Efesu 6 - MUKANDA USANDU WA ZAMBI 1975

¹ Yenu ana, Ononokenu kuli yisemi jenu muli Mwene, mumu chino chinate.

² Ngwo, Lemesa tatenu ni noko; yenayo ye shimbi yitangu yikwete chilakenyo,

³ ngwo, Hanga chikapwe chipema ni yena, hanga ukapwe ni mwono miaka yinji mu chifuchi.

⁴ Yenu atato, kanda nukehia ana jenu ku utenu: alioze alelenu ni kufumba ni kukanyamisa cha Mwene.

⁵ Yenu ndungo, Ononokenu kuli waze nikulita ni musunya anapu akakenu, ni woma, ni kuchikima, ni kutuwika cha mbunge jenu, chizechene ngwe kuli Kristu.

⁶ Hi ni kulingila cha meso ko, ngwe akwa kupemena kuli atu, alioze chizechene ngwe ndungo ja Kristu, nikulinga upale wa Zambi ni mbunge yeswe.

⁷ Lingenu ni vumbi ngwe kuli Mwene, hi kuli atu ko,

⁸ se nunanyingika chuma chipema cheswacho umwe malinga, chenacho makachitambula kuli Mwene, apwe ndungo, apwe mwenya chifuchi.

⁹ Yenu miata, lingenu yuma yimuwika kuli ayo, nikulitwamina kwomisa: se nunanyingika yoze wapwa Mwene wa eswe aali, niwo kanda niwenu, mwilu mwali, iye keshi katonde niumwe.

¹⁰ Ha yize yinasala, mandumbu jami, ngwami, Likolezenu muli Mwene, ni mu ngolo ja ndundo jenyi.

¹¹ Zalenu mazalo a utale eswe a Zambi, hanga nukahase kumana ni kulimika ni unjiliji wa Ndiapu.

¹² Mumu kulinjika chetu hi cha kulimika ni atu a musunya ni manyinga ko, alioze cha kulimika ni mawanangana, cha kulimika ni yiyulo, cha kulimika ni ene ja milima ya mwakono, cha kulimika ni maspiritu ja ungulungulu mu malilu.

¹³ Kashika tambulenu mazalo a utale eswe a Zambi, hanga nukahase kulimika ha tangwa lipi, mba muze hinunalingi yuma yeswe, kumana ngú.

¹⁴ Manenu kashika ngú, se hinunalijichika mu zalilo jenu muya wa umwenemwene, se hinunazala chipwiko cha utale cha ululi,

¹⁵ se hinunazala ha yiliato yenu kululika cha sango lipema lia sambukila.

¹⁶ Alioze helu lia yeswe, andenu lukepwe wa Ufulielo, yoze munukahasa kujima nenyi mivu yeswe ya kuyila ya mwe chingulungulu.

¹⁷ Andenu nawa ngalau ya ulamwino, ni katana ka Spiritu, mwenawo liji lia Zambi.

¹⁸ Lembenu matangwa eswe ni kuliumba cheswe ni kuliondela cheswe muli Spiritu, nikulayilako, ni kunyongonona cheswe, nikuliumba hali asandu eswe.

¹⁹ Ni hali yami, hanga akangwehe kuhanjika, ha kupakula kanwa liami ni hamu, mukusolola yinyingi ya chijimbiko cha sango lipema,

²⁰ ha liyo nguli kanganda mu malenge; hanga ngukahanjike ni hamu, chizechene ngwe changutamba kuhanjika.

²¹ Alioze hanga ni yenu nawa nukanyingike chize cha kutwala kuli yami, ngwe chize ngunatwama, Techiku, ndumbwetu wa zango, ni kavumbi wamwenemwene muli Mwene, kumakanunyingikisa yuma yeswe.

²² Hingunamutumu kuli yenu ha chikuma chino chene, hanga nukanyingike chize cha kutwala kuli yetu, hanga akalembejeke mbunge jenu.

²³ Sambukila yikapwe kuli mandumbu, ni zango hamwe ni Ufulielo, ya kuli Zambi Tata, ni ya kuli Mwene Yesu Kristu.

²⁴ Vumbi likapwe hamwe ni waze eswe akuzanga Mwene wetu Yesu Kristu ni zango liamwenemwene.