Ezekiel 19 - MUKANDA USANDU WA ZAMBI 1975

¹ Ni yena, putuka kulila lungungu hali alemu ja mu Izalele

² ngwe, Ndumba wa chihwo wa tachi hakachi ka ndumba ni akwo, chocho wapwile noko! Wautaminyine hakachi ka mievu ja ndumba nikulela ana jenyi.

³ Walelele umwe hakachi ka ana jenyi; aye yalumuka wa tachi, yalilongesa kukwata yifwo, yalia atu.

⁴ Mavungu yatambika mutambi kulimika nenyi, yamukwata mu wumbu lio. Yamuneha ku chifuchi cha Engitu ni tuzambu.

⁵ Naye ha kumona shimbu Hoka naye kahashile kutalatala nawa, yanda mukwo wa ana jenyi, yamupwisa wa tachi.

⁶ Aye nawa yazomba ni ndumba ni akwo, yalumuka wa tachi, yalilongesa kukwata yifwo, yalia atu.

⁷ Yanyingika yihunda yo ya kukolesa; yapupa membo jo, ndo chifuchi chevwile mwongo ni waze eswe apwilemo ha lundunjila wa kuteta chenyi.

⁸ Henaho mavungu yamutela makambwila kweswe kwa kujingilika; yazazulula wanda wo hali iye; yamukwata mu wumbu lio.

⁹ Yamutambula ni tuzambu ni kumusa mu luchikalanga; yamutwala kuli mwanangana wa Babilonia; yamusa mu ufunge, hanga kechi kevwa nawa liji lienyi ha milundu ya Izalele.

¹⁰ Noko wapwile ngwe muuva mu munda wa uva, wa kutumbulula ku meya. Wapwile ni mihuko, ni mitango yinji mumu ha kulumbama cha meya.

¹¹ Chishina chawo chalumukine lukanda wa mukwa kuyula; yiutunda helu Ha mitango yinene; wamonekene ha kusuha chawo ni mitango yawo ya kulumbama.

¹² Alioze muuva autukwile ni ufwatulo nikuumbila hashi. Yiuma ni fuji ya ku Chivumbuko; yachiza mihuko yawo hululu; chishina chawo chomine; chaliwile ni kahia.

¹³ Haliapwila hautumbulula mu puya, mu chifuchi kuchishi meya, cha pwila.

¹⁴ Kahia hikatuhukila ku chishina, hikalia mitango ni mihuko; chocho kuushi nawa ni chishina cha tachi, chipwe lukanda wa mukwa kuyula. Chino chapwa mwaso wa lungungu, hichalumuka nawa mwaso wa lungungu.