Ezekiel 21 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu talikisa meso je ku Yerusaleme ukashinjile liji kulimika ni mazuwo asandu, ukaprofeteze kulimika ni chifuchi cha Izalele,

³ ukambe ku chifuchi cha Izalele ngwe, Yehova kanambe ngwenyi, Nyingikenu, kunalimika ni yenu, kashika mungukatomona katana kami mu chindalo chenyi ngukateteho hakachi kenu ni mukwa ululi ni chingulungulu.

⁴ Mumu ha kutetaho kuli yenu ni mukwa ululi ni chingulungulu, kashika katana kami makatuhuka mu chindalo chenyi kulimika ni atu eswe chize ku Sule ndo ku Norte.

⁵ Ni atu eswe makanyingika yami Yehova hinatomona katana kami mu chindalo chenyi, mba chichi kamutomeka nawa.

⁶ Kashika mwana mutu, twako mikuma; twako mikuma ni mbunge ya kumakuka ni chinyengo chisasu kumeso jo.

⁷ Muze makuhula ngwo, Kuchi te unatu mikuma? ena muwamba ngwe, Mumu ha lusango. Muze makeza, mbunge yeswe muyisangunuka ni moko eswe mahonga; Spiritu yeswe muyilezumuka ni makungunwa eswe mapwa a upekepeke ngwe meya. Nyingikenu, kuchineza, mba kumuchikamanunuka. Chocho kanambe Mwene Yehova.

⁸ Liji lia Yehova yiliza kuli yami ngwenyi,

⁹ Mwana mutu, profeteza ukambe ngwe, Yehova kanambe ngwenyi, Amba ngwe, Umwe katana, umwe katana hanamuhele ni kumucheka nawa.

¹⁰ Hanamuhele mumu ha kuhana; hanamucheke mumu ha kulejima. Te tunawaha? Ena mwanami, hiwalelesa mbwechi ni yuma yeswe ya mutondo.

¹¹ Chocho katana hamuhana akamucheke, hanga akamukwate. Hamuhela, hamucheka hanga amuhane mu kwoko lia mukwa kushiha.

¹² Teta ni kulila mbimbi, ena mwana mutu, mumu kapwa wa kulimika ni atu jami, ni kulimika ni alemu eswe a Izalele. Hanaakunjika ku katana hamwe ni atu jami. Kashika Ulambe ha shina lia kulu lie.

¹³ Mumu chapwa kweseka, mba kuchi muchipwa nyi munulelesa ye mbwechi? Chocho kanambe Mwene Yehova.

¹⁴ Kashika, mwana mutu, profeteza. Lamba koshi ku moko jenu, katana akaholoke kaali hanji katatu; katana wa waze maashiha, mwe katana wa kuhana, yoze unaaseleka.

¹⁵ Hanga mbunge jo jikasangunuke ni anji akalimbuke ku yikolo yo yeswe, hinaaha katana wa kulejima, mama! Kapwa ngwe njaji; kapwa wa kucheka ha kuhana.

¹⁶ Kungulukako, linga ku chindume. Lilonge, linga ku chimeso, kweswako unatalikisa.

¹⁷ Ni yami nawa mungulamba koshi ku moko jami, munguhwisa ufwatulo wami. Yami Yehova hinahanjika.

¹⁸ Liji ha Yehova yiliza nawa kuli yami ngwenyi,

¹⁹ Mwana mutu, funjika majila aali a kwiza katana ka mwanangana wa Babilonia, eswe ni aali makatuka ku chifuchi chimuwika. Linga chinyingi cha jila ukachise ku songo ha jila ya kuya ku chihunda.

²⁰ Funjika jila ya kwiza katana ku Raba ya A-Amone, ni ku Yunda, ni ku Yerusaleme, chihunda cha kukolesa.

²¹ Mumu mwanangana wa Babilonia kanamanyina ku makano, kwe ku songo lia majila aali. Kanatahe; kanasakula mivu yenyi; kanahula terafimi; kanatale ku liayi.

²² Ku kwoko lienyi ha chindume kwejile ngombo ya Yerusaleme akase makina ja kupupa; akapakule kanwa ha kuhana; akakalumuke, akase makina ja kupupa ku mapito, akalumbike milumba ya jita, ni kutunga tuposhi a kuseleka.

²³ Ahoze kuli ayo muchikasoloka ngwe kutaha cha mahuza. Halishinga ni mashingo alemu, ahoze aye kakwiwulula uhie wo hanga akaakwate.

²⁴ Kashika Mwene Yehova kanambe ngwenyi, Se hinwewulula uhie wenu ha kufukula Utanguko wenu, chocho ha yitanga yenu yeswe milonga yenu hiyasoloka—se hanwiwuluka, kashika makanukwata ni kwoko.

²⁵ Ni yena chingulungulu wa kulijilula, yena mulemu wa A-Izalele, tangwa he hiliaheta, mwaka wa kastigu ye yasula.

²⁶ Mwene Yehova kanambe ngwenyi, Chizenu kapusa, Chizenu chipangula; yuma kuyichi kapwa chizechene yinapu. Nangamisenu chize chili kushi; senu kushi chize chinanangama.

²⁷ Mungukachilumuna, chilumuna, chilumuna; ni chino nawa muchikahwa, ndo mwenyacho makeza, mba mungukamwahacho.

²⁸ Ni yena mwana mutu, profeteza wambe ngwe, Mwene Yehova kanambe ha kutwala kuli A-Amone ni ha kutwala ku sau lio ngwenyi, Katana, katana hanamutomona akahane, wa kucheka hanga akahenye ni kulejima—

²⁹ (shimbu makanumwena usolwelo wa kwonga, shimbu makanutahila mahuza)—katana wa kusa ha makota ja yingulungulu a kulijilula, waze tangwa lio hiliaheta, mwaka wa kastigu yo yasula.

³⁰ Muhilwise mu chindalo chenyi. Kuze anutangile, mu chifuchi kuze nwakatukile, kwenako mungunusopesa.

³¹ Munguzukula hali yenu ufwatulo wami. Mungukafuza hali yenu kahia ka ufwatulo wami; mungukanukuniika mu tachi ja malunga yingandangali waze hajama ha milimo ya kwonwona.

³² Enu munukapwa ngwe kunyi ja kusa ha kahia; manyinga jenu makapwa hakachi ka chifuchi. Kechi kanwiwuluka nawa, mumu yami Yehova hinachamba.