Efesu 5 - MUKANDA USANDU WA ZAMBI 1975

¹ Kashika pwenu akwa kwimbulula Zambi, ngwe ana aze anaazange chikolo.

² Endenu mu zango, chizechene ngwe Kristu watuzangile; walikunjikile mwene hali yetu, mulambu ni chitapo kuli Zambi akapwe wa lupembo mupema.

³ Alioze utanji, ni luchisa mweswe, chipwe kuzo, kanda ayivuluka hakachi kenu nichimwe, ngwe chinatela asandu;

⁴ chipwe pande ja sonyi, chipwe miselo ya uhepuke, hanji lwelia yoze katelele, alioze Shinaho nupwe nikusakwila.

⁵ Mumu chino nunanyingika chamwenemwene, ngwo, Chitanji niumwe, chipwe mukwa luchisa, chipwe mukwa kuzo, mwenawo mukwa kukombelela mahamba, keshi chihinga mu wanangana wa Kristu ni Zambi.

⁶ Niumwe kanda akanwonga ni maliji amokomoko: mumu ha yino yuma utenu wa Zambi kumuwiza hali akwa uhulia.

⁷ Kanda nulikata no.

⁸ Mumu yenu nwapwile milima ha miaka ya kunyima, alioze haliapwila nuli pangu muli Mwene: endenu chizechene ngwe akwa pangu,

⁹ (mumu mihuko ya pangu yinasoloka ni upeme weswe ni ululi ni umwenemwene);

¹⁰ esekenu chize chakupemena chikolo kuli Mwene.

¹¹ Kanda nuliendela ni yitanga ya kuseka ya milima, alioze Shinaho kuyikanjisa.

¹² Mumu yuma yize o akulinga ku tenga, yikola sonyi chipwe kuyivuluka.

¹³ Mumu yuma yeswe, muze maakumikayo, mayisolola ku pangu: mumu chize chakusolola yuma yeswe, pangu.

¹⁴ Kashika kanambe ngwenyi, Laula, yena uli mu tulo, uhinduke hakachi ka afu, ni Kristu makakutemukina.

¹⁵ Talenu kanawa kashika ngwe chize nunende, hi ngwe waze keshi mana ko, alioze ngwe akwa mana;

¹⁶ Kulenu we mwaka, mumu matangwa ano api.

¹⁷ Kashika kanda nukazuzuka, alioze nyingikenu chize wapwa upale wa Mwene.

¹⁸ Kanda nuzengewa ni vinyu, mu yenayo muchili chimbangwinya, alioze zalenu ni Spiritu.

¹⁹ Nukalihanjikile umwe kuli mukwo ni masamu, ni miaso, ni mimbo ya Spiritu, nikwimba nikutangula mu mbunge jenu kuli Mwene;

²⁰ nikusakwila matangwa eswe ha yuma yeswe mu jina lia Mwene wetu Yesu Kristu kuli Zambi kanda mwe Tata.

²¹ Lizeyelenu umwe kuli mukwo mu woma wa Kristu.

²² Mapwo, zeyelenu kuli akwenumalunga, chizechene ngwe kuli Mwene.

²³ Mumu lunga iye mutwe wa mukwo-pwo, chizechene ngwe Kristu nawa iye mutwe wa chikungulwila, iye chilamwina cha mujimba.

²⁴ Alioze chizechene ngwe chikungulwila kuchakuzeya kuli Kristu, chocho nawa mapwo akazeye kuli akwo-malunga mu yuma yeswe.

²⁵ Yenu malunga, zangenu akwenumapwo, chizechene ngwe Kristu nawa wazajayile chikungulwila, walikunjikile ha chiyo;

²⁶ hanga akachisele chisandu, akachipemese ku kusanyisa cha meya ni tachi ja liji,

²⁷ hanga akatumbikile chikungulwila kuli iye mwene, cha uhenya, kuchishi chipeka, hanji mukanya, hanji chuma chimwe ngwe chino; alioze hanga chikapwe chisandu, kuchishi kapalia.

²⁸ Chocho nawa chatamba malunga kuzanga akwo-mapwo chizechene ngwe mijimba yo ene. Yoze mazanga mukwo-pwo, malizanga mwene,

²⁹ mumu niumwe mapwa ni kole ha musunya wenyi mwene nilimwe tangwa, alioze maulela, maufunga, chizechene ngwe Kristu nawa kakulinga ku chikungulwila.

³⁰ Mumu yetu tuli yihanda ya mujimba wenyi, ni ya musunya wenyi, ni ya yifwaha yenyi.

³¹ Ha chikuma chino, mutu akahichike tato ni naye, akalinunge ni mukwo-pwo; ni e aali kumakapwa musunya umuwika.

³² Chijimbikilo chino chinene: alioze ngunahanjika ha kutwala kuli Kristu ni chikungulwila.

³³ Hindu ni yenu nawa, eswe, mutu ni mutu, akazange chocho mukwo-pwo, chizechene ngwe analizange iye mwene; ha kutwala kuli pwo akavwile woma mukwo-lunga.