Ezekiel 18 - MUKANDA USANDU WA ZAMBI 1975

¹ Liji lia Yehova yiliza kuli yami cheka nawa ngwenyi,

² Kuchi chinalumbunuka kuta chishima chino kanji kanji ha kutwala ku chifuchi cha Izalele ngwo, Atato halia uva jisasu, mba mu makanwa ja ana mwapangaminya?

³ Mwene Yehova kanambe ngwenyi, Ni mwono wami chishima chino kunuchi kachita nawa mu Izalele.

⁴ Alma ja eswe nijami; alma ya tato ni alma ya mwanenyi jeswe nijami; mba alma yize muyivulumuna kumuyikafwa.

⁵ Nyi mutu kapwa mukwa ululi nikulinga chize chinalite ni shimbi, Chinalulama—

⁶ nyi keshi kulila ha milundu hanji kuhetwila meso jenyi ku mahamba ja munyachi wa Izalele; kachi keshi kupihisa pwo lia mukwo, chipwe kukundama kuli pwo ha matangwa jenyi a luchisa,

⁷ keshi kupinjisa niumwe alioze kakuhilwisa tombo kuli mukwa kutambula mukuli; keshi kwiya alioze kakuhana mbolo yenyi kuli akwa zala; kakujika akwa uselesele,

⁸ keshi kuhana mbongo ha mbwezo hanji ha kulifumbula chimwe; kakuchiza kwoko lienyi ku uhenge; kakupatula ni ululi wamwenemwene hakachi ka mutu ni mutu;

⁹ kakwenda nikulita ni yiyulo yami; hatala kanawa akafunge shimbi jami—mukwa ululi mwenawo, aye kumakatwama ni mwono. Chocho kanambe Mwene Yehova.

¹⁰ Nyi hanji masema mwana wa lunga umwe mapwa mwiji, hanji mukwa kushiha, kakulinga yino yuma,

¹¹ alioze kakulia ha milundu, kakupihisa pwo lia mukwo,

¹² kakupinjisa chiswale ni mukwa kuhona, kakwiya, keshi kuhilwisa tombo, kakuhetwila meso jenyi ku mahamba, kakulinga yuma ya waji,

¹³ kakuhana mbongo ha mbwezo ni kutambula ja kulifumbula; te iye makatwama ni mwono? Kechi katwama ni mwono. Halinga yino yuma yeswe ya lwaji; kumakafwa; manyinga jenyi makapwa hali iye mwene.

¹⁴ Alioze nyi yono lunga masema mwana wa lunga yoze mamona milonga yeswe tato halinga, mevwa woma, kalingile chocho,

¹⁵ keshi kulia ha milundu hanji kuhetwila meso jenyi ku mahamba a munyachi wa Izalele, hanji kupihisa pwo lia mukwo,

¹⁶ keshi kuvulumuna niumwe, keshi kwita tombo, keshi kwiya, alioze kakuhana mbolo yenyi kuli akwa zala, kakujika akwa uselesele,

¹⁷ kakuchiza kwoko lienyi ku uhenge, keshi kutambula mbwezo hanji kulifumbula, kakuhinga shimbi jami nikwenda nikulita ni yiyulo yami; aye kechi kafwa ha uhenge wa tato, kumakatwama ni mwono.

¹⁸ Alioze ha kutwala kuli tato, se iye halia kuzo, heya kuli mukwo, halinga chize kuchapemene hakachi ka atu jenyi, aye kumakafwila uhenge wenyi.

¹⁹ Hindu munwamba ngwenu, Kuchi te mwana kechi kamona lamba ha uhenge wa tato? Nyi mwana halinga chize chinalite ni shimbi, Chinalulama; hatala kanawa akafunge yiyulo yami yeswe, aye kumakatwama ni mwono.

²⁰ Alma yize muyivulumuna kumuyikafwa. Mwana keshi kumwena lamba uhenge wa tato; chipwe tato keshi kumwena lamba uhenge wa mwana. Ululi wa mukwa ululi kumuukapwa hali iye mwene; ni ungulungulu wa chingulungulu kumuukapwa hali iye mwene.

²¹ Alioze nyi chingulungulu makahichika milonga yenyi yeswe yize havulumuna akafunge yiyulo yami yeswe ni kulinga chize chinalite ni shimbi, Chinalulama, kumakatwama ni mwono; kechi kafwa.

²² Niumwe Utanguko aye halinga makamwiwulukilawo nawa wa kulimika nenyi. Kumakatwama ni mwono mumu ha ululi halinga.

²³ Mwene Yehova kanambe ngwenyi, Te nakuwahilila ni kufwa cha chingulungulu? Chazangile te akahichike ndako jenyi akatwame ni mwono?

²⁴ Alioze muze mukwa ululi mahichika ululi wenyi akalinge uhenge, ni kulinga yuma ya lwaji yize yene chingulungulu akulinga, te makatwama ni mwono? Nichimwe chitanga chenyi cha ululi halinga makamwiwulukilacho. Ha mafwefwe aze hahila, ni mulonga uze havulumuna kumakafwa.

²⁵ Hindu nwakwamba ngwenu, Ndako ja Mwene hi ja ululi ko. Ivwenu haliapwila enu akwa munyachi wa Izalele. Kumanyi ndako jami hi ja ululi ko? Nyi ja yenu kujalulamine?

²⁶ Muze mukwa ululi mahichika ululi wenyi akalinge uhenge, kumakaufwila. Ha uhenge uze halinga kumakafwa.

²⁷ Alioze muze chingulungulu mahichika ungulungulu uze halinga akalinge chize chinalite ni shimbi, Chinalulama, kumakalamwina mwono wenyi.

²⁸ Mumu hanyonga, hahichika Utanguko uze weswe halinga, kashika kumakatwama ni mwono; kechi kafwa.

²⁹ Hindu akwa munyachi wa Izalele kanambe ngwo, Ndako ja Mwene hi ja ululi ko. Enu akwa munyachi wa Izalele, kumanyi ndako jami hi ja ululi ko? Nyi ja yenu kujalulamine?

³⁰ Kashika Mwene Yehova kanambe ngwenyi, Mungunupatwila, enu akwa munyachi wa Izalele, mutu mweswe nikulita ni ndako jenyi. Likonyekenu nukahichike Utanguko wenu weswe kuchina uhenge wenu muukanwonwona.

³¹ Mbilenu Utanguko weswe uze hinwalinga kulimika ni yami, nukatambule mbunge jaha ni Spiritu jaha! Kuchi te munufwa, enu akwa munyachi wa Izalele?

³² Mumu chishi kuwahilila ha kufwa cha niumwe, kashika alumukenu nukatwame ni mwono. Chocho kanambe Mwene Yehova.