Efesu 3 - MUKANDA USANDU WA ZAMBI 1975

¹ Ha chikuma chino yami Paulu, funge ya Kristu Yesu mumu hali yenu akwa mavungu,

² kachi nwevwile ha uselo wa vumbi lia Zambi uze hanangwehe hali yenu;

³ ngwe ku usolwelo angunyingikishine chijimbikilo, nikulita ngwe nasonekene kulu ni maliji akehe,

⁴ hanga muze munutanga, malinjekela jami mu chijimbikilo cha Kristu akanulumbunuke;

⁵ chize ha yisemuko yikwo kachisolwele kuli ana ja atu, ngwe haliapwila hanachisolola kuli apostolo jenyi asandu, ni aprofeta, muli Spiritu.

⁶ Ngwo, Akwa mavungu kanapu maswana-ni-akwo, ni yihanda-ni-yikwo ya mujimba umuwika, ni akwa kuliangana-ni-akwo cha chilakenyo muli Kristu Yesu ku sango lipema.

⁷ Ha lienalio angupwishile kavumbi, nikulita ni chawana cha vumbi lia Zambi lize anguhele, nikulita ni kulinga cha tachi jenyi.

⁸ Kuli yami, nguli mukepekepe Wahiana eswe wa kuli asandu eswe, hanangwehe vumbi lino, kwambujola hakachi ka akwa mavungu sango lipema lia upite wa Kristu, uze niumwe mahasa kuunyingika;

⁹ ngukalweze atu eswe uze wapwa uselo wa chijimbikilo, chahengamine chize ku miakulwila muli Zambi, yoze watangile yuma yeswe;

¹⁰ hanga haliapwila akanyingikise mawanangana ni yiyulo mu malilu, ku chikungulwila, milali yeka ni yeka ya mana a Zambi.

¹¹ Nikulita ni kupala chize cha ku miaka ya mutolo, chize apalile kulinga muli Kristu Yesu Mwene wetu;

¹² muli iye, hamu tuli nalio, ni unjililo mukujikiza ku Ufulielo kuli iye.

¹³ Kashika ngunanuhinjila ngwami, Kanda nulezumuka ha luyinda wami hali yenu, mwenawo uhenya wenu.

¹⁴ Ha chikuma chino nakuumba makungunwa jami kuli Tato ya Mwene wetu Yesu Kristu,

¹⁵ yoze hali iye minyachi yeswe, mwilu ni hashi hanayiluku majina,

¹⁶ hanga akanwehe, nikulita ni kulumbama cha uhenya wenyi, kunutakamisa ni tachi kuli Spiritu yenyi muli mutu wa muchima;

¹⁷ hanga Kristu akatwame mu mbunge jenu ku Ufulielo; hanga yenu nikutanda miji, nukajikize mu zango;

¹⁸ nukahase kunyingika hamwe ni asandu eswe uze wapwa utohe, ni usuhe, ni usuku kwilu, ni usuku kushi,

¹⁹ nikunyingika zango lia Kristu, lize Kakuhiana yinyingi, hanga nukazale tò ndo ku kuzala cheswe cha Zambi.

²⁰ Haliapwila kuli yoze wakuhasa kulinga kuhiana chikolo chize cheswe mutwita, hanji mutunyonga, nikulita ni tachi jize jakulinga muli yetu,

²¹ uhenya upwe kuli iye, mu chikungulwila ni muli Kristu Yesu ndo ku yisemuko yeswe ku miaka ya mutolo. Amene.