Ezekiel 28 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, amba kuli mukwa kuyula Teru ngwe, Mwene Yehova kanambe ngwenyi, Mumu mbunge ye yinulengumuka hiwamba ngwe, Nguli umwe Zambi, ngunatwama ha chitwamo cha mazambi hakachi ka kalunga-lwiji; hindu uli mutu tuhu, hi uli zambi ko— chipwe unalimono ngwe mana je a umwe zambi.

³ Ewa, mana je ahiana aze a Daniel, nichimwe chijimbikilo chinakuswamina chakuhi;

⁴ ku mana je ni yinyingi ye hiwazuka upite, hiwakunga oru ni prata mu mazuwo je a kuswekela upite.

⁵ Ku mana je anji a kusepa hiwokesa upite we, mba mbunge ye yinalengumuka ni upite we—

⁶ kashika Mwene Yehova kanambe ngwenyi, Mumu wakulinyonga ngwe mana je apwa a umwe zambi,

⁷ kashika mungukoka hali yena yilambala, e akwa kuhiana kukolesa mwongo a ku mavungu. Makatomona tutana two kulimika ni upeme wa mana je; makachisa uhenya we.

⁸ Kumakakukona mu jondo, kumukafwa ngwe atu aze akwashiha muchima lia kalunga-lwiji.

⁹ Mukalikoleza kwamba ngwe, Nguli zambi, kumeso ja waze makakushiha, chipwe uli mutu tuhu, hi uli zambi ko, mu moko ja waze anakulemeka, nyi?

¹⁰ Kumukafwa ngwe yilima ku moko ja tundaka, mumu yami hinachamba. Chocho kanambe Mwene Yehova.

¹¹ Chikwo nawa liji lia Yehova yiliza kuli yami ngwenyi,

¹² Mwana mutu, imba lungungu hali mwanangana wa Teru ukambe kuli iye ngwe, Mwene Yehova kanambe ngwenyi, Yena mukwa kusa chijikilo ha upeme weswe, wa tò ni mana ni upeme kuushi kachipa.

¹³ Wapwile mu Endene, munda wa Zambi; mawe eswe a ndando yilemu apwile chifuko che, sartiu, ni topajiu, ni diamante, ni turkeza, ni sardonica, ni jasepe, ni safwira, ni carbunkulu, ni esmeralda, ni oru. Utotombo wa tumikupiela twe ni ndembo je wapwile muli yena; ha tangwa lize akutangile ayilulikile.

¹⁴ Yena wapwile mwe kerupimi mukwa kufuka. Nakusele ukapwe ha mulundu usandu wa Zambi; wendele hakachi ka mawe a kahia.

¹⁵ Wapwile te kushi kapalia mu majila je chize ku tangwa lize akutangile ndo awanyine uhenge muli yena.

¹⁶ Ha kwoka cha kwendangana che wazalile ni upupilo, mba wavulumwine. Chocho nakumbilile ku mulundu wa Zambi ngwe chuma cha kujilula. Hinakwonwona hakachi ka mawe a kahia, yena mwe kerupimi wa kufuka.

¹⁷ Mbunge ye yalifujile mumu ha upeme we; wapihishile mana je mumu ha uhenya we. Nakunyashine hashi; nakufukwile kumeso ja mianangana akakuhulikile meso jo.

¹⁸ Ha kwoka cha uhenge we, ni kupiha cha kwendangana che wajilwile matembele je. Kashika nachijile kahia muchima lie, mba kakulalishile. Nakupwishile uto hashi kumeso ja waze eswe akumwene.

¹⁹ Hakachi ka mavungu waze eswe anakunyingika ka nalishimwoka ha mukunda wa yena, mumu hiwaheta ku songo limwe lia mwongo, kuchi kasoloka nawa nilimwe tangwa.

²⁰ Liji lia Yehova yiliza kuli yami ngwenyi,

²¹ Mwana mutu, talikisa meso je kuli Sendone ukaprofeteze kulimika nenyi ngwe,

²² Mwene Yehova kanambe ngwenyi, Ena Sendone, kunalimika ni yena, kumungukasolola uhenya wami hakachi ke. Kumakanyingika yami nguli Yehova muze mungukalingamo upatwilo wami ni kusololamo usandu wami.

²³ Mumu mungukatumamo chilungo, ni manyinga mu matapalo jamo. Waze makafwa makalimbuka muchima liamo ni katana yoze walimika nenyi sali ni sali. Henaho makanyingika yami nguli Yehova.

²⁴ Ha kutwala kuli akwa munyachi wa Izalele kukuchi kapwa nawa mukalale kwahowa, hanji lumbimbo kwalemeka hakachi ka waze eswe anaajingilika, waze te hanaalelesa. Henaho makanyingika yami nguli Mwene Yehova.

²⁵ Mwene Yehova kanambe ngwenyi, Muze mungukakonga munyachi wa Izalele hakachi ka mavungu kuze anamwanganyina, ni kusolola usandu wami muli ayo kumeso ja mavungu, mba makatwama mu chifuchi cho ene chize nahanyine kuli kavumbi kami Yakomba.

²⁶ Kumakatwamamo ni chipi chakuhi, ni kutunga mazuwo, ni kutumba minda ya uva. Kumakatwama ni chipi chakuhi, muze hinalinga upatwilo wami hali waze eswe anaajingilika waze te hanaalelesa. Henaho makanyingika yami nguli Yehova, Zambi yo.