Ezekiel 11 - MUKANDA USANDU WA ZAMBI 1975

¹ Spiritu yanguzundula, yangutwala ku chikolo cha zuwo lia Yehova cha ku Chivumbuko chize chatalikisa ku Chivumbuko. Kumanyi ku pito lia chikolo kunamana makumi aali a malunga ni malunga atano. Yingumona hakachi ko Jazania mwana Azure, ni Pelatia mwana Benaia, alemu hakachi ka atu.

² Aye yamba kuli yami ngwenyi, Mwana mutu, wano e malunga akutaka uhenge, nikuhana yiyulo yipi mu chihunda chino.

³ Kakwamba ngwo, Matangwa kanda achiheta a kutunga mazuwo. Chihunda chino chapwa ngwe lundeho, ni yetu tuli yifwo.

⁴ Kashika profeteza kulimika no. Profeteza, yena mwana mutu.

⁵ Mba Spiritu ya Yehova yahulumuka hali yami. Yangwamba ngwenyi, Amba ngwe, Yehova kanambe ngwenyi, Enu akwa munyachi wa Izalele, kumanyi nunanyongo chocho. Mumu yami ngunanyingika yuma yize yapalika mu manyonga jenu.

⁶ Hinwokesa afu a kushiha mu chihunda chino; hinwazalisa matapalo jacho ni afu.

⁷ Kashika Mwene Yehova kanambe ngwenyi, Afu jenu a kushiha, waze hinwalumbika hakachi kacho, o kapwa ye yifwo, ni chihunda chino lwe lundeho; alioze yenu manuchizamo.

⁸ Nwavwila woma katana, mba mungunukokela katana. Chocho kanambe Mwene Yehova.

⁹ Mungunuchizamo; mungunukunjika kuli tundaka; mungulinga upatwilo hali yenu.

¹⁰ Munukafwa ni katana. Mungukanusopesa ku njiza ja Izalele mba munukanyingika yami nguli Yehova.

¹¹ Chihunda chino kuchichi kapwa lundeho lwenu. Yenu kunuchi kapwa yifwo yamo. Alioze mungunusopesa ku njiza ja Izalele.

¹² Mba munukanyingika yami nguli Yehova mumu kunwendele nikulita ni yiyulo yami, kunwalingile nikulita ni shimbi jami, alioze hinwalinga nikulita ni shimbi ja mavungu aze ananujingilika.

¹³ Shimbu munguchiprofeteza, Pelatia mwana Benaia yafwa. Mba yami yingufulamana hashi nikuteta ni liji linene ngwami, Mwene Yehova! Unambe kumanununa e masalila ja A-Izalele nyi?

¹⁴ Liji lia Yehova yiliza kuli yami ngwenyi,

¹⁵ Mwana mutu, usoko we, we usoko we lume wa munyachi we, vungu lia Izalele eswe, e aze akwa Yerusaleme hanambe ngwo, O hanayi kusuku ni Yehova, kashika chifuchi chino hanatwehecho chihinga.

¹⁶ Kashika amba ngwe, Mwene Yehova kanambe ngwenyi, Chipwe naatwalile kusuku hakachi ka mavungu, chipwe naamwangine hakachi ka yifuchi, hindu hinapwa kuli ayo chiswamo ha shimbu lino mu yifuchi kuze ayile.

¹⁷ Kashika amba ngwe, Mwene Yehova kanambe ngwenyi, Mungukanukonga ku mavungu; mungukanuchiza ku yifuchi kuze hinwamwanganyina, mungukanwaha chifuchi cha Izalele.

¹⁸ Mba ha kuhetako makachizamo yuma yize yeswe ya kuvwisa kupiha, ni yuma yeswe ya lwaji.

¹⁹ Mba mungukaaha mbunge yaha; mungukasa Spiritu yaha muli ayo. Mungukachiza ku musunya wo mbunge jo ja mawe, mungukaaha mbunge ja musunya,

²⁰ hanga akende mu yiyulo yami, ni kufunga shimbi jami, nikujononokena. O kumakapwa atu jami, ni yami mungukapwa Zambi yo.

²¹ Alioze ha kutwala kuli waze ali ni mbunge ja kukaula yuma yo ya kuvwisa kupiha ni yuma yo ya lwaji, mungukafweta yitanga yo ha mitwe yo ene. Chocho kanambe Mwene Yehova.

²² Henaho akerupimi yazazulula mapulwa jo hamwe ni maroda ku malumbu, ni uhenya wa Zambi ya Izalele helu lio.

²³ Uhenya wa Yehova yiukatuka hakachi ka chihunda, yiumana ha mulundu uli sali lia chihunda ku Chivumbuko.

²⁴ Mba Spiritu yanguzundula, mu usolwelo yanguneha nawa kuli mwe Spiritu ya Zambi ndo ku chifuchi cha Kaletea kuli njize. Henaho usolwelo uze namwene wangwecha.

²⁵ Yingulweza njize yuma yize yeswe Yehova hangulweza.