Ezekiel 24 - MUKANDA USANDU WA ZAMBI 1975

¹ Ha mwaka wamuchilivwa, ni kakweji wamuchikumi, ha tangwa liamuchikumi lia kakweji, liji lia Yehova yiliza kuli yami ngwenyi,

² Mwana mutu, Soneka jina lia tangwa lino, tangwa lino liene. Ha tangwa lino mwanangana wa Babilonia haputuka kuseleka Yerusaleme.

³ Tako chishima kuli wano akwa munyachi wa yihulia ngwe, Mwene Yehova kanambe ngwenyi, Alikenu ndeho, alikenu; Senumo meya.

⁴ Senumo yihanda ya yifwo, yihanda yeswe yipema, shina lia kulu ni chilama; nuyizalise ni yifwaha yipema.

⁵ Andenu mwe chimuna mupema wa chendo. Senu mushi je kunyi; telekenu ye yihanda, telekenu nawa yifwaha yenyi!

⁶ Kashika Mwene Yehova kanambe ngwenvi, Lamba ku chihunda cha manyinga, Chikwete ndeho ya ngengeya; ngengeya yayo kuyakatukile! Chizamo chihanda ha chihanda, kanda nutongola.

⁷ Mumu manyinga aze amwangine achili hakachi ko. Yaasa ha luliwe lwamokomoko; kasele ha mavu akaafuke ni fufuta.

⁸ Hinasa ha luliwe manyinga aze hamwanga hanga kechi kaafuka, akavundule ufwatulo wami ngukaafwetese.

⁹ Kashika Mwene Yehova kanambe ngwenyi, Lamba ku chihunda cha manyinga! Mungukalumbika mulumba unene.

¹⁰ Lumbikenu kunyi, soselenu kahia, telekenu kanawa yifwo, tehunenu ye sopa, akoche yifwaha.

¹¹ Hi alikenuyo yamokomoko ha makala yikapwe ni kahia kanji unengu wayo ukaweme, hanga luchisa wayo akasangunukemo, ni ngengeya yayo yikahwe.

¹² Kalikatalisa mokomoko ngengeya yayo ya ndama kuyakatukilemo ni kahia.

¹³ Ngengeya yamo ayo usolo wenu wa luchisa. Ami nazangile kunupemesa, ni yenu kunwapemene ku luchisa wenu, kashika yenu kunuchi kapema nawa ndo mungukahwisa ufwatulo wami hali yenu.

¹⁴ Yami Yehova ngunachambe, kumuchikapwa, kumungukachilinga. Chichi kahiluka kunyima; chichi kanuvwila keke; chichi kalikonyeka. Mwene Yehova kanambe ngwenyi, Mungukanupatwila nikulita ni ndako jenu ni yitanga yenu.

¹⁵ Liji lia Yehova yiliza kuli yami nawa ngwenyi,

¹⁶ Mwana mutu, nyingika kanawa ngunambe kukutambula susumuku chize meso je anawahilila nacho; alioze kanda ulishimwoka chipwe kulila, chipwe kutayiza masoji je kusotwoka.

¹⁷ Twako mikuma, alioze liji ka. Kanda ulila mbimbi hali mufu. Kashila hina lia ku mutwe, zala haku je; kanda ufuka mivumbo, chipwe kulia mbolo ya akwa kulila.

¹⁸ Chocho nahanjikile kuli atu ha chimene; ha ngoloshi pwo liami yafwa. Mba ha kucha nalingile chize angwambile.

¹⁹ Atu yanguhula ngwo, Kuchi kutulumbunwina chize yino yuma muyilumbunuka kuli yetu, yino unalingi kumeso jetu?

²⁰ Yingwamba kuli ayo ngwami, Liji lia Yehova yiliza kuli yami ngwenyi,

²¹ Amba kuli akwa munyachi wa Izalele ngwe, Mwene Yehova kanambe ngwenyi, Mungukajilula zuwo liami lisandu, we uhenya wa tachi jenu ni chize meso jenu anawahilila nacho, ni chize nwakuzanga ni mbunge jenu jeswe. Anenu a malunga ni a mapwo waze nwahichikile kunyima kumafwa ni katana.

²² Ni yenu munulinga chizechene ngwe yami hinalinga. Kunuchi kafuka mivumbo yenu, chipwe kulia mbolo ya akwa kulila.

²³ Munulikashila mahina ja ha mitwe yenu, ni kuzala haku jenu, alioze kunuchi kulishimwoka, chipwe kulila, alioze munukaliwangamisa mu uhenge wenu, ni kutwa mikuma umwe kuli mukwo ni mukwo.

²⁴ Chocho Ezekiel mapwa chilayi kuli yenu; yenu munulinga nikulita ni yize yeswe iye halinga. Ha kuheta chuma chino mba munukanyingika yami nguli Mwene Yehova.

²⁵ Ni yena mwana mutu, ha tangwa lize mungukaatambula chihunda cho cha kukolesa, uwahililo wo ni uhenya wo, ni chize meso jo kakuwahilila nacho ni mbunge jo kujakuzanga, hamwe ni ana jo a malunga ni a mapwo.

²⁶ Ha tangwa lize umwe mukwa kuchina makeza kuli yena ni kukutwila lusango wacho.

²⁷ Ha tangwa lize kanwa lie mulikapakuka kuli mwe mukwa kuchina, mukahanjika, kuchi kapwa nawa kamama. Chocho yena mukapwa chilayi kuli ayo mba makanyingika yami nguli Yehova.