Ezekiel 25 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, talikisa meso je kuli A-Amone ukaprofeteze kulimika no.

³ Amba kuli A-Amone ngwe, Ivwenu liji lia Mwene Yehova. Mwene Yehova kanambe ngwenyi, Se nwambile ngwenu, Oló! muze ajilwile zuwo liami lisandu, ni ha chifuchi cha Izalele muze achenyekene, ni hali akwa munyachi wa Yunda muze ayile ku unjize,

⁴ kashika ni yami mungukanuhana kuli akwa Chivumbuko akanupite. Kumakajika yilombo yo hakachi kenu, ni kutunga mazuwo jo ku mahienu. Kumakalia mihuko yenu; kumakanwa yamwa yenu.

⁵ Mungukapwisa Raba ngwe ulilo wa tumelu, ni yihunda ya A-Amone ngwe matanga a yimuna. Henaho munukanyingika yami nguli Yehova.

⁶ Mumu Mwene Yehova kanambe ngwenyi, Se nwasakwilile ni koshi, ni kulinyehuna, ni kulikwiza ni shili yize yeswe yapwile muli yenu ha chifuchi cha Izalele,

⁷ kashika hinazoza kwoko liami kulimika ni yenu, mba mungukanuhana nukapwe upite wa kupunda ku mavungu. Mungukanuteta hakachi ka mavungu, mungukanujimuna hakachi ka yifuchi. Mungukanunongesa. Henaho munukanyingika yami nguli Yehova.

⁸ Mwene Yehova kanambe ngwenyi, Mumu A-Moape ni A-Sere kakwamba ngwo, Munyachi wa Yunda chimuwika unapu ni mavungu akwo,

⁹ kashika mungukapula lumbu lia Moape ku yihunda yenyi; ku yihunda yenyi ndo ku njiza, we uhenya wa chifuchi—Mbete-Jeshimote, ni Mbale-meone, ni Kiriataime.

¹⁰ Mba mungukachihana hamuwika ni A-Amone kuli akwa Chivumbuko akachipite hanga kechi kachiwuluka nawa hakachi ka mavungu,

¹¹ mba mungukalinga upatwilo wami hali A-Moape. Mba makanyingika yami nguli Yehova.

¹² Mwene Yehova kanambe ngwenyi, Mumu Endome wakalile milonga hali akwa munyachi wa A-Yunda ni kuvulumuna chikolo ha kukala milonga hali ayo,

¹³ kashika Mwene Yehova kanambe ngwenyi, Mungu kazoza kwoko liami kulimika ni Endome nikutetaho ni mutu ni kashitu, ni kwenyekako. Chize ku Temane ndo ku Ndetane makafwa ni katana.

¹⁴ Mba mungukakala milonga hali Endome ni kwoko lia atu jami A-Izalele, mba o malinga mu Endome nikulita ni utenu wami, nikulita ni ufwatulo wami. Kumakanyingika chize nakukala milonga. Chocho kanambe Mwene Yehova.

¹⁵ Mwene Yehova kanambe ngwenyi, Mumu A-Filistea akalile milonga ni shili mu mbunge jo akonwone ni yimwe kole kuyishi kuhwa,

¹⁶ kashika Mwene Yehova kanambe ngwenyi, Munguzoza kwoko liami kulimika ni A-Filistea; mungutetaho A-Cherete ni kwonwona mbaka yeswe yikwo.

¹⁷ Mungukahala milonga hali ayo chikolo ni kastigu ya ufwatulo. Henaho makanyingika yami nguli Yehova muze mungukala milonga hali ayo.