Ezekiel 1 - MUKANDA USANDU WA ZAMBI 1975

¹ Ha mwaka makumi atatu, ha kakweji wamuchiwana, ha tangwa liamuchitano lia kakweji, te nguli hakachi ka njize ku lwiji Chebare, malilu azulukile, mba yingumona usolwelo wa Zambi.

² Ha tangwa liamuchitano lia kakweji (ha mwaka wamuchitano wa unjize wa mwanangana Jehoachine)

³ liji lia Yehova yiliza kuli sasendote Ezekiel mwana Buzi, mu chifuchi cha A-Kaletea ku lwiji Chebare. Kwoko lia Yehova liapwile hali iye kokwene.

⁴ Shimbu munguchitala fuji yimwe ya kangonga yiyikatuka ku Norte, ni lelwa limwe linene lili ni pangu kweswe kwa kujingilika, ni kahia te kanahenyahenya, ni muchima lia kahia mwapwile ngwe unengu umwe unalejima.

⁵ Muchima lialio nwakatukile ngwe kulifwa cha akwa mwono awana. Kusoloka cho chapwile ngwe chino: kupwa cho ngwe cha mutu,

⁶ alioze mweswe te kali ni mahuma awana, ni mweswe kali ni mapulwa awana.

⁷ Molu jo analulama, yiliato yo yapwile ngwe yiliato ya ana-ngombe; yinapeyima ngwe unengu wa kucheka.

⁸ Mushi lia mapulwa jo ha malumbu jo awana kali ni moko ja mutu. E awana te kali ni meso jo ni mapulwa jo chocho:

⁹ mapulwa jo kalikwata limwe ni limwe; eswe yaya lume ndusu kulutwe, ni kuhambuluka ka, shimbu maya.

¹⁰ Ha kutwala ku kulifwa cha meso jo umwe ni umwe kali ni meso ja mutu. Eswe ni awana kali ni meso ja ndumba ha sali lia chindume; eswe ni awana kali ni meso ja ngombe ha sali lia chimeso; eswe ni awana kali ni meso ja pupa.

¹¹ Chocho apwile ku meso jo. Mapulwa jo aazazulwile kwilu. Mweswe hakachi ko kali ni mapulwa aali a kukwata ku mapulwa ja mukwo, shimbu akwo aali anafuku mijimba yo.

¹² Mweswe hakachi ko wayile ndusu kulutwe. Kweswako Spiritu yazanga kuya, yaya lume ni kuhambuluka ka, shimbu maya.

¹³ Hakachi ka akwa mwono, kupwa cho chapwile ngwe makala a kahia, ngwe masoka a kahia nikulihiza hakachi ka akwa mwono. Kahia kapwile ka tachi, mba mwe mu kahia mwatuhukile mihenyo.

¹⁴ Ni e akwa mwono atambukile kweka ni kweka ngwe kuhenya cha njaji.

¹⁵ Shimbu munguchitala e akwa mwono, yingumona ha mavu ku lumbu lia akwa mwono, mweswe wa kuli awana kali ni roda limuwika.

¹⁶ Ha kutwala ku maroda ni chize haalinga kusoloka cho chapwile ngwe cha turkeza, eswe ni awana chimuwika apwile. Haalinga ngwe roda muchima lia roda.

¹⁷ Ha kuya, yaya lieswe sali ni sali ku malumbu awana; ha kuya kahambulukile.

¹⁸ Maroda awana eswe apwile ni majingo asuku, kole ni mwongo, ni majingo apwile a tò ni meso kwa kujingilika.

¹⁹ Ha kwenda akwa mwono, e maroda endele hamwe no; mba muze akwa mwono azundukile hashi maroda azundukile.

²⁰ Kweswako Spiritu yatalikisa o yaya, ni maroda azundukile hamwe no, mumu Spiritu ya akwa mwono te mwali mu maroda.

²¹ Ha kwenda wawa, ni wano nawa endele. Ha kumana wawa, ni wano nawa amanyine. Ha kuzunduka hashi wawa; ni maroda nawa azundukile hamwe no mumu Spiritu ya akwa mwono mwali te mu maroda.

²² Helu lia mitwe ya akwa mwono hapwile ngwe kuzazuluka cha mwilu, ni kuhenya ngwe kristale kuzazuluka helu lia mitwe yo.

²³ Mba mushi lia kuzazuluka chize, mapulwa jo kanaazazulula limwe kuli likwo ni likwo, mba mukwa mwono mweswe te kali ni mapulwa aali a kufuka no mujimba wenyi.

²⁴ Ha kwenda cho nevwile kunuma cha mapulwa jo ngwe Chizungozungo cha meya anji, ngwe kukulunguza cha Mukwa-Ndundo-Jeswe, Chizungozungo ngwe kuchungula cha chihuji chinene. Ha kumana, o yatula mapulwa jo.

²⁵ Ku kuzazuluka helu lia mitwe yo kwatuhukile liji. Ha kumana, yatula mapulwa jo.

²⁶ Helu lia kuzazuluka chize chapwile ha mitwe yo hapwile ngwe kulifwa cha ngunja nikusoloka ngwe safwira. Mba kutwama helu lia kulifwa cha ngunja kwapwile ngwe kulifwa cha kupwa cha mutu.

²⁷ Chize ku kulifwa cha mashina ja molu jenyi helu namwene ngwe unengu wa kulejima ngwe kulifwa cha kahia cha kujingilika kweswe. Chize ku kulifwa cha mashina ja molu jenyi kushi namwene ngwe kulifwa cha kahia. Ni kweswe kwa kumujingilika kwapwile kupanguka.

²⁸ Kulifwa cha pangu lize liajingilikile chapwile ngwe kongolo yoze uli mu lelwa ha tangwa lia vula. Chocho chapwile kusoloka cha kulifwa cha uhenya wa Yehova. Ha kuumona nafulamanyine hashi; mba nevwile liji lia umwe kanahanjika.