Ezekiel 22 - MUKANDA USANDU WA ZAMBI 1975

¹ Chikwo nawa liji lia Yehova yiliza kuli yami ngwenyi,

² Ni yena mwana mutu, musopesa chihunda cha manyinga, muchisopesa? Nyi chocho ukalumbunune yitanga yacho yeswe ya lwaji.

³ Kumuwamba ngwe, Mwene Yehova kanambe ngwenyi, Uli chihunda cha kumwanga manyinga muchima lie hanga ola ye yikahete; wakulinga mahamba a kulichisa no!

⁴ Hiwahila manyinga aze hiwamwanga; hiwalichisa ni mahamba aze hiwalinga; hiwakundamisa tangwa lie; hiwaheta kwe ku mwaka we. Kashika hinakupwisa kiwasauka ku mavungu, kanakulenye kuli akwa yifuchi yeswe.

⁵ Ena mukwa lufuma mupi, wazala ni chimbangwinya, waze ali hakamwihi makakulenya, ni waze ali kusuku nawa.

⁶ Alemu ja A-Izalele muli yena, mweswe hakachi ko hasa mbunge yenyi, nikulita ni tachi jenyi, kumwanga manyinga.

⁷ Muli yena yisemi kakwalelesa; muli yena ngeji kakwafwetesa ni mbenga; ni ana-ashiwa ni tuliwa kakwavulumuna muli yena.

⁸ Hiwalelesa yuma yami yisandu, hiwajilula masambata jami.

⁹ Muli yena kwali malunga akwa kulamikiza hanga akamwange manyinga, ni malunga akwa kulila ha milundu, ni malunga akwa kulinga luchisa.

¹⁰ Muli yena atu kakutukula atato; hakachi kenu malunga kakupikapika mapwo aze achili ku mazuwo.

¹¹ Umwe kukulumbula pwo lia mwenyembo wenyi, mukwo ni usolo mapihisa tembwa-mwanenyi, mukwo malumbula ndumbwenyi yoze wa kusemuka kuli tato.

¹² Hakachi kenu atu matambula chijiko akamwange manyinga. Nwakutambula mbwezo ni upite, ni kufumbula kuli enyembo jenu ni mbenga, ni yami hinwanguvulama. Chocho kanambe Mwene Yehova.

¹³ Kashika ni yami mwene ngunalamba koshi ni moko mumu ha kufumbuka chenu cha uhenge chize hinwalinga, ni ha manyinga aze hanamwangana hakachi kenu.

¹⁴ Hamu lienu mulihasa kulinduluka, hanji moko jenu mahasa kujikiza ha matangwa aze muze mungusopa ni yenu? Yami Yehova hinachamba, mba mungukachilinga.

¹⁵ Mungukanumwangina hakachi ka mavungu; mungukanuhumina ndusu mu yifuchi; mungukamanununa luchisa wenu hakachi kenu.

¹⁶ Kumunukapwa a kulijilula kuli yenwene kumeso ja mavungu, mba munukanyingika yami nguli Yehova.

¹⁷ Liji lia Yehova yiliza kuli yami ngwenyi,

¹⁸ Mwana mutu, munyachi wa Izalele hiunalumuka kuli yami ngwe yinganga. E eswe—prata, ni unengu, ni estanyu, ni utale, ni shumbu mu lutengo—eswe hanalumuka yinganga.

¹⁹ Kashika Mwene Yehova kanambe ngwenyi, Se eswe hinwalumuka yinganga, kashika mungukanukunga muchima lia Yerusaleme.

²⁰ Ngwe malunga kakukunga prata, ni unengu, ni utale, ni shumbu, ni estanyu, mu lutengo, ni kuhehelamo kahia yikasangunuke, chocho ni yami mungunukungulula mu utenu wami ni ufwatulo wami, mba mungununjisa nikunusangununa.

²¹ Mungunukungulula ni kunuheha ni kahia ka ufwatulo wami, chocho munukasangunukamo.

²² Ngwe prata kakusangunuka mu lutengo chocho ni yenu nawa munukasangunukamo mba munukanyingika yami Yehova hinazukula ufwatulo wami hali yenu.

²³ Liji lia Yehova yiliza kuli yami ngwenyi,

²⁴ Mwana mutu, amba kuli iye ngwe, Ena uli chifuchi kachipemesene chipwe kachinokesene vula ha tangwa lia ufwatulo.

²⁵ Alemu jenyi muchima lienyi kapwa ngwe ndumba umwe kanahiohio shimbu machipapulula yifwo. Hanali mwono wa atu; hapunda upite ni yuma yilemu; hapwisa tuliwa anji hakachi ko.

²⁶ Asasendote jenyi hatangula shimbi jami ni kujilula yuma yami yisandu. Kasele chinyingi hakachi ka yuma yisandu ni yuma yeswayo; kalongesele atu kusa chinyingi hakachi ka yuma ya luchisa ni yuma yipema. Halelesa masambata jami, chocho yami napwa kuli ayo wa kujilula.

²⁷ Alemu jenyi muchima lienyi kapwa ngwe tungunga kanapapulula yifwo, nikumwanga manyinga, nikwonwona mwono wa atu akalifumbule ni yuma ya wiji.

²⁸ Ni aprofeta jako hapemesaho ni pemba, ni kumona usolwelo wa kwonga, ni kutahila yuma ya mahuza ngwo, Mwene Yehova unachambe; alioze Yehova kahanjikile.

²⁹ Atu a mu chifuchi hafwetesa atu ni mbenga ni kwiya yuma. Hapinjisa yiswale ni akwa kuhona; hafwetesa njize, ni yoze maakwasa wakuhi.

³⁰ Ami yingufupa umwe hakachi ko, mutu yoze matunga nawa chipanga-cha-mawe, ni kumana mu chituwa kumeso jami kulamwina chifuchi, kanda nguchonwona, alioze chawanyine niumwe.

³¹ Kashika yinguzukula hali ayo ufwatulo wami. Hinaanongesa ni kahia ka ufwatulo wami. Mwene Yehova kanambe ngwenyi, Hinafwetesa ndako jo ha mitwe yo ene.