Estere 7 - MUKANDA USANDU WA ZAMBI 1975

¹ Chocho mwanangana ni Hamane yeza ku chiteleka cha mwazovu Estere.

² Mba mwanangana yamba cheka nawa kuli Estere ha tangwa liamuchiali lia chiteleka cha vinyu ngwenyi, Mwazovu Estere, chize unazange chika? Mungukwahacho. Chize unechi chika? Mungukulingilacho ndo ku chihanda cha ha muchima cha wanangana.

³ Mwazovu Estere yakumbulula ngwenyi, Nyi hinawana vumbi kumeso ja yena mwanangana, nyi chakupemena mwanangana, ungwehe mwono wami ha kwita ni wa atu jami ha kulemba.

⁴ Mumu hanatulanjisa, yami ni atu jami, akatukuwise, akatushihe, akaanongese. Nyi kachi atulanjishile tukapwe ndungo ja malunga ni a mapwo, kachi chahanjikile, chipwe mwe mukwa kole kahashile kukungulula kuli mwanangana kufulwa chino.

⁵ Henaho mwanangana Ahashueru yamba kuli mwazovu Estere ngwenyi, Yoze mahasa kuhamuka kutaka chuma chino mu mbunge yenyi iya? Kuli atwama?

⁶ Estere ngwenyi, Umwe mukwa kulimika, umwe mukwa kole; yono mwene chingulungulu Hamane. Aho Hamane hevwa woma kumeso ja mwanangana ni mwazovu.

⁷ Mwanangana yakatuka ku chiteleka cha vinyu ni ufwatulo; yaya ku jardine ya zuwo lia mwanangana: mba Hamane yamana kulembelela kuli mwazovu Estere ha mwono wenyi, mumu kananyingika ngwenyi, Mwanangana kanambe kungulinga chipi.

⁸ Mwanangana yakatuka ku jardine ya zuwo lia mwanangana yanjila nawa ku chiteleka cha vinyu. Kumanyi Hamane halimbilila ku muu haze Estere kanatwama. Kashika mwanangana yamba ngwenyi, Te kanafupu kulumbula mwazovu kwe kumeso jami mu zuwo nyi? Shimbu liji mulituhuka mu kanwa lia mwanangana afukile meso ja Hamane.

⁹ Mba Harabona, umwe wa tuvumbi kumeso ja mwanangana yamba ngwenyi, Tala mutondo wa makumi atano a mbandu Hamane walulikanga hali Mordekai yoze wahanjikile chipema hali mwanangana, unamana ku zuwo lia Hamane. Mwanangana ngwenyi, Musukikenuho!

¹⁰ Chocho yasukika Hamane ha mutondo iye te halulika hali Mordekai. Mba ufwatulo wa mwanangana yiutula.