Ezekiel 27 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Yena mwana mutu, imba mwaso wa lungungu hali Teru,

³ ukambe kuli Teru yoze watwama ku unjililo wa kalunga-lwiji, mukwa kusepa ni mavungu a ku mbaka ja yifuchi yinji, ngwe, Mwene Yehova kanambe ngwenyi, Ena Teru, hiwamba ngwe, Upeme wami we wa pundu lume.

⁴ Manjiza je ha muchima lia kalunga-lwiji ali; akwa kukutunga apwishile upeme we wa pundu.

⁵ Yalinga matabua je eswe a mitondo ya kupresu ya ku Senire; yachiza musedru wa ku Lebano akakulingile mutondo wa kumika.

⁶ Ku mitondo ya carvalho ya ku Mbashane asongele yilapo ye. Akufukile ni mitondo ya pinyu ya ku mbaka ya Kitime ya kuwahisa ni milimo ya mazo a njamba.

⁷ Hina lia kwendesa liapwile lia linyu lipema lia ku Engitu lia mbordado; liapwile nawa lia mbandeira. Hina lie lia chifuko liapwile lilauluka ni lia ufungo lia ku mbaka ja Elisha.

⁸ Akwa yilapo apwile a ku Sendone ni Arvada. Akwa mana ja yena Teru apwilemo ngwe akwa kusongwela.

⁹ Makulwana a Gepale ni akwa mana jako apwile muli yena nikujikajika miaji je. Mato eswe a ha kalunga-lwiji ni akwa kwaendesa apwile muli yena nikweseka kulanda upite we.

¹⁰ Akwa Persia ni Lutu ni Pute apwile mu yihuji ya tujita twe. Azezelekele ngalau ni kepwe muli yena nikukunehena uhenya.

¹¹ Malunga ja Arvada ni tujita twe apwile ha yipanga ye ya mawe ya kukujingilika, ni malunga ja Ngamada apwile mu tuposhi twe. O azezelekele kepwe jo ha yipanga ye ya kujingilika, apwishile upeme we wa pundu.

¹² Akwa Tashi asepele ni yena mumu ha upite we unene wa milali yeka ni yeka. Yuma ye ya kutalika ayilanjile ni prata, ni utale, ni estanyu, ni shumbu.

¹³ Akwa Yavwane, ni akwa Tupale, ni akwa Mesheke asepele ni yena. Yuma ye ya kutalika ayilanjile ni atu, ni yikwachilo ya unengu.

¹⁴ Yuma ye ya kutalika akwa Mbete-Tokama ayilanjile ni tuvwalu, ni tuvwalu a jita, ni mula.

¹⁵ Malunga a ku Rode asepele ni yena; akwa yifuchi ya ku mbaka jinji apwile e akwa kulanda ni yena a pundu. Akufwetele ni mazo a njamba ni ebone.

¹⁶ Endome asepele ni yena mumu ha upite we wunji weka ni weka. Yuma ye ya kutalika o ayilanjile ni esmeralda, ni mahina a ufungo, ni mahina a mbordado, ni linyu lipema, ni korale, ni agata.

¹⁷ Akwa Yunda ni chifuchi cha Izalele asepele ni yena. Yuma ye ya kutalika o ayilanjile ni tiliku, ni olevwe, ni makuyu atangu, ni wuchi, ni maji, ni yitumbo.

¹⁸ Ndamaseku wasepele ni yena mumu ha yikumba ye yinji, ni upite we wunji weka ni weka; vinyu ya Helebone, ni wona wa mapanga utoma,

¹⁹ vinyu ya ku Uzale asumbakenyene ni yuma yenu ya kutalika. Utale wa kupeyima, ni kasha, ni kalamu yapwile hakachi ka yuma ye ya kutalika.

²⁰ Akwa Ndetane asepele ni yena mahina a kusa mushi lia selina ha kwenda ha kavwalu.

²¹ A-Arabia ni alemu eswe a Keta wazangile chikolo kusepa no ni ana-mapanga, ni kuji a mapanga ni pembe; asepele ni yena yino yuma.

²² Akwa kusepa a ku Shipa ni Raema asepele ni yena. Yuma ye ya kutalika ayilanjile ni milali yeswe ya tumbuto twa lupembo mupema, ni mawe a ndando yilemu, ni oru.

²³ Akwa Harane, ni Kane, ni Endene, ni Ashure, ni Chilimade asepele ni yena.

²⁴ Wano asepele ni yena ni mazalo apema, ni yikuto yilauluka ni ya mbordado, ni yisalo ya ulombo weka ni weka ya kukasa ni mihipu ni kujichika. Yino yuma asepele ni yena.

²⁵ Mato a ku Tashi akwendelele nikumbata yuma ye ya kutalika. Chocho wazalile ni yiteli yilemu hakachi ka kalunga-lwiji.

²⁶ Akwa yilapo ye hakutuhwisa he ha kalunga-lwiji munene. Fuji ya ku Chivumbuko hiyakupuzwila muchima lia kalunga-lwiji.

²⁷ Ha tangwa lia kunonga che tujita twe eswe waze ali muli yena, hamwe ni mbunga yize yeswe yili hakachi ke, kanashimbama mushi lia kalunga-lwiji, ni upite we, ni yuma ye ya kutalika, ni ndando je, ni akwa kwendesa wato, ni akwa kusongwela wato, ni akwa ku jika jika miaji, ni akwa kusepa.

²⁸ Ha lundunjila wa muteto wa akwa kusongwela wato chifuchi chinanyiki.

²⁹ Mba akwa yilapo eswe kanakatuka ku mato jo. Akwa mato ni akwa kusongwela eswe a ku kalunga-lwiji kanamana ha ngenge

³⁰ nikulila mbimbi mumu hali yena ni muteto usasu. Kanakuwu fufuta ha mitwe yo ni kulilangumuna mu uto.

³¹ Kanalitewula mumu hali yena ni kuzala chikeleyi; kanakulilila mbimbi ni kusasaminya mu mbunge, ni kulishimwoka chisasu.

³² Ha kulila mbimbi kakukwimbila lungungu ni kukulilila ngwo, Iya walifwa ni Teru yoze hanamuholesa hakachi ka kalunga-lwiji?

³³ Wapwile nikuyukisa mavungu anji ha kuneha yuma ya kutalika ya ku kalunga-lwiji. Wapichishile mianangana a hashi ni upite we wa kulumbama ni ndando je.

³⁴ Haliapwila hanakupuzwila mu kalunga-lwiji mushi lia meya. Ni ndando je ni akwa kukwendesa eswe hanashimbama hamwe ni yena.

³⁵ Akwa mbaka eswe kanalishimwoka hali yena, ni mianangana jo kanevu mwongo wunji, kanametameta ku meso.

³⁶ Akwa kusepa hakachi ka mavungu kanasozana; hiunahete ku songo limwe lia mwongo, kuchi kasoloka nawa nilimwe tangwa.