Efesu 1 - MUKANDA USANDU WA ZAMBI 1975

¹ Yami Paulu, postolo wa Kristu Yesu ku upale wa Zambi, Kuli asandu waze ali ku Efwesu, amwenemwene muli Kristu Yesu:

² Vumbi kuli yenu ni sambukila, ya kuli Zambi Tata yetu ni Mwene Yesu Kristu.

³ Zambi kanda Tato ya Mwene wetu Yesu Kristu afumane, yoze hanatuwahisa ni yiwape yeswe ya uspiritu mu malilu muli Kristu:

⁴ nikulita ngwe atutongwele muli iye, shimbu te kanda asela fundamentu ya hashi, hanga tukapwe asandu, kutushi kapalia kumeso jenyi.

⁵ Se watufunjikile ni zango Shimbu-kanda, hanga muli Yesu Kristu akatupwise ana kuli iye mwene, nikulita ni kuwaha cha upale wenyi,

⁶ ku uhaliso wa uhenya wa vumbi lienyi, mu lienalio hanatuvumbisa muli yoze anamuzange chikolo.

⁷ Muli iye, ukule tuli nawo ku manyinga jenyi, we ukonekeno wa milonga yetu, nikulita ni kulumbama cha vumbi lienyi.

⁸ Lienalio alilumbamishine kuli yetu ni mana eswe ni ukanyame.

⁹ Nikutunyingikisa chijimbikilo cha upale wenyi, nikulita ni chize chamupemena, chize waliselele kulinga muli iye mwene;

¹⁰ ndo ku kuyula cha kumanunuka cha miaka, hanga akaswise yuma yeswe muli Kristu, yuma yize yili mu malilu, ni yuma yize yili hano hashi, muli iye ngwami.

¹¹ Muli iye nawa hanatupwisa chihinga, se atufunjikile shimbu te miaka kanda yipwa, nikulita ni kupala cha yoze wakulingisa yuma yeswe nikulita ni mana ja upale wenyi;

¹² hanga tukapwe ku uhaliso wa uhenya wenyi, yetu, twaliangile kutalatala kuli Kristu.

¹³ Muli iye ni yenu nawa se nwevwile liji lia umwenemwene lia sango lipema lia ulamwino wenu; muli iye nawa, se nwafulielele, anujikile ni Chijikilo cha Spiritu Musandu wa chilakenyo.

¹⁴ Iye che chifungo cha chihinga chetu ndo ku ukule wa upite wa Zambi mwene, ku uhaliso wa uhenya wenyi.

¹⁵ Ha chikuma chino yami nawa, se hingunevu ha Ufulielo muli Mwene Yesu, uze uli muli yenu, ni zango lize nuli nalio kuli asandu eswe,

¹⁶ chishi kulitwamina kusakwila hali yenu, nikunuvulwoka mu yilemba yami;

¹⁷ hanga Zambi ya Mwene wetu Yesu Kristu, Tato ya uhenya, akanwehe spiritu ya mana ni usolwelo mu yinyingi yeswe ya iye;

¹⁸ meso ja mbunge jenu akapanguluke, hanga nukanyingike chize chapwa kutalatala cha kutambika chenyi, chize chapwa kulumbama cha uhenya wa chihinga chenyi muli asandu;

¹⁹ ni uze wapwa unene Wahiana wa tachi jenyi kuli yetu akwa kufuliela, nikulita ni kulinga cha ngolo ja ndundo jenyi,

²⁰ jize walingile muli Kristu muze amuhindwishile hakachi ka afu, muze amutwamishine ku kwoko lienyi lia chindume mu malilu,

²¹ helu lia mawanangana eswe ni yiyulo yeswe, ni tachi jeswe, ni wene weswe, ni majina eswe waze anaavuluka hi ha mwakono wika ko, alioze ha uze muwizaho nawa.

²² Iye wazeyesele yuma yeswe kushi lia yiliato yenyi; wamuhelecho kupwa mutwe helu lia yuma yeswe ku chikungulwila.

²³ Chenacho we mujimba wenyi, che kuzala tò cha yoze wakuzalisa yuma yeswe muli eswe.