Ezekiel 16 - MUKANDA USANDU WA ZAMBI 1975

¹ Liji lia Yehova yiliza cheka nawa kuli yami ngwenyi,

² Mwana mutu, lumbununa kuli Yerusaleme yuma yenyi ya lwaji,

³ wambe ngwe, Mwene Yehova kanambe kuli Yerusaleme ngwenyi, Chikota che ni kusemuka che, ya ku chifuchi cha A-Kanana. Tatenu Ka-Amore, ni noko aye Ka-Hete.

⁴ Ha kutwala ku kusemuka che, ha tangwa lia kusemuka mukuvu we kautetele, kakusanyishine meya ukapeme, chipwe kukukwichila mungwa, chipwe kukuvunga mu mahina.

⁵ Nilimwe liso liakutalile ni vumbi akakuvwile keke akakulinge yino yuma. Alioze akumbilile mu yambu. Mumu akuvwilile kupiha ha tangwa lia kusemuka che.

⁶ Ha kukupalika nakumwene kutunya mu manyinga je, yingwamba kuli yena mwe mu manyinga je ngwami, Twama ni mwono.

⁷ Nakutatwishile ngwe chiputa cha mu yambu. Yiutatuka ni kusuha ni kuheta ku upwo. Mele je hasoloka ni kambu je hijasuha, hindu kushi ni mazalo, uchili wa uselesele.

⁸ Ha kukupalika cheka nawa nikukutala, kumanyi hiwaheta ha mwaka wa zango. Yingukuzazulwila hina liami kufuka uselesele we. Yingulishinga ni yena nikukolesa usendo ni yena (chocho kanambe Mwene Yehova), yiwalumuka niwami.

⁹ Yingukusanyisa ni meya ni kukuchiza manyinga je, ni kukukwita ni maji.

¹⁰ Yingukujika ni mahina a mbordado, ni kukusa haku ja malambu. Yingukujichlka ni linyu lipema ni kukufuka ni seda.

¹¹ Yingukusa yuma ya uhenya, yingusa makayi ha moko je, ni kalenge ha kota.

¹² Yingusa kazeya mu mazulu je, ni yingelengele mu matwi je, ni chipangula chipema ha mutwe we.

¹³ Chocho wapemene ni oru ni prata, ni mazalo je apwile a linyu lipema, ni seda, ni mahina a mbordado. Walile wunga wafufunuka, ni wuchi, ni maji; wapemene chikolo; walumukine mwanangana wa pwo.

¹⁴ Lufuma we wafumanyine hakachi ka mavungu mumu ha upeme we, mumu wapemene liakulu ni uhenya uze te nakuhele yami. Chocho kanambe Mwene Yehova.

¹⁵ Alioze wajikijilile upeme we, ni kulipwisa chikoi ha mukunda wa lufuma we, ni kupwa chikoi kuli mweswawo mapalika.

¹⁶ Yiwanda amwe mazalo je ni kulilingila matembele a uhenya, mba kwenako walingile ukoi. Chuma chino te kanda achimona, chipwe kulutwe kechi kachimona.

¹⁷ Yiwanda nawa yuma ye ya uhenya upema wa oru yami ni prata yami yize nakuhele, yiulilingila tuponya twa malunga ni kulinga no ukoi.

¹⁸ Yiwanda nawa mazalo je a mbordado Ukafuke tuponya waze, ni kusa maji jami ni insensu yami kumeso jo.

¹⁹ Chikwo nawa mbolo yami yize nakuhele (mumu nakulishile ni wunga wafufunuka ni maji ni wuchi), wayisele kumeso jo yikapwe ya lupembo mupema. Chocho kanambe Mwene Yehova.

²⁰ Wanjile ana je a malunga ni a mapwo aze wangusemene ni kwahana milambu kuli ayo akaahe. Ukoi we te wakeha naye,

²¹ ukaweze nawa kuhana ana jami ni kwakunjika kuli ayo mulambu wa kahia?

²² Ni ha yitanga ye yeswe ya lwaji, ni ukoi we, kwewulukile matangwa a wana-mapwo we muze wapwile wa uselesele, kushi mazalo, ni kutunya mu manyinga je.

²³ Mba helu lia ungulungulu we weswe (Mwene Yehova kanambe ngwenyi, Lamba kuli yena, lamba!)

²⁴ walitungilile zuwo ha foro nikulilingila zuwo lisuku ha lwaza mweswe.

²⁵ Ku songo ha tapalo heswe watungile zuwo lie lisuku nikulanjisa upeme we, ni kulihana kuli mweswe mapalika, ni kwokesa ukoi we.

²⁶ Walingile ukoi ni A-Engitu, enyembo je a usolo, nikwokesa ukoi we nikungwihia.

²⁷ Kashika nazozele kwoko liami kulimika ni yena; natepulwile chihanda che cha kukusela, ni kukukunjika ku chipululu cha akwa kole je, mapwo ja A-Filistea waze evwilile sonyi ndako je ja usolo.

²⁸ Walingile ukoi ni A-Asuria mumu kusolo kuyuka; ewa, walingile no ukoi hindu kuchakuhwile.

²⁹ Wokesele ukoi we ni akwa kusepa a ku chifuchi cha Kaletea, hindu chipwe chocho kuchakuhwile.

³⁰ Mwene Yehova kanambe ngwenyi, Mbunge ye yayijile ni usolo ha kulinga yuma yipwa haha, yitanga ya chikoi keshi sonyi;

³¹ ni kutunga zuwo lia foro ku songo ha tapalo heswe, ni kulinga zuwo lie lisuku ha lwaza mweswe. Hindu kwapwile ngwe chikoi mumu walelesele fweto.

³² Ena pwo ha ulo wakulinga utanji, wakutambula ngeji, hi lunga henyi ko!

³³ Malunga kakuhana mbongo kuli yikoi eswe; ahoze yena wahanyine yawana kuli akwa zango lie eswe, ni kwafweta hanga akakatuke sali ni sali nikwiza kuli yena ha ukoi we.

³⁴ Chocho walipwilile ni mapwo ni akwenu mu ukoi wenu. Niumwe wakwichile ukapwe chikoi; yena mwene wafwetele mbongo, kahanyine mbongo kuli yena. Henaho walipwilile.

³⁵ Kashika yena chikoi, ivwa liji ha Yehova.

³⁶ Mwene Yehova kanambe ngwenyi, Mumu sonyi je ajisolwele, ni uselesele we aufukwile mu ukoi we ni akwa zango lie, ni ha mukunda wa mahamba je eswe a lwaji, ni wa manyinga ja ana je wahanyine kuli ayo,

³⁷ kashika mungukakungulula akwa zango lie eswe waze wahehele no; waze eswe waazangile ni waze waavwilile kupiha; mungukaachiza sali ni sali nikwakungulula kulimika ni yena. Mba mungukafukula uselesele we kuli ayo hanga akamone uselesele we weswe.

³⁸ Mungukakupatwila ngwe akupatwila mapwo aze akutangula ulo wo, ni waze akushiha atu. Mungukakukokela manyinga a ufwatulo ni ukwa.

³⁹ Mungukakukunjika kuli akwa zango lie mba makanunguna zuwo lie ha foro ni kupuzula mazuwo je asuku. Makakuzula mazalo je, makakutambula yuma ye ya uhenya upema ni kukuhichika uselesele kushi mazalo.

⁴⁰ O kumakaneha chizavu cha kulimika ni yena, mba kumakakwasa mawe, ni kukutetateta tuyipinji ni tutana two.

⁴¹ Makocha mazuwo je nikukulinga upatwilo kumeso ja mapwo anji. Mungukamanyisa ndako je ja ukoi; kuchi kafweta nawa malunga.

⁴² Chocho mungukamanununa ufwatulo wami hali yena, mba ukwa wami mulikakatuka hali yena. Mungukahwima mbunge, chichi kutenuka nawa.

⁴³ Mwene Yehova kanambe ngwenyi, Mungukakufwetesa yitanga ye ha mutwe we mumu kwewulukile matangwa ja wana-mapwo we ahoze wangwihia ni yuma yino yeswe, kashika. Te kwawezele usolo helu ha yitanga ye yeswe ya lwaji?

⁴⁴ Akwa kuta yishima eswe makutela chishima chino ngwo, Mwana wa pwo walifwa ni naye.

⁴⁵ Yena uli mwana wa noko, aye wevwilile kupiha lunga henyi ni anenyi. Uli mwanakwo wa ayayenu waze evwilile kupiha malunga jo ni ana jo. Noko wapwile Ka-Hete, tatenu aye Ka-Amore.

⁴⁶ Yayenu aye Samaria yoze Watwamine ni anenyi a mapwo sali ha ku Norte. Mwanakwenu yoze Watwamine sali ha ku Sule aye Sondome ni anenyi a mapwo.

⁴⁷ Hindu kulinga yuma yo ya lwaji kuchakuhetele, chipwe kwenda mu majila jo, ahoze ni shimbu likepe wika wapiha kuhiana ayo mu ndako je jeswe.

⁴⁸ Mwene Yehova kanambe ngwenyi, Ni mwono wami mwanakwenu Sondome ni anenyi a mapwo kalingile yuma yize yena hiwalinga, ni ana je a mapwo.

⁴⁹ Uhie wa mwanakwenu Sondome uno: aye ni anenyi a mapwo endele nikulengumuka, ni kukuta ni kulia chinji, ni kuhwima ni kulu-mbama cha kuwaha, alioze kakwashile yiswale ni akwa kuhona.

⁵⁰ Apwile nikulizata ni kulinga yuma ya lwaji kumeso jami, kashika ha kuchimona naachijileko.

⁵¹ Samaria kavulumwine chihanda cha muchima cha milonga ye. Yena hiwalinga yuma ya lwaji kuhiana ayo. Nikulita ni yitanga ye ya lwaji mwanakwenu ni yayenu kanasoloka ngwe akwa ululi.

⁵² Ulikoleze tuhu ni kusauka che, yena nawa, mumu hiwapwisa muhapwa upatwilo hali mwanakwenu ni yayenu mumu ha milonga ye yize yahiana ni lwaji milonga yo. O hasamba hamwe hakehe, yena wahia liakulu. Kashika ni yena nawa ivwa sonyi, likoleze tuhu ni kusauka che mumu hiwasolola mwanakwenu ni yayenu ngwe akwa ululi.

⁵³ Mungukahilwisa kuwaha cho; kuwaha cha Sondome ni anenyi a mapwo, ni kuwaha cha Samaria ni anenyi a mapwo; chikwo nawa mungukahilwisa kuwaha cha yena mwene hakachi ko,

⁵⁴ hanga ukalikoleze ni kusauka che ni kuvwila sonyi yuma yeswe hiwalinga. Chocho muwalumuka kulembejeka kuli ayo.

⁵⁵ Ha kutwala kuli mwanakwenu ni yayenu ngwami, Sondome ni anenyi a mapwo, makahiluka ku kuwaha cho cha kushi; ni Samaria ni anenyi a mapwo makahiluka ku kuwaha cho cha kushi; ni yena ni ana je a mapwo munukahiluka ku kuwaha chenu cha kushi.

⁵⁶ Mwanakwenu Sondome kapwile ngwe kashilikilo mu kanwa lie ha matangwa je a kulengumuka,

⁵⁷ shimbu te ungulungulu we kanda aufukula? Haliapwila hiwalifwa nenyi, umwe kanamuyungu kuli ana ja Endome ni enyembo jenyi eswe ni kuli ana ja A-Filistea. Waze eswe a kukujingilika kanakulelesa.

⁵⁸ Linatambula fweto ya usolo we ni ya yitanga ye ya lwaji. Chocho kanambe Yehova.

⁵⁹ Ewa, Mwene Yehova kanambe ngwenyi, Mungukalinga ni yena nikulita ni chize yena hiwalinga. Yena hiwalelesa shingo ha kutangula usendo,

⁶⁰ hindu yami mungwiwuluka usendo wa yami ni yena ha matangwa a wana-mapwo we, mba mungukakukolesa ni usendo wa mutolo.

⁶¹ Mba muwiwuluka ndako je, muwivwa sonyi muze mungwanda yayenu ni mwanakwenu nikukwaho akapwe kuli yena ana je a mapwo, alioze hi ha usendo we ko.

⁶² Mungukakolesa ni yena usendo wami mba munyingika yami nguli Yehova,

⁶³ hanga ukewuluke ukalitupieke, kanda upakula nawa kanwa lie mumu ha sonyi muze mungukakukonekena yize yeswe hiwalinga. Chocho kanambe Mwene Yehova.