Ezekiel 3 - MUKANDA USANDU WA ZAMBI 1975

¹ Aye yamba kuli yami ngwenyi, Mwana mutu, liako chize anakwehe; liako mukanda wa chivungo ukaye ukahanjike ni munyachi wa Izalele.

² Chocho yingupakula kanwa liami, yangwaha mukanda nguulie.

³ Aye yamba kuli yami ngwenyi, Mwana mutu, liako mukanda uno ngunakwehe ukakute nawo. Yinguulia, yiupwa mu kanwa liami uyema ngwe wuchi.

⁴ Yamba kuli yami ngwenyi, Mwana mutu, yako ukaye ku munyachi wa Izalele ukambe kuli ayo maliji jami.

⁵ Mumu chakutumine ku vungu limwe lia limi lia tundaka, hanji kuhanjika chikalu, alioze ngunakutumu ku munyachi wa Izalele.

⁶ Chakutumine kuli akwa mavungu anji a malimi a tundaka, ni kuhanjika chikalu, maliji jo kechi kukulumbunuka. Nyi kachi nakutumine kuli ayo makwivwa.

⁷ Alioze akwa munyachi wa Izalele kechi kukwivwa, mumu kazangile kungwivwa yami. Mumu akwa munyachi wa Izalele eswe kali ni mahuma akalu, ni mbunge ja pami.

⁸ Nyingika kanawa, hinapwisa meso je akalu kulimika ni meso jo; hinakalisa huma lie kulimika ni mahuma jo.

⁹ Hinakalisa huma lie kuhiana diamante, ngwe liwe lia kahia. Kanda wavwila woma; kanda utatajala ha kutala cho, mumu kapwa munyachi wa yihulia.

¹⁰ Yamba nawa kuli yami ngwenyi, Mwana mutu, maliji jami eswe waze munguhanjika kuli yena, tambula mu mbunge ye, panjika ni matwi je.

¹¹ Yako, ukaye kuli njize, kuli atu je, ukambe kuli ayo ngwe, Mwene Yehova kanambe, chipwe mevwa, chipwe kasolo kwivwa.

¹² Henaho mwe Spiritu yanguzundula, mba yingwivwa kunyima yami liji linene lia kutakumuka lia kwamba ngwo, Uhenya wa Yehova kuma kwenyi ukafumane!

¹³ Yingwivwa chinumo cha mapulwa ja akwa mwono ha kulikwata limwe ni likwo, ni chinumo cha maroda ku malumbu jo, chapwile ngwe kutakumuka chinene.

¹⁴ Spiritu yanguzundula, yangumbata; yinguya ni kusasa ni kusasaminya cha spiritu yami mumu kwoko lia Yehova te lili hali yami ni tachi.

¹⁵ Yingwiza kuli njize ku Telabibe, waze atwamine ku lwiji Chebare, kuze te atunga. Yingutwamako hakachi ko nikulishimwoka matangwa shimbiali.

¹⁶ Muze matangwa shimbiali hahwa liji lia Yehova yiliza kuli yami ngwenyi,

¹⁷ Mwana mutu, hinakupwisa kalayi kuli akwa munyachi wa Izalele. Muze muwivwa liji limwe ku kanwa liami, mukangutowezelo.

¹⁸ Nyi mungwamba kuli chingulungulu ngwami, Kumuofwa, ni yena kwamutowezele, chipwe kuhanjika kukanjisa chingulungulu mu jila yenyi ya ungulungulu akalamwine mwono wenyi, chingulungulu kumafwa mu uhenge wenyi; alioze ku kwoko lie munguhula manyinga jenyi.

¹⁹ Alioze nyi mutoweza chingulungulu, aye kakatukile ku ungulungulu wenyi ni ku jila yenyi ya ungulungulu, kumafwa mu uhenge wenyi; alioze yena hiwalamwina mwono we.

²⁰ Chikwo nawa, nyi mukwa ululi makatuka ku ululi wenyi akalinge uhenge, mba yami ngukamusele chitalingiso, mafwa. Iye mafwila mutonga wenyi, ni yitanga yenyi ya ululi yize alingile kechi kayiwuluka; alioze manyinga jenyi ku kwoko lia yena mungwahula mumu kwamutowezele.

²¹ Alioze nyi yena mukanjisa mukwa ululi kanda avulumuna, mba iye kavulumwine, kumakatwama ni mwono mumu hevwa kukanjisa che; ni yena hiwalamwina mwono we.

²² Kuze kwene nawa kwoko lia Yehova liapwile hali yami; yamba kuli yami ngwenyi, Katuka ukaye ku chana, kwenako munguhanjika ni yena.

²³ Chocho yingukatuka yinguya ku chana, kumanyi uhenya wa Yehova unamanako ngwe uhenya uze namwene ku lwiji Chebare. Yingufulamana hashi.

²⁴ Alioze Spiritu yangunjila, yangumanyisa ha molu jami, yamba kuli yami ngwenyi, Yako ukaliajile mu zuwo lie.

²⁵ Ni yena mwana mutu, makusa mihipu, makukasa nayo, kuchi kuhasa kutuhuka hakachi ka atu;

²⁶ mungukwachisa limi lie mu kanwa lie ukapwe kamama kuchi kuhasa kwakanjisa; mumu o kapwa munyachi wa yihulia.

²⁷ Alioze muze munguhanjika ni yena mungupakula kanwa lie, ukambe kuli ayo ngwe, Mwene Yehova kanambe ngwenyi. Mweswe mevwa, akevwe; mweswe mapangula, apangule, mumu o kapwa munyachi wa yihulia.