Estere 8 - MUKANDA USANDU WA ZAMBI 1975

¹ Ha tangwa lize mwanangana Ahashueru yahana yeswe ya Hamane mukwa kole wa A-Yunda kuli mwazovu Estere. Mordekai yeza kumeso ja mwanangana mumu Estere hamulweza chize apwa kuli iye.

² Mwanangana yachiza kazeya kenyi yoze hatambula kuli Hamane; yamuhana kuli Mordekai. Mba Estere yasela Mordekai helu lia yuma ya Hamane.

³ Estere yahanjika cheka nawa kuli mwanangana nikufulamana ku yiliato yenyi, nikulembelela ni masoji akachize shimbi jipi ja Ka-Agage Hamane, ni kutaka chenyi chize atakile cha kulimika ni A-Yunda.

⁴ Mwanangana yazoza kuli Estere lukanda wa oru. Chocho Estere yakatuka; yamana kumeso ja mwanangana.

⁵ Yamba ngwenyi, Nyi chinawahila mwanangana kachi hinawana vumbi kumeso jenyi, ni che chikuma Chinalulama kuli mwanangana, ni yami ngunapeme kumeso jenyi asoneke kwalumuna mikanda yize asonekene kuli Hamane mwana Ka-Agage Hamedata yize asonekene akakuwise A-Yunda aze ali mu yifuchi yeswe ya mwanangana,

⁶ mumu kuchi munguhasa kumona chipi chino muchiza hali atu jami? Kuchi munguhasa kumona kunonga cha chisemuko chami?

⁷ Mba mwanangana Ahashueru yamba kuli mwazovu Estere ni Ka-Yunda Mordekai ngwenyi, Hinahana kuli mwazovu Estere yuma ya Hamane ni mwene hinamusukika ha mutondo mumu hasa kwoko lienyi hali A-Yunda.

⁸ Sonekenu nawa kuli A-Yunda, chize chanupemena mu jina lia mwanangana, nukachijikile ni kazeya ka mwanangana. Mumu shimbi ja kusoneka mu jina lia mwanangana nikujikila ni kazeya ka mwanangana niumwe mahasa kujalumuna.

⁹ Henaho yasanyika akwa kusonyeka a mwanangana, ha kakweji wamuchitatu (Sivane), ha tangwa makumi aali ni wamuchitatu. Yasoneka nikulita ni liji lia Mordekai kuli A-Yunda, ni kuli akwa kuyula, ni anguvulu, ni alemu a mu yifuchi, chize ku India ndo ku Etiopia—kulakaji ni makumi aali a yifuchi ni yifuchi shimbiali. Yasoneka ku yifuchi yeswe nikulita ni sona jako; kuli atu eswe nikulita ni limi lio; kuli A-Yunda nikulita ni sona jo ni limi lio.

¹⁰ Yasoneka mu jina lia mwanangana Ahashueru ni kujikilaho ni kazeya ka mwanangana. Yatuma mikanda mu moko ja mikeji hali tuvwalu a tambu a ku milimo ya mwanangana, te a kusema kuli tuvwalu a wanangana.

¹¹ Mu mikanda mwanangana yatayiza A-Yunda mu yihunda yeswe kulikungulula hamuwika nikulilamwina mwono; akakuwise, akashihe, akanongese tachi jeswe ja atu ni chifuchi waze meseka kwapinjisa, hamwe ni ana jo ni mapwo jo; akatambule upite wo wa kupunda.

¹² Akachilinge ha tangwa limuwika mu yifuchi yeswe ya mwanangana Ahashueru—ngwo ha tangwa kumi ni liamuchitatu lia kakweji kumi ni wamuchiali (Adare).

¹³ Yaweza kusoneka nawa ngwo, Shimbi yino ayambujole mu yifuchi yeswe nikuyituma kuli atu eswe, hanga A-Yunda akalilulike ha tangwa lize kulikala hali akwa kole jo.

¹⁴ Chocho kwatuhukile mikeji aze akwenda hali tuvwalu a tambu a ku milimo ya mwanangana, se haatambwisa ni kwashinjika ni liji lia mwanangana. Ni ye shimbi ayihanyine mu mbala ya Shushane.

¹⁵ Mordekai aye yakatuka kumeso ja mwanangana ni mazalo a wanangana alauluka ni atoma ni chipangula chinene cha oru, ni hina lia ngungu lia linyu lipema ni lia ufungo. Ni akwa chihunda cha Shushane yalikwiza ni chiseke.

¹⁶ A-Yunda o apwile ni pangu, ni chiseke, ni uwahililo, ni ulemu.

¹⁷ Ni mu yifuchi yeswe ni yihunda yeswe kuze kwahetele liji lia mwanangana ni shimbi yenyi A-Yunda apwile ni chiseke, ni uwahililo, ni yiteleka, ni tangwa lia kuwaha. Anji a kuli mavungu a chifuchi alumukine A-Yunda mumu apwile ni woma wa A-Yunda.