Ezekiel 13 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, profeteza kulimika ni aprofeta ja A-Izalele waze akuprofeteza. Amba kuli waze akuprofeteza cha ku manyonga jo ene ngwe, Ivwenu liji lia Yehova!

³ Mwene Yehova kanambe ngwenyi, Lamba kuli aprofeta yihepuke waze akukaula maspiritu jo ene; kamwene nichimwe!

⁴ Enu A-Izalele, aprofeta jenu hapwa ngwe mikuza hakachi ka mazuwo a kupuzula.

⁵ Kunwakandukile ku yituwa mu chipanga-cha-mawe. Kunwatungile chimwe chipanga-cha-mawe ha munyachi wa Izalele chikajikize mu jita ha tangwa lia Yehova.

⁶ Hanahanjika mahuza; hanatahe cha kwonga. Kakwamba ngwo, Yehova kanambe, alioze Yehova kaatumine, hindu kanafuliela ngwo, Iye makamanununa liji lietu.

⁷ Shimbu munwamba ngwenu, Yehova kanambe, ni yami chanutumine, kumwamwene usolwelo wa kulionga, ni kuhanjika liji lia ngombo ya mahuza?

⁸ Kashika Mwene Yehova kanambe ngwenyi, Mumu hinwamba yuma ya kulionga, hinwamona mahuza, kashika yami kunalimika ni yenu. Chocho kanambe Mwene Yehova.

⁹ Kwoko liami mulikalimika ni aprofeta aze akumona usolwelo wa kulionga ni waze akutaha ni mahuza. Kechi katwama mu punga ya atu jami; kechi kaasoneka mu mukanda wa munyachi wa A-Izalele, chipwe kunjila mu chifuchi cha A-Izalele; mba munukanyingika yami nguli Mwene Yehova.

¹⁰ Ha chikuma chino chene mumu hanongo atu jami ngwo, Sambukila, muze sambukila yakuhi; ni chikwo nawa, muze e atu matunga chipanga-cha-mawe wano aprofeta kakuchitomesa ni pemba.

¹¹ Amba kuli waze akuchitomesa ni pemba ngwe, Kumuchiwuzuka! Kumukukapwa mihwiji ya vula; chiwe chinene muchikanoka, ni fuji ya kangonga muyikeza;

¹² mba muze che chipanga muchikawuzuka, te atu kechi kanuhula ngwo, Pemba yize nwaseleho kuli yili?

¹³ Kashika Mwene Yehova kanambe ngwenyi, Mu ufwatulo wami mungukatuma fuji ya kangonga; mu utenu wami kumukukapwa muhwiji wa vula, ni chiwe chinene mu ufwatulo ngukachonwone.

¹⁴ Mungukapuzula chipanga-cha-mawe chize hinwatomesa ni pemba nikuchinungwina hashi, ndo fundamentu yacho muyikasoloka. Muze muchikapuzuka, ni yenu mununonga hakachi kacho, chocho munukanyingika yami nguli Yehova.

¹⁵ Chocho mungukahwisa ufwatulo wami ha chipanga-cha-mawe ni waze hachitomesa ni pemba. Mba mungukanwamba ngwami, Chipanga kuchishiko nawa, chipwe waze achitomesene,

¹⁶ te aprofeta aze ja mu Izalele aprofetezele ha kutwala ku Yerusaleme nikumona sambukila yako muze te sambukila yakuhi. Chocho kanambe Mwene Yehova.

¹⁷ Ni yena mwana mutu, talikisa meso je kulimika ni mapwo ja atu je, waze akuprofeteza yuma ya mu manyonga jo ene. Profeteza kulimika no,

¹⁸ ukambe ngwe, Mwene Yehova kanambe ngwenyi, Lamba kuli mapwo aze akutanga masako ha moko eswe; kakulinga manda a kusa ha mitwe ya atu asuku ni ehi hanga akazuke alma ja atu! Te munuzomba alma ja atu jami, nikufunga alma ja akwo ni mwono hanga nukafumbuke yenu?

¹⁹ Hinwangujilula hakachi ka atu jami ha kome ja sevada ni tuyipinji twa mbolo, ha kushiha atu aze kuchatambile kufwa, ni kufunga ni mwono atu aze kuchatambile kutwama ni mwono, ni ha mahuza jenu kuli atu jami, mumu o kakupanjika ku mahuza.

²⁰ Kashika Mwene Yehova kanambe ngwenyi, Kunalimika ni masako jenu nwakuzomba no alma ja atu hanga ahumuke ngwe tujila. Mungwatokola ku moko jenu; mungutusula alma ja waze nwakuzomba alma jo akatusuke ngwe tujila.

²¹ Manda jenu nawa mungunutokwelo nikupulula atu jami kuli yenu. Kechi kapwa nawa mu moko jenu ngwe upite wa kupunda, mba munukanyingika yami nguli Yehova.

²² Mumu hinwahongesa mbunge ya mukwa ululi ni mahuza, chipwe yami chichi kumuhongesa; alioze hinwahana tachi kuli chingulungulu kuchina makatuka ku jila yenyi ya ungulungulu akalamwine mwono wenyi.

²³ Kashika kunuchi kamona nawa usolwelo wa kulionga hanji kutaha ngombo. Mungupatula atu jami mu moko jenu. Henaho munukanyingika yami nguli Yehova.