Ezekiel 12 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, kuwatwama hakachi ka munyachi wa yihulia. Kali ni meso a kumona no, alioze kamwene. Kali ni matwi a kwivwa no, alioze kevwile, mumu kapwa munyachi wa yihulia.

³ Kashika, yena mwana mutu, lilulikile yikwata ya njize ukaye ku unjize ha mwalwa kumeso jo. Mukatuka kuma kwe ukaye unjize kuma kweka kwe kumeso jo. Hanji muchialumbunuka chipwe kapwa munyachi wa yihulia.

⁴ Kumutuhwisa yikwata ye ha mwalwa kumeso jo, ngwe yikwata ya unjize, mba yena mwene mukatuhuka ha ngoloshi kumeso jo ngwe atu kakulinga, waze chaatamba kuya ku unjize.

⁵ Lokola yishimi kumeso jo ukatuhwishileko yikwata.

⁶ Kumeso jo mukazundula yikwata ha chipaya che ukayimbate ha ufuku. Fuka ku meso kanda umona chifuchi, mumu hinakutenga chilayi ku munyachi wa Izalele.

⁷ Yingulinga chize angutumine. Yinguchiza yikwata yami ha mwalwa, ngwe yikwata ya kuya nayo ku unjize. Ha ngoloshi yingufula mu yishimi ni moko jami mwene; yingutuhuka ni ufuku nikumbata yikwata yami ha chipaya kumeso jo.

⁸ Ha chimene liji lia Yehova yiliza kuli yami ngwenyi,

⁹ Mwana mutu, akwa munyachi wa Izalele, munyachi wa yihulia, kakuhulile ngwo, Yika unalingi?

¹⁰ Amba kuli ayo ngwe, Mwene Yehova kanambe ngwenyi, Chikuma chino chinatwala kuli mwe mulemu mu Yerusaleme, ni ku munyachi weswe wa Izalele waze atwamamo.

¹¹ Amba ngwe, Nguli chilayi kuli yenu. Chino nalinga yami, chocho malinga kuli ayo nawa, mba kumakaya ku unjize, ku ufunge.

¹² Mulemu yoze uli hakachi ko neye makazundula yikwata yenyi ha chipaya chenyi ha ufuku, akatuke. Makafula mu yishimi akatuhwishileko yuma yenyi. Makafuka meso jenyi kanda amona chifuchi.

¹³ Mungukamuzazulwila wanda wami; makakwachika mu kambwila liami; mungukamutwala ku Babilonia mu chifuchi cha A-Kaletea, alioze kechi kachimona, hindu mafwilako.

¹⁴ Mungukamwangina ku fuji jeswe waze eswe anamujingilika, yikwashi jenyi, ni maswalale jenyi eswe, mungukatomona katana kwahanga.

¹⁵ Makanyingika yami nguli Yehova, muze hinaamwangina hakachi ka mavungu, nikwasandumuna ndusu mu yifuchi.

¹⁶ Hindu mungutayiza amwe kuputuka ku katana, ni ku kapunga, ni ku chilungo, hanga akatayize yuma yo yeswe ya lwaji hakachi ka mavungu kuze anayi, akanyingike yami nguli Yehova.

¹⁷ Chikwo nawa liji lia Yehova yiliza kuli yami ngwenyi,

¹⁸ Mwana mutu, liako mbolo ye nikuliwakamina, nwako meya nikuchikima ni woma,

¹⁹ ukambe kuli akwa chifuchi ngwe, Mwene Yehova kanambe ha kutwala kuli akwa Yerusaleme mu chifuchi cha Izalele ngwenyi, Makalia mbolo yo ni woma, makanwa meya ni mwongo, mumu chifuchi cho makachizamo yuma yacho yeswe, ha mukunda wa upupilo wa waze eswe atwamamo.

²⁰ Yihunda ya atu makayenyeka, ni chifuchi muchikapwa cha hululu. Mba munukanyingika yami nguli Yehova.

²¹ Liji lia Yehova yiliza kuli yami ngwenyi,

²² Mwana mutu, chishima chino nuli nacho cha kutwala ku chifuchi cha Izalele ngwenu, Matangwa kanayi nikusuha, ni usolwelo weswe kuwakufuwa. Kuchi chinalumbunuka?

²³ Kashika, walumbunwine ngwe, Mwene Yehova kanambe ngwenyi, Kumungukasulisa chishima chino. Kechi kachita nawa ngwe chishima mu Izalele. Alioze amba kuli ayo ngwe, Matangwa hakundama, ni umanunwino wa usolwelo weswe.

²⁴ Mumu kukuchi kapwa nawa usolwelo wa mahuza, chipwe ngombo ya kupepieka mu munyachi wa Izalele.

²⁵ Alioze yami Yehova munguhanjika liji lize munguhanjika, mba kumuchikapwa. Kuchichi kalaluka nawa, alioze ha matangwa a yenwene, akwa munyachi wa yihulia, munguhanjika lie liji, mungulilinga nawa. Chocho kanambe Mwene Yehova.

²⁶ Cheka nawa liji lia Yehova yiliza kuli yami ngwenyi,

²⁷ Mwana mutu, akwa munyachi wa Izalele kanambe ngwo, Usolwelo kanamono uchili wa ha matangwa a kulutwe chikolo; kanaprofeteza ha miaka ya kusuku.

²⁸ Kashika amba kuli ayo ngwe, Mwene Yehova kanambe ngwenyi, Nilimwe liji lia yami mulikalaluka nawa, alioze liji lize mungwamba, malilinga. Chocho kanambe Mwene Yehova.