Estere 9 - MUKANDA USANDU WA ZAMBI 1975

¹ Ha kakweji kumi ni wamuchiali (Adare), ha tangwa kumi ni liamuchitatu muze liji lia mwanangana ni shimbi yenyi yakundama kuyilinga; ha tangwa akwa kole ja A-Yunda anyongene kwayula alioze chalumukine ayulile hali akwa kole jo,

² ha kukundama tangwa liacho A-Yunda akungulukile hamuwika mu yihunda yo ndusu yifuchi yeswe ya mwanangana Ahashueru, akalikwate ni waze ambile kwapinjisa. Niumwe wahashile kulitachika no ni mumu atu eswea avwilile woma.

³ Alemu eswe a mu yifuchi, ni akwa kuyula, ni anguvulu, ni akwa kulingila mwanangana o eswe akwashile A-Yunda, mumu evwilile woma Mordekai.

⁴ Mumu Mordekai wapwile munene mu zuwo lia mwanangana ni lufuma wenyi wayile ndusu mu yifuchi yeswe se mwe lunga Mordekai yaya nikuliwezela unene.

⁵ A-Yunda yalamba akwa kole jo eswe ni katana, ni kwashiha ni kwanongesa. Yalinga cheswacho chaawahila kuli akwa kole jo.

⁶ Mu mbala ya Shushane A-Yunda yashiha kulakaji atano a malunga ni kwakuwisa.

⁷ Parshandata, ni Dalfone, ni Asapata,

⁸ ni Porata, ni Adalia, ni Aridata,

⁹ ni Parmasa, ni Arisai, ni Aridai, ni Vaizata,

¹⁰ wano kumi lia ana a malunga a Hamane mwana Hamedata mukwa kole wa A-Yunda, yaashiha. Alioze ku upite kakwachileko.

¹¹ Ha tangwa lize yaneha kuli mwanangana kwalula cha waze haashiha mu mbala ya Shushane.

¹² Mwanangana yamba kuli mwazovu Estere ngwenyi, A-Yunda hashiha ni kukuwisa kulakaji atano a malunga mu mbala ya Shushane hamwe ni kumi lia ana a Hamane a malunga. Nyi chocho kuchi halinga mu yifuchi yikwo ya mwanangana? Haliapwila yika unazange, mungukwahacho? Chika unechi mba munguchilinga?

¹³ Estere yamba ngwenyi, Nyi chinapemena mwanangana atayize kama A-Yunda a mu Shushane alinge hamene chizechene ngwe shimbi ya musono, asukike nawa e ana a Hamane a malunga eswe kumi ha mitondo.

¹⁴ Mwanangana yatuma akachilinge. Yahana shimbi mu Shushane mba yasukika e kumi lia ana a Hamane a malunga.

¹⁵ Ni A-Yunda aze apwile mu Shushane yalikungulula hamuwika ha tangwa kumi ni liamuchiwana lia kakweji ka Adare, yashiha kulakaji atatu a malunga mu Shushane, alioze ku upite kakwachileko.

¹⁶ A-Yunda akwo aze apwile mu yifuchi ya mwanangana yalikungulula akalilamwine mwono. Mba yapwa ni uhwimino kuli akwa kole jo mumu ashihile makumi shimbiali a tununu ni tununu atano a waze aavwilile kole. Alioze ku upite kakwachileko.

¹⁷ Alingile chino ha tangwa kumi ni liamuchitatu lia kakweji Adare mba ha tangwa kumi ni liamuchiwana yahwima nikusela tangwa lize likapwe lia kulia ni kuwahilila.

¹⁸ Alioze A-Yunda a mu Shushane alikungulwile ha tangwa kumi ni liamuchitatu ni liamuchiwana mba ha tangwa kumi ni liamuchitano yahwima ni kusela tangwa lize likapwe lia kulia ni kuwahilila.

¹⁹ Kashika A-Yunda a mu yihunda yikepe, waze atwama mu yihunda kuyishi yipanga-ya-mawe o kakusela tangwa kumi ni liamuchiwana lia kakweji ka Adare tangwa lia chiseke, ni kulia, ni kuwaha; tangwa lia kutuma yawana umwe kuli mukwo ni mukwo.

²⁰ Mordekai yasoneka yino yuma; yatuma mikanda kuli A-Yunda eswe a mu yifuchi yeswe ya mwanangana Ahashueru, ni hakamwihi ni kusuku,

²¹ akafunge tangwa lia kumi ni liamuchiwana ni kumi ni liamuchitano lia kakweji ka Adare mwaka ha mwaka.

²² Mumu e matangwa A-Yunda awanyine uhwimino kuli akwa kole jo. Mwe kakweji walumwine chinyengo chikapwe chiseke, ni tangwa lia kulinyenga mu tangwa lia kuwaha. Ngwenyi, Asele matangwa ano matangwa a kulia ni chiseke, ni a kutuma yihanda umwe kuli mukwo ni mukwo, ni yawana kuli yiswale.

²³ A-Yunda yalilakenya kulinga chizechene ngwe haputuka ni chizechene ngwe Mordekai hasoneka kuli ayo,

²⁴ mumu Hamane mwana Ka-Agage, Hamedata, mwe mukwa kole kuli A-Yunda eswe watakile kukuwisa A-Yunda, mba yataha ngombo ya Puru akaakuwise ni kwanongesa.

²⁵ Alioze muze chuma chahetele kuli mwanangana aye yatuma shimbi mu mikanda hanga kutaka chino chipi Hamane atakila A-Yunda chikahiluke ha mutwe wenyi mwene, hanga iye ni anenyi a malunga akaasukike ha mitondo.

²⁶ Kashika yaluka matangwa aze ngwo, Purime, mumu ha jina lia Puru. Kashika mumu ha maliji eswe a mukanda uno ni ha yize hamona ya chikuma chino, ni yize yaawana.

²⁷ A-Yunda asele shimbi, ni kulilakenya ene ni minyachi yo ni waze eswe malifutula no, akafunge wano matangwa aali nikulita ni sona jacho ha kangonde wa kufunjika mwaka ha mwaka kuchina muchihona.

²⁸ Ngwo, Chatamba kwiwuluka wano matangwa ni kwafunga ndusu yisemuko yeswe ni munyachi weswe, ni chifuchi cheswe, ni chihunda cheswe, matangwa wano a Purime kanda ahona hakachi ka A-Yunda, hanga kwewuluka kanda chikatoka hakachi ka minyachi yo.

²⁹ Mwazovu Estere mwana Abihele ni mwe Ka-Yunda Mordekai yasoneka ni shimbi akakolese mukanda uno wamuchiali wa Purime.

³⁰ Mordekai yasoneka mikanda kuli A-Yunda eswe mu kulakaji ni makumi aali a yifuchi ni yifuchi shimbiali ya wanangana wa Ahashueru kwatumina maliji a sambukila ni umwenemwene,

³¹ kukolesa matangwa ano a Purime ha kangonde wa kufunjika nikulita ni liji lize Ka-Yunda Mordekai ni mwazovu Estere haaha, no halilakenya hali ene ni ha minyachi yo ha chikuma cha kulitwamina kulia ni muteto wo.

³² Liji lia Estere liakolesele yuma yino ya Purime, kashika yayisoneka mu mukanda.