Ezekiel 10 - MUKANDA USANDU WA ZAMBI 1975

¹ Yingutala, kumanyi mu kuzazuluka chize chapwile helu lia mitwe ya akerupimi chimwe chuma chasolokele helu lio kulifwa ngwe safwira, ni kupwa chacho ngwe ngunja.

² Aye yamba kuli lunga yoze wa mazalo a linyu ngwenyi, Njila hakachi ka maroda a kujingajinga mushi lia akerupimi uzalise moko je ni makala a kahia ka hakachi ka akerupimi ukaamwangine ha chihunda. Yanjila, ni yami ngunamono.

³ Achi akerupimi te kanamana sali lia zuwo lia kutalikisa ku Sule, ha kunjilamo mwe mutu, ni lelwa liazalishile yize ya muchima.

⁴ Mba muze uhenya wa Yehova hiwakatuka kuli akerupimi nikuya ku chikolo cha zuwo, zuwo liazalile ni lelwa ni yize yazalile ni kupanguka cha uhenya wa Yehova.

⁵ Ni chinumo cha mapulwa ja akerupimi achivwile ndo ku yize ya haze, ngwe liji lia Zambi Mukwa-Ndundo-Jeswe muze mahanjika.

⁶ Mba muze hatuma lunga yoze wa mazalo a linyu ngwenyi, Anda kahia hakachi ka maroda a kujingajinga hakachi ka akerupimi, aye yanjila, yamana hakamwihi ni roda, ku lumbu.

⁷ Mba umwe kerupimi yazoza kwoko lienyi hakachi ka akerupimi ku kahia kaze kali hakachi ka akerupimi, yandaho kamwe, yasa mu moko ja mukwa mazalo a linyu. Aye yakatambula, yatuhuka.

⁸ Akerupimi te kanasoloka kupwa ni kulifwa cha kwoko lia mutu mushi lia mapulwa jo.

⁹ Yingutala, kumanyi kwapwile maroda awana hakamwihi ni akerupimi; roda limwe kuli kerupimi, roda limwe kuli kerupimi. Kupwa cha maroda chapwile ngwe liwe lia turkeza.

¹⁰ Ha kutwala ku kusoloka cho, eswe ni awana asotokele chimuwika, ngwe roda muchima lia roda likwo.

¹¹ Ha kuya, yaya lieswe sali ni sali ku malumbu awana; kahambulukile ha kuya cho alioze kweswako roda litangu liatalikisa, akwo yakaula, ni kuhambuluka ka, ha kuya cho.

¹² Ni mijimba yo yeswe, ni manyima jo, ni moko jo, ni mapulwa jo, ni maroda, yeswe yazala ni meso kweswe kwa kujingilika, chipwe maroda aze o eswe ni awana ali no.

¹³ Ha kutwala ku maroda yaatongola mwe mu matwi jami ngwo, Maroda a kujingajinga.

¹⁴ Umwe ha umwe kali ni mahuma awana. Litangu te lia kerupimi; huma liamuchiali huma lia mutu; ni liamuchitatu huma lia ndumba; ni liamuchiwana huma lia pupa.

¹⁵ Akerupimi yazezuka. E akwa mwono wano te naamwene ku lwiji Chebare.

¹⁶ Ha kuya akerupimi maroda yaya nawa hamwe no; ni muze akerupimi hazazulula mapulwa jo akatuke hashi maroda kakondolokele ku lumbu lio.

¹⁷ Muze o amanyine ni wano amanyine nawa, ni muze o azezukile ni wano nawa azezukile hamwe no, mumu Spiritu ya akwa mwono te mwali muli ayo.

¹⁸ Mba uhenya wa Yehova yiukatuka ku chikolo cha zuwo, yiumana helu lia akerupimi.

¹⁹ Ni akerupimi yazazulula mapulwa jo, yakatuka hashi kumeso jami ha kuya, ni maroda hamwe no; yamana ku pito lia chikolo cha zuwo lia Yehova chatalikisa ku Chivumbuko; ni uhenya wa Zambi ya Izalele wapwile helu lio.

²⁰ Wano te e akwa mwono waze namwene mushi lia Zambi ya Izalele ku lwiji Chebare. Yingwanyingika ngwami, Akerupimi.

²¹ Mweswe te kali ni mahuma awana, ni mweswe kali ni mapulwa awana, ni mushi lia mapulwa jo ngwe kulifwa cha moko ja atu.

²² Ha kutwala ku kusoloka cha ku meso jo apwile e meso aze asotokele kuli yami ku lwiji Chebare. Eswe ayile ndusu kulutwe.