Ezekiel 29 - MUKANDA USANDU WA ZAMBI 1975

¹ Ha mwaka wamuchikumi, ni kakweji wamuchikumi, ni tangwa kumi ni liamuchiali lia kakweji, liji lia Yehova yiliza kuli yami ngwenyi,

² Mwana mutu, talikisa meso je kulimika ni Falau mwanangana wa Engitu, ukaprofeteze kulimika nenyi ni kulimika ni A-Engitu eswe,

³ Hanjika ukambe ngwe, Mwene Yehova kanambe ngwenyi, Kunalimika ni yena, Falau mwanangana wa Engitu, mwe ndragau yoze wapomba hakachi ka njiji jenyi, yoze kakwamba ngwenyi, Lwiji wami lume, namutangile hali yami mwene.

⁴ Mungukanjisa tuzambu mu mbangachi je, mungukakoka yishi a mu njiji je akalamate ku yihahi ye. Mungukakusosa hakachi ka njiji je hamwe ni yishi a mu njiji je aze analamata ku yihahi ye.

⁵ Mungukakumbila mu puya, ni yena ni yishi eswe a mu njiji je; kumunukalimbukila mu yambu, kechi kunukunga hanji kunufunda. Hinanuhana kuli tushitu a hashi ni tujila a mu tetela nukapwe kulia kuli ayo.

⁶ Henaho akwa Engitu eswe makanyingika yami nguli Yehova. Mumu hiwapwa mulumbu wa lumbungu kuli akwa munyachi wa Izalele;

⁷ muze akukwachile ku kwoko, wamakukine nikwalemeka ku yipaya. Muze ashindakenyene hali yena, wamakukine ni kumanyisa molu jo.

⁸ Kashika Mwene Yehova kanambe ngwenyi, Mungukakukokela katana; mungukateta kuli yena ni mutu ni kashitu.

⁹ Chifuchi cha Engitu muchikapwa cha kwenyeka, cha hululu. Henaho makanyingika yami nguli Yehova. Mumu ha kwamba ngwe, Mwe lwiji niwami, yami namutangile,

¹⁰ kashika kunalimika ni yena; kunalimika ni njiji je. Mungukapwisa chifuchi cha Engitu cha hululu, cha kwenyeka, chize ku Mingondole ndo ku Sevene ni ku njiza ya Etiopia.

¹¹ Chipwe chiliato cha mutu kuchichi kapalikako, chipwe cha kashitu. Ha makumi awana a miaka atu kechi katwamamo.

¹² Mungukapwisa chifuchi cha Engitu cha kwenyeka hakachi ka yifuchi ya kwenyeka; ni yihunda yenyi muyikapwa ya kwenyeka makumi awana a miaka hakachi ka yihunda ya hululu. Mungukamwanga A-Engitu hakachi ka mavungu; mungukaahumina hakachi ka yifuchi.

¹³ Mumu Mwene Yehova kanambe ngwenyi, Ku songo lia makumi awana a miaka mungukakonga A-Engitu ku mavungu kuze naamwanginyine.

¹⁴ Mungukahilwisa kuwaha cha A-Engitu; mungukaahilwisa ku chifuchi cha Patarose, chifuchi cha chikota cho, mba kuze kwene kumakapwa wanangana ukepe.

¹⁵ Wanangana wo kumuukapwa we ukepe Wahiana hakachi ka mawanangana. Kuuchi kalizundula nawa hakachi ka mavungu. Mungukapwisa wanangana wo ukepe, mba kechi kahasa kuyula mavungu nawa.

¹⁶ Kuuchi kapwa nawa ujikijilo wa munyachi wa Izalele nikwiwuluka uhenge wo muze atalile kuli ayo akaakwase. Henaho makanyingika yami nguli Mwene Yehova.

¹⁷ Ha mwaka makumi aali ni wamuchishimbiali, ha kakweji mutangu, ni tangwa litangu lia kakweji, liji lia Yehova yiliza kuli yami ngwenyi,

¹⁸ Mwana mutu, Nabukanezore mwanangana wa Babilonia wahondanganyishine tujita twenyi kulimika ni Teru. Mutwe mweswe walumukine wa lwole, ni chipaya cheswe chapwesukile; hindu chipwe iye chipwe tujita twenyi katambwile nichimwe ku Teru cha kufweta milimo yize alingile kulimika nayo.

¹⁹ Kashika Mwene Yehova kanambe ngwenyi, Mungukahana chifuchi cha Engitu kuli Nabukanezore mwanangana wa Babilonia, mba iye makambata upite wako, ni kwiya, ni kupupa. Muchikapwa fweto ya tujita twenyi.

²⁰ Hinamwaha chifuchi cha Engitu chikapwe fweto yize alingilile; mumu yami alingilile. Chocho kanambe Mwene Yehova.

²¹ Ha tangwa lize mungukasokesa mbinga hakachi ka akwa munyachi wa Izalele mba mungukapakula mivumbo ye hakachi ko. Henaho makanyingika yami nguli Yehova.