Daniel 9 - MUKANDA USANDU WA ZAMBI 1975

¹ Ha mwaka utangu wa Dariu mwana Ahashueru, Ka-Media, yoze amupwishile mwanangana helu lia A-Kaletea—

² ha mwaka wenyi utangu wa kuyula, yami Daniel nasele chinyingi mu mikanda, nikulita ni liji lia Yehova kuli profeta Jeremia, kwalula cha miaka yize muyipalika ndo ku songo lia kupwa Yerusaleme ya hululu—chinalumbunuka, makumi shimbiali a miaka.

³ Mba natalikishile meso jami kuli Mwene Zambi kumufupa ha kulemba ni kuliumba hamwe ni kulitwamina kulia ni yikeleyi ni uto.

⁴ Nalembele kuli Yehova Zambi yami ni kushikisa ngwami, Mwene, mwe Zambi munene kole ni woma; yena kuwakufunga usendo ni utu wa zango kuli waze akukuzanga ni kufunga shimbi je,

⁵ etu hitwavulumuna, hitwalinga chipi, hitwalinga ungulungulu, hitwakukatukila ni kuhambuluka ku shimbi je ni yiyulo ye.

⁶ Kutwapanjikile kuli tuvumbi twe aprofeta, waze ahanjikile mu jina lie kuli mianangana jetu, ni alemu jetu, ni tulamba twetu, ni atu eswe a chifuchi.

⁷ Mwene, ululi unalite ni yena, alioze chize chinatute yetu, sonyi ku meso, chize tunamono musono, kuli malunga ja Yunda, ni kuli akwa Yerusaleme, ni kuli A-Izalele eswe, waze ali hakamwihi ni waze ali kusuku mu yifuchi yeswe kuze hiwaahumina mumu ha mafwefwe aze halinga ni yena.

⁸ Mwene, kuli yetu sonyi ku meso jinatute, ni kuli mianangana jetu, ni alemu jetu, ni tulamba twetu, mumu Hitwakuvulumuna.

⁹ Kuli Mwene Zambi yetu kwatwama keke ni ukonekeno, mumu yetu hitwamukatukila.

¹⁰ Kutwononokene ku liji lia Yehova Zambi yetu ha kukaula shimbi jenyi, jize asele kumeso jetu kuli tuvumbi twenyi aprofeta.

¹¹ A-Izalele eswe Hahambuluka, hatangula shimbi je, kasolo kupanjika ku liji lie. Kashika lie shingo ni che chilakenyo asonekene mu shimbi ja kavumbi ka Zambi Mose, hanayizukula hali yetu, mumu hitwamuvulumuna.

¹² Iye hakolesa maliji jenyi aze ahanjikile kulimika ni yetu ni waze atuyulile ha kukokela hali yetu kuji-ni-tomo linene; mumu mushi lia lilu lieswe kanda musoloka chimwe cha kulifwa ni chino halinga ku Yerusaleme.

¹³ Kuji-ni-tomo lino hilieza hali yetu nikulita ni chize chinasonewa mu shimbi ja Mose, hindu kutwalembelele vumbi lia Yehova Zambi yetu, ni kuhichika uhenge wetu, nikusa mbunge jetu ku umwenemwene we.

¹⁴ Kashika Yehova hanatufungila kuji-ni-tomo lino, hatukokelalio; mumu Yehova Zambi yetu iye mukwa ululi mu yitanga yeswe yize halinga, ni yetu kutwononokene ku liji lienyi.

¹⁵ Haliapwila kashika, Mwene Zambi yetu, yena wachijile atu je ku Engitu ni kwoko lia ndundo ni kufumanyisa jina lie ngwe tangwa lia musono; yetu hitwavulumuna, hitwalinga uhenge.

¹⁶ Mwene, nikulita ni yitanga ye yeswe ya ululi, utenu we ni ufwatulo we ukakatuke ku chihunda che cha Yerusaleme, ku mulundu we usandu. Mumu ha mukunda wa milonga yetu ni uhenge wa tulamba twetu, Yerusaleme ni atu je hanalumuka kashilikilo hakachi ka waze eswe anatujingilika.

¹⁷ Kashika Zambi yetu, panjika ku kulemba cha kavumbi ke ni ku kuliumba chenyi; ha mukunda wa yena mwene pangulwisa meso je ha zuwo lie lisandu, mumu liatwama lia hululu Mwene.

¹⁸ Zambi yami, tela kama twitwi lie ukevwe. Laula kama ku meso utale chize hatwenyeka, ni chihunda chize hachiluka jina lie, mumu kutwanehene kuliumba chetu kuli yena mumu ha ululi wetu, alioze mumu ha keke ye yinene.

¹⁹ Mwene, ivwa kama. Mwene, konekena kama. Mwene, panjika kama ulinge; kanda ulaluka, mumu hali yena mwene, Zambi yami, mumu ha chihunda che ni hali atu je halukako jina lie.

²⁰ Shimbu munguchihanjika nikulemba, nikushikisa shili yami ni shili ya atu jami A-Izalele, ni kuliumba kumeso ja Yehova Zambi yami mumu ha mulundu usandu wa Zambi yami;

²¹ shimbu munguchihanjika nikulemba, mwe lunga Gabriele, yoze naona te hatangum mu usolwelo, yeza kuli yami nikuhumuka fuji ha ola ya mulambu wa chingoloshi,

²² Yeza, yamba kuli yami ngwenyi, Daniel, hineza haliapwila kukwaha mana ni yinyingi.

²³ Ha kuputuka cha kuliumba che liji natuhukile, mba hineza kukulwezalio mumu kanakuzange chikolo. Kashika Zewula lie liji usolwelo ukulumbunuke.

²⁴ Hali atu je ni chihunda che chisandu hanasela shimbi ya makumi shimbiali a semana kumanununa Utanguko, ni kusulisa shili, ni kukukila uhenge, ni kuhetesa ululi wa mutolo, ni kujika ni Chijikilo usolwelo ni uprofeto, ni kuzujila maji muma musandu mwahiana.

²⁵ Kashika nyingika Chikulumbunuke, chize ku kuhana liji lia kululika ni kutunga Yerusaleme ndo ku kwiza cha yoze mukwa-kuyula amuwayishile ni maji, kumukukapwa semana shimbiali, ni makumi asambano a semana ni semana jiali. Mayitunga nawa ni malwaza ni matapalo, hindu ha mwaka wa lamba.

²⁶ Kulutwe lia makumi asambano a semana ni semana jiali yoze amuwayishile ni maji mamutetaho, keshi nichimwe, mba atu ja mukwa kuyula yoze meza kwiza kumakonwona chihunda ni zuwo lisandu. Songo liayo mulikeza ngwe sanga; ndo ku songo kumukukapwa jita—hanaafunjikila kwenyeka wika.

²⁷ Iye makakolesa usendo ni e anji ha semana yimuwika, alioze hakachi ka semana masulisa yitapo ni milambu. Ha mapulwa ja yizelwokeso kumukeza umwe mukwa kwenyeka, ndo mazukwila hali mwe chenyeke songo lize hanamufunjikila.