹² Mungukomisa njiji; mungukalanjisa chifuchi mu moko ja atu api. Mungukakoka kwenyeka ha chifuchi ni ha yize yeswe yilimo, ku moko ja tundaka. Yami Yehova hinachamba.

¹³ Mwene Yehova kanambe ngwenyi, Mungukonwona mahamba, mungukasulisa tuponya mu Nofe. Kumuchi kapwa nawa mulemu mu chifuchi cha Engitu; chocho mungukakolesa woma chifuchi cha Engitu.

¹⁴ Mungukapwisa Patarose ya kwenyeka; mungukasa kahia mu Zoane; mungukalinga yilinga yami ya upatwilo mu No.

¹⁵ Mungukazukula ufwatulo wami ha Shini, ye mbonge ya Engitu; mungukateta chihuji cha No.

¹⁶ Mungukachocheka kahia ku Engitu; Shini mapwa ni yikola yinji. Makalokola No, yipanga yako ya mawe makayipuzula.

¹⁷ Akweze a ku Avene ni Pibesete makafwa ni katana, ni mapwo maya ku ufunge.

¹⁸ Ku Tehafene tangwa mulikalá ha kushihako chiyulo cha Engitu, ni ndundo jenyi ja kulengumuka mujikasula. Makafukiwa ni lelwa, ni anenyi a mapwo kumakaya ku ufunge.

¹⁹ Chocho mungukalinga yilinga ya upatwilo ha Engitu. Henaho makanyingika yami nguli Yehova.

²⁰ Ha mwaka kumi ni kashi, ha kakweji mutangu, ni tangwa liamuchishimbiali lia kakweji, liji lia Yehova yiliza kuli yami ngwenyi,

²¹ Mwana mutu, hinamakuna kwoko lia Falau mwanangana wa Engitu; kumanyi kalikashile akaliwuke, ha kulijichika ni muya, likatakame kukwata katana.

²² Kashika Mwene Yehova kanambe ngwenyi, Kunalimika ni Falau mwanangana wa Engitu. Mungukamakuna moko jenyi, ni lize lia tachi ni likwo lize alimakwine, mba mungukaholola katana ku kwoko lienyi.

²³ Mungukamwanga A-Engitu hakachi ka mavungu; mungukaahumina hakachi ka yifuchi.

²⁴ Mungukaweza tachi ku moko ja mwanangana wa Babilonia; mungukasa katana kami mu moko jenyi. Alioze mungukamakuna moko ja Falau, mba makatwa mikuma kumeso jami ngwe lunga yoze unafu ni mbandu.

²⁵ Mungukaweza tachi ku moko ja mwanangana wa Babilonia, alioze moko ja Falau makazeya, mba makanyingika yami nguli Yehova. Muze mungukasa katana kami mu kwoko lia mwanangana wa Babilonia, iye kumakamuzoza kulimika ni chifuchi cha Engitu;

²⁶ mba mungukamwanga A-Engitu hakachi ka mavungu ni kwahumina hakachi ka yifuchi. Henaho makanyingika yami nguli Yehova.