Estere 5 - MUKANDA USANDU WA ZAMBI 1975

¹ Ha tangwa liamuchitatu Estere yazala mazalo jenyi a wanangana; yamana mu yize ya muchima ya zuwo lia mwanangana hatalanganyi ni zuwo lia mwanangana. Mwanangana aye te kanatwama ha ngunja yenyi ya wanangana mu zuwo lia wanangana hatalanganyi ni chikolo cha zuwo.

² Muze mwanangana hamona mwazovu Estere kumana mu yize yamuvwila vumbi mba mwanangana yazoza kuli Estere lukanda wa oru mu kwoko lienyi. Mba Estere yakundama; yasa kwoko lienyi ha shina lia lukanda.

³ Mwanangana yamba kuli iye ngwenyi, Yika unafupu mwazovu Estere? Chize unechi chika? Mungukwahacho ndo ku chihanda cha ha muchima cha wanangana.

⁴ Estere yamba ngwenyi, Nyi chinakupemena, ngunazange mwanangana ni Hamane eze musono ku chiteleka hinamululikila.

⁵ Mwanangana yamba ngwenyi, Ambulwilenu Hamane atambuke chikapwe ngwe Estere hamba. Chocho mwanangana ni Hamane yeza ku chiteleka Estere halulika.

⁶ Mwanangana yamba kuli Estere ku chiteleka cha vinyu ngwenyi, Chize unazange chika? Mungukwahacho. Chize unechi chika? Ndo ku chihanda cha ha muchima cha wanangana munguchilinga.

⁷ Estere yakumbulula ngwenyi, Chize ngunazange; chize ngunechi, ngwami,

⁸ nyi hinawana vumbi kumeso ja mwanangana, nyi chinawahila mwanangana kungwaha chize ngunazange ni ku-linga chize ngunechi, mwe mwanangana ni Hamane eze ku chiteleka chize mungwalulikila mba hamene mungulinga chize mwanangana hamba.

⁹ Kashika Hamane yatuhuka tangwa lize ni chiseke ni uwahililo mu mbunge. Alioze ha kumona Mordekai mu chikolo cha mwanangana kakatukile kuli iye chipwe kulisunga, Hamane yavwila Mordekai ufwatulo wunji.

¹⁰ Hindu Hamane yasula; yaya ku zuwo lienyi. Yasaka masepa jenyi ni pwo lienyi Zereshe.

¹¹ Hamane yaambulwila uhenya wa upite wenyi, ni kulumbama cha ana jenyi ni yuma yize mwanangana hamusenyesa nayo, ni chize hamuhianyisa helu lia alemu ni tuvumbi twa mwanangana.

¹² Hamane yaweza nawa ngwenyi, Chipwe mwazovu Estere katayijile niumwe lunga shina yami wika kunjila hamwe ni mwanangana ku chiteleka chize alulikanga. Ni hamene nawa hangulakenya hamwe ni mwanangana.

¹³ Hindu chino cheswe chamokomoko shimbu ngunamono yono Ka-Yunda Mordekai kanatwama mu chikolo cha mwanangana.

¹⁴ Pwo lienyi Zereshe ni masepa jenyi eswe yamba kuli iye ngwo, Lulika mutondo wa makumi atano a mbandu, mba hamene chimene hanjika ni mwanangana akasukikeho Mordekai; mba muhasa kunjila ni chiseke hamwe ni mwanangana ku chiteleka. Che chuma yichiwahila Hamane, mba yatalikisa mutondo.