Ezekiel 17 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, hanjika chijimbikilo; tela chishima munyachi wa Izalele,

³ ngwe, Mwene Yehova kanambe ngwenyi, Pupa umwe munene wa mapulwa anene ni tonga jisuku, kali ni mangona anji a ulombo weka ni weka, yeza ku Lebano, yandako mutango wa ku songo lia musedru.

⁴ Yamakunaho mwana waha wa songo lume, yamumbata ku chifuchi cha kusepa; yamutumba mu chihunda cha akwa kutalika.

⁵ Mba yanda yimwe mbuto ya ku chifuchi nikuyitumba mu mavu a chinuno kuze kwatwama meya a kulumbama. Yayilumba ngwe mwana wa mupote,

⁶ yiyisoka ngwe muuva umwe wa kutanda ha mavu. Mitango yiyitalikisa kuli iye, alioze miji kuze kwene yakwachile. Chocho chalumukine muuva nikusokesa ana ni mafwo.

⁷ Alioze kwapwile nawa pupa mukwo munene ni mapulwa anene ni mangona anji, kumanyi muuva uno kwe ku mavu autumbile watalikishile miji yawo kuli iye nikusokesa mitango yawo kuli iye hanga akauhinjile meya.

⁸ Te autumbile mu mavu apema ku meya anji hanga ukasokese mitango ni kwima mihuko ukapwe muuva upema.

⁹ Amba ngwe, Mwene Yehova kanambe ngwenyi, Te muutatuka? Kechi kuutukula nikutetaho mihuko yawo yeswe ukome, hanga mafwo jawo eswe a wisu a kusokoloka akome? Kuchatambile kwoko lia tachi jinji, hanji atu anji kuutukula ni miji yawo.

¹⁰ Chipwe ha kuutombola te kumuutatuka? Kuuchi kulela chau muze muulambiwa ni fuji ya ku Chivumbuko? Muukalela mu mavu haze hene watatukilile.

¹¹ Liji lia Yehova yiliza kuli yami ngwenyi,

¹² Amba haliapwila ku munyachi wa yihulia ngwe, Yino yuma kuyanulumbunuka? Amba kuli ayo ngwe, Mwanangana wa Babilonia yeza ku Yerusaleme, yakwata mwanangana wako ni alemu jako, yaaneha hamwe nenyi ku Babilonia.

¹³ Yanda umwe wa munyachi wa mwanangana nikukolesa nenyi usendo, nikumushingisa shingo. (Akwa lutwe a chifuchi te haachizamo,

¹⁴ hanga wanangana ukalikehese, kuuchi kulifuza hanga ukakole ha kufunga usendo.)

¹⁵ Alioze wamukatukilile ha kutuma mikeji ku Engitu akamwehe tuvwalu ni tujita anji. Te machihasa? Ha kulinga yuma ngwe yino mutu mahasa kulilamwina? Mahasa kulilamwina ha kutangula usendo?

¹⁶ Mwene Yehova kanambe ngwenyi, Ni mwono wami pundu, kuze kwatwama mwanangana yoze wamupwishile mwanangana, yoze halelesa shingo lienyi, ni usendo uze alingile nenyi wautangwile, mwe mu Babilonia mafwila.

¹⁷ Falau ni tujita twenyi a tachi ni mbunga yenyi yinene kechi kamukwasa mu jita muze malumbika milumba ya jita, ni kutunga yipanga ya kuseleka hanga akatete mwono wa atu anji.

¹⁸ Kechi kalilamwina mumu walelesele shingo, watangwile usendo. Mumu wahanyine kwoko lienyi, hindu walingile yino yuma yeswe.

¹⁹ Kashika Mwene Yehova kanambe ngwenyi, Ni mwono wami, shingo liami lize alelesele, ni usendo wami uze watangwile, munguyifwetesa ha mutwe wenyi.

²⁰ Mungukamuzazulwila wanda wami; makakwachika mu kambwila liami, mba mungukamuneha ku Babilonia ni kusopa nenyi kuze kwene ha utwahe uze hangulinga.

²¹ Ni akwa kuchina a ku maswalale jenyi makafwa ni katana, ni waze malisalaho makamwangana ku fuji jeswe, mba munukanyingika yami Yehova nachambile.

²² Mwene Yehova kanambe ngwenyi, Yami mwene mungukanda kamutango kalelu ka ku songo lia helu lia musedru; mungukautumba. Mungukamakuna hakachi ka mitango yaha umwe wa wisu, ni yami mwene mungukautumba ha mulundu umwe usuku chikolo.

²³ He ha kunangama cha mulundu wa Izalele mungukautumba hanga ukasokese mitango, ni kwima mihuko ukapwe musedru upema. Mushi liawo milali yeswe ya tushitu makatwama; mu chihuhumuke cha mitango yawo milali yeswe ya tujila makatunga yaswa yo.

²⁴ Ni mitondo yeswe ya mu yambu muyinyingika yami Yehova nakulelesa mutondo usuku; nakunangamisa mutondo wihi; nakuumisa mutondo wa wisu, nakutatwisa mutondo umu. Yami Yehova Hachamba; mungukachilinga.