Ezekiel 2 - MUKANDA USANDU WA ZAMBI 1975

¹ Aye yamba kuli yami ngwenyi, Mwana mutu, mana ha molu je mba munguhanjika ni yena.

² Muze hahanjika ni yami, Spiritu yangunjila, yangumanyisa ha molu jami, yingumwivwa kanahanjika ni yami.

³ Yamba kuli yami ngwenyi, Mwana mutu, ngunakutumu kuli A-Izalele, vungu lia yihulia waze hanangukatukila, o ni tulamba two hanguvulumuna ndo tangwa lino lia musono.

⁴ Atu wano kapwa akwa shino, akwa pami. Ngunakutumu kuli ayo ukambe kuli ayo ngwe, Mwene Yehova kanambe ngwenyi,

⁵ Chipwe mevwa, chipwe kasolo kwivwa (mumu kapwa munyachi wa yihulia) makanyingika profeta hwali hakachi ko.

⁶ Ni yena, mwana mutu, kanda wavwila woma, kanda wivwa woma wa maliji jo chipwe muopwa ni mikalale ni mbimbo; chipwe mutwama hakachi ka tuvwanda. Kanda uvwila woma maliji jo, chipwe kutatajala mumu ha kutala cho, mumu kapwa munyachi wa yihulia.

⁷ Muhanjika maliji jami kuli ayo, chipwe mevwa, chipwe kasolo kwivwa, mumu kapwa munyachi wa yihulia.

⁸ Alioze yena, mwana mutu, ivwa chize ngunakwambe. Kanda upwa ni uhulia ngwe munyachi uno wa yihulia. Pakula kanwa ukalie chize mungukwaha.

⁹ Ha kutala kumanyi kwoko limwe alizozele kuli yami, linakwata mukanda wa chivungo;

¹⁰ yachizazulula kumeso jami; sona jiliho kulutwe ni kunyima. Kwasoneweneho maliji a kulila, ni kulishimwoka, ni chinyengo.