Estere 3 - MUKANDA USANDU WA ZAMBI 1975

¹ Kulutwe lia yino yuma mwanangana Ahashueru yalemesa Hamane mwana Ka-Agage Hamedata. Yamusenyesa kulutwe; yasa chitwamo chenyi helu lia alemu eswe aze apwile no.

² Tuvumbi eswe a mwanangana, aze apwile mu chikolo cha mwanangana, ahetamine nikuwayila Hamane: mumu mwanangana hamusela shimbi chocho. Alioze Mordekai kahetamine, chipwe kumuwayila.

³ Henaho tuvumbi twa mwanangana, waze apwile mu chikolo chenyi, yamba kuli Mordekai ngwo, Kuchi te wakutangula shimbi ja mwanangana?

⁴ O yamwambacho tangwa ha tangwa, aye kaapanjikile, kashika yalweza Hamane achitale nyi liji lia Mordekai mulikola mumu haalweza ngwenyi, Nguli Ka-Yunda.

⁵ Ha kumona Mordekai kahetamine, chipwe kumuwayila, Hamane yatenuka chikolo.

⁶ Hindu kazangile kushiha Mordekai ukawenyi, mumu hamulweza vungu lia Mordekai: kashika Hamane wafupile kukuwisa A-Yunda eswe ndusu mu wanangana weswe wa Ahashueru, se o atu ja Mordekai.

⁷ Ha kakweji mutangu, (Nisane) ha mwaka kumi ni wamuchiali wa mwanangana Ahashueru, apwile ni kutaha ngombo ya Puru kumeso ja Hamane tangwa ha tangwa, kakweji ha kakweji, ndo ha kakweji kumi ni wamuchiali (Adare).

⁸ Mba Hamane yamba kuli mwanangana Ahashueru ngwenyi, Vungu limwe linamwangana hakachi ka yifuchi yeswe ya chiyulo chenu ni kulichinga ni mavungu akwo. Shimbi jo jalipwila ni shimbi ja mavungu eswe, chipwe shimbi ja mwanangana kajifungile. Kashika kuchatambile mwanangana kwatayiza.

⁹ Nyi chinanuwahila, achisoneke aakuwise, mba yami mungufweta kumi lia tununu twa *talentu ja prata kuli akwa kulingila mwanangana ajise mu mazuwo ja upite wa mwanangana.

¹⁰ Mwanangana yachiza kazeya ku kwoko lienyi, yamuhana kuli Hamane mwana Ka-Agage Hamedata mukwa kole wa A-Yunda.

¹¹ Mwanangana yamba kuli Hamane ngwenyi, Prata ngunakweheyo ni e atu nawa, ukalinge no cheswacho chinakupemena.

¹² Henaho ha tangwa kumi ni liamuchitatu lia kakweji mutangu yasanyika akwa kusonyeka a mwanangana. Yasoneka nikulita ni yize yeswe Hamane wazangile kutuma kuli akwa kuyula ja mwanangana, ni kuli nguvulu ja yifuchi, ni kulu alemu ja mavungu eswe. Yatuma ku yifuchi yeswe nikulita ni sona jacho, ni vungu lieswe nikulita ni limi lialio. Yasoneka mu jina lia mwanangana Ahashueru nikuchijikila ni kazeya ka mwanangana.

¹³ Yatuma mikanda ni mikeji ku yifuchi yeswe ya mwanangana akakuwise, akashihe, akanongese A-Yunda eswe ni twanuke ni makulwana, ni ana a kemba ni mapwo, ha tangwa limuwika, lie tangwa kumi ni liamuchitatu lia kakweji kumi ni wamuchiali (Adare) akatambule upite wo wa kupunda.

¹⁴ Yaweza kusoneka nawa ngwo, Shimbi yino ayambujole mu yifuchi yeswe, yayituma kuli atu eswe akafunge tangwa liacho.

¹⁵ Mikeji yaya fuji nikulita ni liji lia mwanangana, ni shimbi yayifumanyisa mu mbala ya Shushane. Mwanangana ni Hamane yatwama mukunwa alioze chihunda cha Shushane yichilifwita nacho.