Ezekiel 20 - MUKANDA USANDU WA ZAMBI 1975

¹ Ha mwaka wamuchishimbiali, ni kakweji wamuchitano, ni tangwa liamuchikumi Ha kakweji, amwe makulwana ja Izalele ejile mukuhula kuli Yehova. Yatwama kumeso jami.

² Liji lia Yehova yiliza kuli yami ngwenyi,

³ Mwana mutu, hanjika ni makulwana ja Izalele wambe kuli ayo ngwe, Mwene Yehova kanambe ngwenyi, Kuli yami nuneza nikuhula? Mwene Yehova kanambe ngwenyi, Ni mwono wami, chichi kutá nukahule kuli yami.

⁴ Muapatwila, ena mwana mutu, muapatwila? Nyi chocho ukaalweze yuma ya lwaji ya atato,

⁵ wambe kuli ayo ngwe, Mwene Yehova kanambe ngwenyi, Ha tangwa lize natongwele Izalele nalishingile kuli ana ja munyachi wa Yakomba nikulisolola kuli ayo mu chifuchi cha Engitu. Nalishingile kuli ayo ngwami, Yami nguli Yehova Zambi yenu.

⁶ Ha tangwa lize nalishingile kuli ayo kwachiza mu chifuchi cha Engitu nikwaneha ku chifuchi hinaafupila; chifuchi chinokela yamwa ni wuchi, che chifuchi chahiana yifuchi yeswe ni uhenya.

⁷ Yingwamba kuli ayo ngwami, Mutu mweswe ambile yuma yize ya lwaji nwakuyihulikila meso, kanda nulichisa ni mahamba ja Engitu; Zambi yenu yami Yehova.

⁸ Alioze yangukatukila, kasolo kungupanjika. Niumwe mutu kambilile yuma yize ya lwaji kayipalikilile meso jenyi, chipwe kwehuka mahamba ja Engitu. Yingu nyonga ngwami, Munguzukula ufwatulo wami hali ayo ni kuhwisa utenu wami hali ayo hakachi ka chifuchi cha Engitu.

⁹ Alioze nalingile ha kulemesa jina liami hanga kulichi kuhiluka kumeso ja mavungu kuze atwamine, kumeso jo te nalisolwele ha kwachiza mu chifuchi cha Engitu.

¹⁰ Kashika naatetekelele ni kwachiza mu chifuchi cha Engitu ni kwaneha ku puya.

¹¹ Yingwaaha yiyulo yami ni kwalweza shimbi jami jize mutu matwama ni mwono ha kujifunga.

¹² Chikwo nawa naahele masambata jami akapwe yilayi hakachi ka yami ni ayo akanyingike yami Yehova nakwasela ku usandu.

¹³ Alioze akwa munyachi wa Izalele yangukatukila mu puya; kendele mu yiyulo yami, yalituna shimbi jami jize mutu matwama ni mwono ha kujifunga. Masambata jami aajilwile chikolo. Yingunyonga kwazukwila ufwatulo wam mu puya ngukaamanunune lume.

¹⁴ Alioze yingulinga ha kulemesa jina liami hanga kulichi kajiluka kumeso ja mavungu kumeso jo te naatuhwishile.

¹⁵ Chikwo nawa nalishingile kuli ayo mu puya ngwami, Chichi kanutwala ku chifuchi chize nanuhele, chifuchi chinokela yamwa ni wuchi, chifuchi chahiana yifuchi yeswe ni uhenya,

¹⁶ mumu alitunyine shimbi jami, kendele mu yiyulo yami, ajilwile masambata jami, mumu mbunge jo jakawile mahamba.

¹⁷ Hindu liso liami liaavwilile keke, chaanongesene mu puya chipwe kwamanununa.

¹⁸ Yingwamba kuli ana jo mu puya ngwami, Kanda nwenda mu yiyulo ya tulamba twenu, chipwe kufunga shimbi jo, chipwe kulichisa ni mahamba jo.

¹⁹ Zambi yenu yami Yehova; endenu mu yiyulo yami, nutale kanawa kufunga shimbi jami,

²⁰ nukasele ku usandu masambata jami akapwe chilayi hakachi ka yami ni yenu nukanyingike ngwenu, Zambi yetu Yehova.

²¹ Alioze ana yangukatukila, kendele mu yiyulo yami, katalile kanawa kufunga shimbi jami jize atu kakutwama ni mwono ha kujifunga. Ajilwile masambata jami. Yingunyonga kwazukwila ufwatulo wami ni kuhwisa utenu wami hali ayo mu puya.

²² Alioze yingukokolola kwoko liami, yingulinga ha kulemesa jina liami hanga kulichi kajiluka kumeso ja mavungu, kumeso jo naatuhwishile.

²³ Chikwo nawa nalishingile kuli ayo mu puya ngwami, Mungwamwangina hakachi ka mavungu ni kwahumina ndusu mu yifuchi,

²⁴ mumu kamanunwine shimbi jami alioze alitunyine yiyulo yami nikujilula masambata jami, ni kuhulikila meso jo ku mahamba ja tulamba.

²⁵ Chikwo nawa naahele yiyulo yize kuyapemene, ni shimbi jize kechi kahasa kutwama najo ni mwono.

²⁶ Yingwachisa ku yawana yo ha kwakoka kulambula mu kahia atangu jo eswe kusemuka hanga ngukaavwise lwaji. Yinguchilinga hanga akanyingike yami nguli Yehova.

²⁷ Kashika mwana mutu, hanjika ni akwa munyachi wa Izalele ukambe kuli ayo ngwe, Mwene Yehova kanambe ngwenyi, Ha chikuma chino nawa tulamba twenu angushililikile ha kungulinga utwahe.

²⁸ Mumu muze hinaaneha mu chifuchi chize nalishingile kwaaha, mba heswaho amwene mulundu umwe usuku hanji mutondo umwe wa mafwo, kwenako alambwile yitapo yo ni kukunjika milambu yo ya kwihia; kwenako afwinjishile lupembo wo wa kutulisa mbunge, ni kuzujila milambu yo ya kunwa.

²⁹ (Yingwahula ngwami, Nangamo lika, kuze nunayi? Kashika jina liako liapwa Bama ndo musono.)

³⁰ Kashika amba kuli akwa munyachi wa Izalele ngwe, Mwene Yehova kanambe ngwenyi, Munulichisa nikulita ni ndako ja tulamba twenu ni kupiasuka kukaula yuma yo ya lwaji?

³¹ Ha kuhana milambu yenu, ni kulambula anenu a malunga mu kahia nwakulichisa ni mahamba jenu eswe ndo musono. Mba mungutá nukanguhule, enu akwa munyachi wa Izalele? Mwene Yehova kanambe ngwenyi, Ni mwono wami, chichi kutá nukahule kuli yami.

³² Chize chili mu manyonga jenu kuchichi kwiza kupwa, ha kwamba ngwenu, Tukalifwe ni mavungu, ngwe minyachi ya yifuchi tukakombelele mitondo ni mawe.

³³ Mwene Yehova kanambe ngwenyi, Ni mwono wami, pundu, ni kwoko lia ndundo ni lia kuzoza, ni ufwatulo wa kuzukula, kumungukapwa mwanangana wenu.

³⁴ Mungukanuchiza hakachi ka mavungu; mungukanukonga ku yifuchi kuze nunamwanganyina, ni kwoko lia ndundo ni lia kuzoza, ni ufwatulo wa kuzukula.

³⁵ Mungukanukoka ndo ku puya ya mavungu, mba kwenako mungukasopa ni yenu meso ni meso.

³⁶ Chizechene ngwe nasopele ni tulamba twenu mu puya ya chifuchi cha Engitu chocho nawa mungukasopa ni yenu. Chocho kanambe Mwene Yehova.

³⁷ Mungukanupalikisa mushi lia mbwechi, mba mungukanuniisa mu muya wa usendo.

³⁸ Mungukachiza akwa kukolema hakachi kenu ni waze eswe akunguvulumuna; mungukaachiza ku chifuchi kuze atwamine njize, alioze kechi kanjila mu chifuchi cha Izalele. Henaho munukanyingika yami nguli Yehova.

³⁹ Ha kutwala kuli yenu, akwa munyachi wa Izalele, Mwene Yehova kanambe ngwenyi, Yénu nukalingile mutu mweswe mahamba jenyi, chipwe haliapwila chipwe kulutwe, nyi kunwangupanjikile. Alioze jina liami lisandu kunuchi kajilula nawa nilimwe tangwa ni milambu yenu ni mahamba jenu.

⁴⁰ Mumu Mwene Yehova kanambe ngwenyi, Ha mulundu wami, we mulundu usuku wa Izalele, akwa munyachi wa Izalele e eswe makangulingila mu chifuchi. Kwenako mungukaatambula; kwenako mungwita milambu yenu ni ye yipema hakachi ka yawana yenu, hamwe ni yitapo yenu yisandu.

⁴¹ Mungukanutambula ngwe lupembo mupema muze mungukanuchiza hakachi ka mavungu ni kunukonga ku yifuchi kuze nwamwanganyinyine. Mungukasolola usandu wami hakachi kenu kumeso ja akwa mavungu.

⁴² Mba munukanyingika yami nguli Yehova muze mungukanuneha mu chifuchi cha Izalele, chifuchi chize nalakenyene ni shingo kuhana kuli tulamba twenu.

⁴³ Kwenako munukewuluka ndako jenu ni yitanga yenu yeswe yize nwalichishile nayo, mba munukalivwila lwaji yenwene ha mukunda wa yipi yeswe hinwalinga.

⁴⁴ Mba munukanyingika yami nguli Yehova muze mungukalinga ni yenu nikulita ni jina liami, hi nikulita ni ndako jenu jipi ko, hi nikulita ni yitanga yenu ya kupola ko, enu akwa munyachi wa Izalele. Chocho kanambe Mwene Yehova.

⁴⁵ Liji lia Yehova yiliza kuli yami ngwenyi,

⁴⁶ Mwana mutu, talikisa meso je ku Sule ukashinjile maliji ku Sule, ukaprofeteze kulimika ni chifuchi cha musenge wa Negeve.

⁴⁷ Amba ku musenge wa Negeve ngwe, Ivwa liji lia Yehova! Mwene Yehova kanambe ngwenyi, Mungukawika muli yena kahia ka kulalisa mutondo weswe wa wisu muli yena ni mutondo weswe umu. Kechi kahasa kujima mulengi wa kulekwoka, mba meso eswe makawema nawo chize ku Sule ndo ku Norte.

⁴⁸ Atu eswe makamona yami Yehova hinakawika, kukechi kajima.

⁴⁹ Henaho yingwamba ngwami, Mwene Yehova! Kanangwambe ngwo, Au mwe mukwa kuta yishima.