Estere 2 - MUKANDA USANDU WA ZAMBI 1975

¹ Kulutwe lia yino yuma muze ufwatulo wa mwanangana Ahashueru hiwatula, yewuluka Vashti ni chize halinga, ni chize hamuyula.

² Kashika tuvumbi twa mwanangana aze amulingilile yamba ngwo, Afupile mwanangana amwe ana-mapwo apema *avirgem.

³ Mwanangana akatongole mu yifuchi yeswe ya chiyulo chenyi yilolo amwe akakungulule ana-mapwo eswe apema *avirgem kwimbo ku Shushane mu zuwo lia mapwo. Akaakunjike kuli Hegai kavumbi ka mwanangana mukwa kufunga mapwo; akaahe yuma yo ya kulipemesa nayo.

⁴ Mba mwana-pwo yoze mawahila mwanangana akapwe mwazovu kusalakana Vashti. Chuma chino Chawahililile mwanangana; yachilinga.

⁵ Kwapwile umwe Ka-Yunda mwimbo mu Shushane jina lienyi Mordekai mwana Njaire, mwana Shimei, mwana Kishi Ka-Mbenjamine,

⁶ aye amuchijile te ku Yerusaleme hamwe ni funge aze ambachile ni Jekonia mwanangana wa Yunda yoze te Nabukanezore mwanangana wa Babilonia ambachile.

⁷ Mordekai walelele Hadasa, (mwe Estere au) mwana wa pwo wa natu yenyi. Mwana-pwo keshi tato ni naye, chileza mupema chikolo; mba muze tato ni naye hafwa Mordekai wamutambwile akapwe mwanenyi mwene.

⁸ Chocho chapwile, muze evwile liji ni shimbi ya mwanangana ni ana-mapwo anji aakungulwile mwimbo lia Shushane akaahinge kuli Hegai, ni mwe Estere amutwalile ku zuwo lia mwanangana kuli Hegai kafunga ka mapwo.

⁹ Mwe mwana-pwo yamuwahila chikolo, yamulinga vumbi. Yamwaha nikawashi yuma yenyi ya kulipemesa nayo hamuwika ni kulia chenyi, ni tuvumbi twenyi shimbiali waze chaatamba kumwaha a ku zuwo lia mwanangana; mba yamututulula ku yipatulo yize yahiana kupema mu zuwo lia mapwo.

¹⁰ Estere te kanda achisolola vungu lienyi hanji chisemuko chenyi mumu Mordekai hamwaha shimbi kanda achisolola.

¹¹ Ni Mordekai tangwa ha tangwa wendele kulutwe lia yize ya zuwo lia mapwo anyingike nyi Estere kanahinduka ni kuchi anapu.

¹² Achi muze tangwa lia umwe mwana-pwo hiliaheta lia kunjila kuli mwanangana Ahashueru, muze hamulinga nikulita ni shimbi ja mapwo kumi lia tukweji ni tukweji aali (mumu matangwa a kwapemesa chocho apwile; tukweji asambano ni maji a mira, ni tukweji asambano ni tumbuto twa lupembo mupema hamwe ni yuma yize ya kupemesa mapwo),

¹³ muze halinga yino mwana-pwo manjila kuli mwanangana mba cheswacho mazanga mamwahacho akatuke nacho ku zuwo lia mapwo anjile mu zuwo lia mwanangana.

¹⁴ Ha ngoloshi manjila mba ha kucha mahiluka ku zuwo liamuchiali lia mapwo akamutunge kuli Shashagaji kavumbi ka mwanangana mukwa kufunga *akonkubina. Kechi kunjila nawa kuli mwanangana ndo mwanangana mamuzanga chikolo nikumusanyika ha jina lienyi.

¹⁵ Muze tangwa lia Estere mwana Abihele natu ya Mordekai yoze atambwile kupwa mwanenyi hiliaheta kunjila kuli mwanangana kechile nichimwe shina chize mamwaha kuli kavumbi ka mwanangana Hegai kafunga ka mapwo. Eswe amwene Estere amuzangile chikolo.

¹⁶ Chocho atwalile Estere kuli mwanangana Ahashueru mu zuwo lienyi lia wanangana ha kakweji wamuchikumi (Tebete) ha mwaka wamuchishimbiali wa kuyula chenyi.

¹⁷ Mba mwanangana wazangile Estere kuhiana mapwo eswe. Yawana vumbi ni ulemu kumeso jenyi kuhiana *avirgem eswe, kashika wasele chipangula cha wanangana ha mutwe wenyi, wamupwishile mwazovu kusalakana Vashti.

¹⁸ Henaho mwanangana walingile chiteleka chinene kuli alemu jenyi eswe ni tuvumbi twenyi—chiteleka cha Estere. Yasela utuswilo mu yifuchi ni kuhana yawana nikulita ni vumbi lia mwanangana.

¹⁹ Muze akungulwile *avirgem chisuho chamuchiali Mordekai Watwamine mu chikolo cha mwanangana.

²⁰ Estere kanda achisolola chisemuko chenyi chipwe vungu lienyi mumu Mordekai chocho hamwaha shimbi. Estere wononokene kuli Mordekai chizechene ngwe ha matangwa aze machimulela.

²¹ Ha matangwa aze, shimbu Mordekai Watwamine mu chikolo cha mwanangana, aali a kuli tuvumbi twa mwanangana, Bigatani ni Tereshe, akwa kufunga pito, evwile wuli mba afupile kushiha mwanangana Ahashueru.

²² Mordekai yachivwa, yachilweza kuli mwazovu Estere, mba Estere yachilweza kuli mwanangana mu jina lia Mordekai.

²³ Muze hasopa che chikuma hawana kumanyi chamwenemwene mba yaasukika eswe ni aali ha mitondo. Yachisoneka mu mukanda wa sango kumeso ja mwanangana.