Ezekiel 23 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, kwapwile mapwo aali, ana ja naye umuwika.

³ O yalinga ukoi mu Engitu; yalinga ukoi ha wana-mapwo wo; kwenako ashindakenyene mele jo; kwenako akwachilekwachile mele jo ja *uvirgem.

⁴ Jina lia mukulwana Ohola, jina lia kanuke Oholiba. Yami naatambwile mba yasema ana ja malunga ni a mapwo. Ha kutwala ku majina jo, Ohola aye Samaria; Oholiba aye Yerusaleme.

⁵ Ohola yalinga ukoi shimbu achili niwami ni kufwila akwa zango lienyi A-Asuria,

⁶ tujita a kuzala mahina a ufungo, anguvulu ni tupitau, akwa kwenda hali tuvwalu, eswe akweze a kuzanga.

⁷ Yaaha ukoi wenyi, e apema ahiana hakachi ka A-Asuria, e eswe lume. Yalichisa ni mahamba eswe a waze eswe afwilile.

⁸ Kambilile ukoi wenyi uze te halinga chize ku matangwa jenyi mu Engitu. Mumu shimbu achili mwana-pwo malunga hapomba nenyi, ni kukwatakwata mele jenyi ja *uvirgem, ni kuzukula hali iye usolo wo.

⁹ Kashika namukunjikile kuli akwa zango lienyi, mwe mu moko ja A-Asuria waze afwilile.

¹⁰ O amufukwile; yakwata anenyi a malunga ni a mapwo; mwene yamushiha ni katana, mba yalumuka kashilikilo hakachi ka mapwo muze te hanamupatwila.

¹¹ Mwanakwo Oholiba yamona yino yuma yeswe, hindu yalipihisa kuhiana mukwo ha kufwila ukoi wenyi, ukoi umwe wahiana wa yayo.

¹² Aye yafwila A-Asuria, anguvulu ni tupitau, tujita a kuzala Utale ndusu mujimba weswe; akwa kwenda hali tuvwalu, eswe akweze a kuzanga.

¹³ Yingumona ngwami, Hapiha, eswe aali hanayi jila yimuwika.

¹⁴ Alioze iye wahianyishine ukoi wenyi. Wamwene malunga a kweseka ha yishimi, yizulie ya A-Kaletea, a kweseka ni ulombo uchila nge,

¹⁵ ni miya mu mazalilo, ni mahina asuku ha mitwe yo, eswe ngwe tupitau, yizulie ya A-Babilonia waze asemukine mu Kaletea.

¹⁶ Ha kwamona waafwilile, yatuma mikeji kuli ayo mu Kaletea.

¹⁷ A-Babilonia yeza kuli iye ha muhela wa zango; yamuchisa ni usolo wo, mba muze halumbuka no, yatewuluka kuli ayo ni lwaji.

¹⁸ Shimbu aye machilingalinga ukoi kumeso ja eswe nikulilengela ni uselesele wenyi, yami natewulukile kuli iye ni lwaji chizechene ngwe natewulukile kuli yayo.

¹⁹ Hindu yaweza ku ukoi wenyi nikwiwuluka matangwa ja wana-mapwo wenyi muze machilingalinga ukoi mu chifuchi cha Engitu.

²⁰ Yafwila akwa zango lienyi, akwa usolo wa mujimba ngwe kuji a yimbulu ni tuvwalu.

²¹ Chocho wevwile usona wa usolo wa wana-mapwo we muze akwa Engitu akukwachile ku mele nikushindakenya mele ja wana-mapwo we.

²² Kashika yena Oholiba, Mwene Yehova kanambe ngwenyi, Nyingika, munguvundula kulimika ni yena akwa zango lie waze watewulukile kuli ayo ni lwaji, hindu mungukaakungulwila kulimika ni yena sali ni sali;

²³ A-Babilonia ni A-Kaletea eswe, Pekode, ni Shoa, ni Koa, ni A-Asuria eswe hamwe no, eswe akweze a kuzanga, eswe anguvulu ni tupitau, tuliamanga ni tujita, eswe a kwenda hali tuvwalu.

²⁴ Kumakakatuka ku Norte kulimika ni yena ni matemba-a-jita ni matemba ni chihuji cha mavungu. Kumakalilonga akalimike ni yena sali ni sali ni kepwe, ni kepwe jinene, ni ngalau, mba mungukunjika we upatwilo kuli ayo hanga akakupatwile nikulita ni upatwilo wo.

²⁵ Mungutuma ufwatulo wami ukalimike ni yena, o akalinge ni yena ni ufwatulo. Makakuteta mazulu je ni matwi je; mba waze malisalaho mafwa ni katana. Makakwata ana je a malunga ni a mapwo, ni waze malisalaho makanonga ni kahia.

²⁶ Makakuzula mazalo je nikukuchiza yuma ye ya uhenya.

²⁷ Chocho mungumanununa usolo we ni ukoi we uze wachijile mu chifuchi cha Engitu; kashika kuchi kahetula meso je kuli A-Engitu chipwe kwewuluka nilimwe tangwa.

²⁸ Mumu Mwene Yehova kanambe ngwenyi, Mungukakukunjika mu moko ja waze Unaavwila kupiha, mu moko ja waze watewulukile kuli ayo ni lwaji,

²⁹ mba o malinga ni yena ni kole, ni kukuchiza mihuko ya kuhondangana che, ni kukuhichika wa kufukula, wa uselesele, hanga uselesele wa ukoi we ukafukuke. Usolo we ni ukoi we

³⁰ hiwakukokela chuma chino mumu hiwalinga ukoi ni akwa mavungu ni kulichisa ni mahamba jo.

³¹ Hiwakaula mu jila ya yayenu, kashika musenge wenyi mungukausa mu kwoko lie.

³² Mwene Yehova kanambe ngwenyi, Kumwonwa musenge wa yayenu, unene, unatoho. Kumakakuseha ni kukuyunga mumu yuma yinji yilimo.

³³ Kumakakuzengewesa ni chinyengo. Musenge wa yayenu Samaria, umwe musenge wa mwongo ni kwenyeka.

³⁴ Kumukanwinamo ni kuumanununa, ni kunjakula yipalupalu yawo, ni kuhowahowa mele je, mumu yami Mwene Yehova hinachamba.

³⁵ Kashika Mwene Yehova kanambe ngwenyi, Se hiwanguvulama ni kungumbila kunyima ye, kashika panjika ku yuma yino muyikuwana ha mukunda wa usolo we ni ukoi we.

³⁶ Liji lia Yehova yiliza kuli yami ngwenyi, Mwana mutu, mupatwila Ohola ni Oholiba nyi? Nyi chocho ukaalweze yitanga yo ya lwaji.

³⁷ Mumu halinga utanji ni kali ni manyinga ha moko jo. Halinga utanji ni mahamba jo, mba ana jo aze hinasema no haatenga kulia cha mahamba.

³⁸ Chikwo nawa hangulinga, tangwa limuwika hachisa zuwo liami lisandu ni kujilula masambata jami.

³⁹ Mumu ha tangwa lize ashihile ana jo yitapo ya mahamba jo, ejile tangwa lio liene mu zuwo liami lisandu kulijilula. Chocho yalinga mu zuwo liami.

⁴⁰ Yahamuka kusaka malunga kukatuka kusuku. Yaatuma mikeji, yeza. Hali ayo wasanyine kanawa, ni kupintala meso je, ni kuzala yuma ya uhenya.

⁴¹ Yiutwama ha chitwamo cha uhenya ni mesa ya kwala kulutwe liacho, henaho wasele insensu yami ni maji jami.

⁴² Chimbangwinya cha mbunga ya akwa lwelia wapwile nacho. Hamwe ni malunga amokomoko wachijile akwa kuzengewa ku puya. O asele makai ha moko ja mapwo ni yipangula yipema ha mitwe yo.

⁴³ Henaho yingwamba ha kutwala kuli yoze walijilila ni utanji ngwami, Haliapwila malinga nenyi ukoi, neye hamwe no.

⁴⁴ Mumu hanjila kuli iye ngwe malunga kakunjila kuli chikoi. Chocho anjilile kuli Ohola ni Oholiba akalinge usolo.

⁴⁵ Alioze akwa ululi makaapatwila ni upatwilo uze akuhana kuli yitanji, ni kuli mapwo aze akumwanga manyinga, se o yitanji, kali ni manyinga ha moko jo.

⁴⁶ Mumu Mwene Yehova kanambe ngwenyi, Koka chihuji kulimika no Ukaapwise chuma cha mwongo, chuma cha kupupa.

⁴⁷ Mba akwa chihuji makaasa mawe nikwamanununa ni tutana. Makashiha ana jo a malunga ni a mapwo, ni kwocha mazuwo jo.

⁴⁸ Chocho mungukamanununa usolo mu chifuchi hanga mapwo eswe akalilongese kanda alinga usolo ngwe yena hiwalinga.

⁴⁹ Ni usolo we makakufwetesawo, mba mukatambula kastigu ya mahamba je a shili. Mukanyingika yami nguli Mwene Yehova.