Estere 4 - MUKANDA USANDU WA ZAMBI 1975

¹ Ha kunyingika yino yeswe halinga, Mordekai yasonya mazalo jenyi, yazala chikeleyi ni uto, yaya hakachi ka chihunda nikulila ni muteto unene usasu.

² Yeza ndo kulutwe lia chikolo cha mwanangana mumu niumwe mahasa kunjila mu chikolo cha mwanangana ni chikeleyi.

³ Mu yifuchi yeswe kweswako liji lia mwanangana ni shimbi yenyi yahetele yikupwa kulinyenga chinene hakachi ka A-Yunda ni kulitwamina kulia, ni kulila, ni mbimbi. Anji yapomba ni yikeleyi ni uto.

⁴ Tuvumbi twa mapwo twa Estere ni a malunga yeza, yamulwezacho mba mwazovu yevwa chinyengo chinji. Yatuma mazalo a kujika Mordekai amuchize chikeleyi alioze kaatambwile.

⁵ Mba Estere yasanyika Hataka, umwe wa tuvumbi twa mwanangana, aye hasela kulingila Estere. Yamutuma kuli Mordekai anyingike chize chapwile ni che chikuma.

⁶ Kashika Hataka yaya kuli Mordekai ha lwaza wa chihunda, yoze uli kulutwe lia chikolo cha mwanangana.

⁷ Mordekai yamulweza yize yeswe hiyamuwana, ni ndando ya pundu yize Hamane halilakenya kufweta ku upite wa mwanangana hali A-Yunda akaakuwise.

⁸ Chikwo nawa yamwaha papilo ya kusoneka ni ye shimbi yize hasa mu Shushane akaakuwise, hanga ayilweze kuli Estere amulumbunwineyo. Yamwamba nawa anjile kuli mwanangana, akalembelele kuli iye ni kumwita hali atu jenyi.

⁹ Hataka yeza; yambulwila Estere maliji a Mordekai.

¹⁰ Mba Estere yahanjika ni Hataka, yamutuma kuli Mordekai akambe ngwenyi,

¹¹ Tuvumbi eswe a mwanangana ni atu a mu yifuchi ya mwanangana kananyingika ngwo, Mweswe manjila kuli mwanangana mu yize ya muchima kamusanyikine, shimbi yimuwika yiliko hali iye, apwe lunga apwe pwo, mamushiha; ndo yoze wika mwanangana mamwolwela lukanda wenyi wa oru akatwame ni mwono. Alioze makumi atatu a matangwa hapalika kangusanyikine kunjila kuli mwanangana.

¹² Maliji a Estere yaatwala kuli Mordekai.

¹³ Mordekai yaatuma ni kumbululo kuli Estere ngwenyi, Kanda unyonga mu mbunge ye ngwe, Yami wika hakachi ka A-Yunda eswe chichi kufwa mumu nguli mu zuwo lia mwanangana.

¹⁴ Mumu nyi yena muhola kwe kulungunga haliapwila ulamwino ni upulwilo muusoloka kuli A-Yunda kumwe kuma kweka, alioze yena ni akwa munyachi wa tatenu makuwa. Chikwo nawa, kwiji; hanji ha ola yino akuselele mu wanangana.

¹⁵ Henaho Estere yaatuma kutwala kumbululo kuli Mordekai ngwenyi,

¹⁶ Yako ukungulule A-Yunda eswe a mu Shushane alitwamine kulia hali yami. Kanda alia, kanda anwa matangwa atatu chipwe ufuku chipwe mwalwa. Ni yami ni tuvumbi twami twa mapwo mutulitwamina kulia chizechene mba chocho mungunjila kuli mwanangana. Acho kuchalitele ni shimbi, alioze nyi mungufwa, mungufwa, kwahwa.

¹⁷ Chocho Mordekai yaya kwenyi. Yalinga nikulita ni shimbi yeswe ya Estere.