Estere 6 - MUKANDA USANDU WA ZAMBI 1975

¹ Ha ufuku uze mwanangana wapwile ni chipundu. Yatuma amunehene mukanda wa kusoneka Sango mba yajitanga kuli mwanangana.

² Yachiwana cha kusoneka ngwe Mordekai wambulwile Bigatani ni Tereshe tuvumbi twa mwanangana, akwa kufunga mapito. O te afupile kushiha mwanangana Ahashueru.

³ Mwanangana ngwenyi, Kuchi alinga kama ni Mordekai kumulemesa hanji kumuchichimieka ha chuma chino? Tuvumbi twa mwanangana waze amulingilile ngwo, Kamulingilile nichimwe.

⁴ Mwanangana yamba ngwenyi, Iya uli mu yize? Achi Hamane machinjila mu yize ya haze lia zuwo lia mwanangana akahanjike ni mwanangana akasukike Mordekai ha mutondo uze hanaululikila.

⁵ Tuvumbi twa mwanangana yamba ngwo, Hamane kanamana mu yize. Mwanangana ngwenyi, Anjile.

⁶ Chocho Hamane yanjila. Mwanangana yamuhula ngwenyi, Kuchi chatamba kulinga kuli lunga yoze mwanangana kanawahilila kumulemesa? Hamane yamba mu mbunge yenyi ngwenyi, Mwanangana iya mawahilila kulemesa shina yami mwene?

⁷ Kashika Hamane yamba kuli mwanangana ngwenyi, Kali tanga yoze mwanangana kanawahilila kumulemesa,

⁸ anehe mazalo a wanangana aze mwanangana kakuzala, ni kavwalu yoze mwanangana kakwendelaho, yoze uli ni chipangula cha wanangana ha mutwe wenyi.

⁹ Akunjike mazalo ni kavwalu kuli umwe wa alemu aze ahiana a mwanangana akajike mwe lunga yoze mwanangana kanawahilila kumulemesa; akamwendese ha kavwalu ku tapalo lia chihunda nikutambika mutambi kulutwe lienyi ngwo, Chocho kakulinga kuli tanga yoze mwanangana kanawahilila kumulemesa.

¹⁰ Mba mwanangana yamba kuli Hamane ngwenyi, Tambuka Ukande mazalo ni kavwalu ngwe hiwamba ukalinge chizechene kuli Ka-Yunda Mordekai yoze watwama ku chikolo cha mwanangana. Nichimwe chuma kanda chikahona ku yuma yize yeswe hiwamba.

¹¹ Henaho Hamane yanda mazalo ni kavwalu; yajika Mordekai; yamwendesa ndusu tapalo lia chihunda nikutambika mutambi ngwenyi, Chocho malinga kuli tanga yoze mwanangana kanawahilila kumulemesa.

¹² Mordekai yeza nawa ku chikolo cha mwanangana alioze Hamane yachinyina ku zuwo lienyi nikulinyenga ni mutwe wenyi wa kufuka.

¹³ Hamane yambulwila pwo lienyi Zereshe ni masepa jenyi eswe yuma yize yeswe yamuwana. Mba akwa mana jenyi ni pwo lienyi Zereshe yamba kuli iye ngwo, Nyi Mordekai, yono haputuka kukulimbula, wapwa wa vungu lia A-Yunda kuchi kuhasa kumukumba. Pundu mulimbuka kumeso jenyi.

¹⁴ Shimbu machihanjika nenyi tuvumbi twa mwanangana yeza akatambwise Hamane ku chiteleka chize Estere halulika.