Estere 1 - MUKANDA USANDU WA ZAMBI 1975

¹ Chapwile ha matangwa a Ahashueru (mwe Ahashueru yono wayulile chize ku India ndo ku Etiopia helu lia kulakaji lia yifuchi ni makumi aali a yifuchi ni yifuchi shimbiali),

² ha matangwa aze shimbu mwanangana Ahashueru watwamine ha ngunja ya wanangana wenyi mwe mu mbala ya Shushane,

³ ha mwaka wamuchitatu wa kuyula chenyi yalinga chiteleka hali alemu jenyi eswe ni tuvumbi twenyi. Akwa ndundo eswe a Persia ni Media, ni akwa lutwe ni alemu a yifuchi yatwama kumeso jenyi;

⁴ shimbu masolola upite wa wanangana wenyi wa uhenya, ni ulemu wa ulamba wenyi wahiana matangwa anji—ngwe kulakaji ni makumi nake a matangwa.

⁵ Muze matangwa aze hahwa mba mwanangana yalinga chiteleka kuli atu aze eswe apwile ku mbala ya Shushane, anene ni akepe, ha matangwa shimbiali mu yize ya jardine ya zuwo lia mwanangana.

⁶ Kwapwile mahina atoma, ni alá, ni alauluka a kukasa ni mihipu ya linyu lipema ni ufungo ku ngo ja prata ha manguji a mawe a marmore. Yitwamo yapwile ya oru ni prata ha mawe a marmore nawa achila, ni atoma, ni a chizumwa, ni alá.

⁷ Yaaha ya kunwa mu misenge ya oru (musenge ni musenge yalipwila) ni vinyu ya wanangana ya kulumbama nikulita ni uhanyi wa mwanangana.

⁸ Kunwa chapwile nikulita ni shimbi yino: niumwe mashinjika mukwo, mumu chocho mwanangana hahana shimbi kuli tuvumbi eswe a mu zuwo lienyi; akalinge nikulita ni upale wa mutu ni mutu.

⁹ Mwazovu Vashti iye nawa yalinga chiteleka hali mapwo a mu zuwo lia wanangana lize lia mwanangana Ahashueru.

¹⁰ Ha tangwa liamuchishimbiali muze mbunge ya mwanangana te yinawaha ni vinyu yatuma Mehumane, ni Bizeta, ni Harabona, ni Bigeta, ni Abagata, ni Zetare, ni Karaka tuvumbi shimbiali aze akuvumbika kumeso ja mwanangana Ahashueru,

¹¹ anehe mwazovu Vashti kumeso ja mwanangana ni chipangula cha wanangana akalweze kuli atu ni e alemu upeme wenyi, mumu wapwile mupema chikolo ku meso.

¹² Alioze mwazovu Vashti kasolo kutá ku liji lia mwanangana ku kanwa lia tuvumbi. Kashika mwanangana yatenuka chikolo; utenu wenyi wasasaminyine mu mbunge yenyi.

¹³ Henaho mwanangana yamba kuli akwa mana waze anyingikine tungonde ni miaka (mumu chocho mwanangana walingile ni waze eswe anyingikine shimbi ni upatwilo;

¹⁴ kulihata nenyi kwapwile Karshena, ni Shetare, ni Adamata, ni Tashi, ni Mere, ni Marsena, ni Memukane alemu shimbiali a Persia ni Media waze amwene meso ja mwanangana mu yitwamo ya lutwe mu wanangana)

¹⁵ ngwenyi, Kuchi mutulinga ni mwazovu Vashti nikulita ni shimbi mumu kasolo kutá ku liji lia mwanangana Ahashueru ku kanwa lia tuvumbi?

¹⁶ Memukane yakumbulula kumeso ja mwanangana ni alemu ngwenyi, Mwazovu Vashti kalingile chipi kuli mwanangana wika alioze kuli alemu eswe nawa ni kuli atu eswe waze ali mu yifuchi yeswe ya mwanangana Ahashueru.

¹⁷ Mumu chuma chino mwazovu halinga muchisangiwa kuli mapwo eswe mba malunga eswe malela kumeso jo muze mevwa ngwo, Mwanangana Ahashueru watumine anehe mwazovu Vashti kumeso jenyi alioze katayile.

¹⁸ Ni musono nawa miazovu a Persia ni Media ha kwivwa chuma chino cha mwazovu mamba chimuwika kuli alemu eswe ja mwanangana. Chocho mukukupwa sau ni ufwatulo.

¹⁹ Nyi chinawahila mwe mwanangana ahane shimbi ya wanangana ayisoneke mu shimbi ja A-Persia ni ja A-Media kuyichi kwalumuka, ngwo, Vashti kechi kunjila nawa kumeso ja mwanangana Ahashueru. Ni mwanangana ahane ulamba wenyi kuli umwe wamuhiana kupema.

²⁰ Mba muze mambujola mu chifuchi chenyi chinene shimbi yino ya mwanangana, mapwo eswe malemesa malunga jo, ni anene ni akepe.

²¹ Chuma chino chapemenene mwanangana ni alemu jenyi mba mwanangana yalinga nikulita ni liji lia Memukane.

²² Yatuma mikanda mu yifuchi yeswe ya mwanangana nikulita ni kusoneka chako; ku vungu lieswe mu limi lialio ngwo, Lunga mweswe akayule mu zuwo lienyi mwene, akambujole shimbi yino mu limi lia vungu lieswe.