Efesu 2 - MUKANDA USANDU WA ZAMBI 1975

¹ Ni yenu nwapwile afu mu Utanguko wenu ni mu milonga yenu,

² mu yenayo ha miaka ya kunyima nwendele nikulita ni ndako ya hano hashi, nikulita ni mwata wa chiyulo cha mu tetela, Spiritu yoze haliapwila wakulinga muli akwa uhulia.

³ Hakachi ko ni yetu eswe nawa ha miaka ya kunyima, twendele mu usolo wa musunya wetu, nikulinga upale wa musunya ni wa mbunge, ni ku chisemewa twapwile akwa kutambula utenu, chizechene ngwe akwo.

⁴ Alioze Zambi, mukwa keke ya kulumbama, mumu ha zango lienyi linene lize watuzangile nalio,

⁵ chipwe muze twapwile afu mu milonga yetu, hanatupwisa ni mwono hamwe ni Kristu (ku vumbi hananulamwina).

⁶ Hanatuhindwisa hamwe nenyi; hanatutwamisa hamwe nenyi mu malilu muli Kristu Yesu;

⁷ hanga ha miaka yize muyiza kwiza, akasolole kulumbama chahiana cha vumbi lienyi ni utu kuli yetu muli Kristu Yesu.

⁸ Mumu ku vumbi hananulamwina, ku Ufulielo; ni chino hi cha kuli yenwene ko; chawana cha Zambi;

⁹ hi cha ku yitanga ko, hanga niumwe kechi kalisamba.

¹⁰ Mumu yetu tuli chitanga chenyi, atutangile muli Kristu Yesu ha yilinga yipema, yize Zambi walulikile kushi hanga tukendemo.

¹¹ Kashika iwulukenu, ngwe yenu ha miaka ya kunyima nwapwile mavungu mu musunya, waze akwavuluka ngwo, Ulima kuli waze akwavuluka ngwo, Ungalami mu musunya wakulinga ni moko.

¹² Ha miaka yize nwapwile kunushi ni Kristu, tundaka ku vungu lia Izalele, ni yilambala ku usendo wa chilakenyo, ni kutalatala nichimwe, nwapwile kunushi ni Zambi hano hashi.

¹³ Alioze haliapwila muli Kristu Yesu, yenu ha miaka ya kunyima nwapwile kusuku, hananukundamisa mumu ha manyinga ja Kristu.

¹⁴ Mumu iye sambukila yetu, mwenawo wapwishile eswe aali umuwika, nikupuzula chikalakala cha kuhandununa.

¹⁵ Se wahwishile mu mujimba wenyi ye kole, e maliji a shimbi atwama mu ndongo; hanga akatange muli iye mwene wa kuli aali mutu umuwika mwaha, chocho akanehe sambukila;

¹⁶ hanga akawanyise eswe aali kuli Zambi mu mujimba umuwika ku kulusu, se wahwishile nawo ye kole.

¹⁷ Iye wejile nikwambujola sango lipema lia sambukila kuli yenu nwapwile kusuku, ni sambukila kuli waze apwile hehi;

¹⁸ mumu muli iye yetu, eswe aali, unjililo tuli nawo muli Spiritu umuwika kuli mwe Tata.

¹⁹ Chocho hi nuli yilambala ni njize ko nawa, alioze enyaho-ni-akwo hamwe ni asandu ni akwa zuwo lia Zambi.

²⁰ Hanutungisa ha fundamentu ya apostolo ni aprofeta, Yesu Kristu mwene iye liwe lia lutwe lia ha mbango.

²¹ Muli iye kutunga cheswe, chimwe ni chimwe, chakutokeka kanawa, kuchakwondomoka kupwa tembele yisandu muli Mwene.

²² Muli iye yenu nawa kunwatungiwa hamuwika kupwa zuwo lia Zambi muli Spiritu.