Daniel 6 - MUKANDA USANDU WA ZAMBI 1975

¹ Chapemenene Dariu kusa ku chiyulo cha wanangana kulakaji lia yilolo ni makumi aali a yilolo akapwe kweswe ha wanangana.

² Helu lio hapwile akwa lutwe atatu hanga yilolo akakumbulule kuli ayo hanga yuma ya mwanangana yikende kanawa ni kutokesa chakuhi. Daniel wapwile hakachi ka wano atatu.

³ Mba yono Daniel walumukine wa lufuma helu lia akwa lutwe akwo ni yilolo mumu Spiritu mupema Wahiana Watwamine muli iye; mba mwanangana wazangile kumusa helu lia wanangana weswe.

⁴ Kashika akwa lutwe ni yilolo afupile chitela cha kusuma nacho Daniel ha kutwala ku wanangana. Alioze kawanyine chitela, hanji kapalia, mumu aye mukwa jika; kawanyine kulweza hanji kapalia muli iye.

⁵ Kashika wano malunga yamba ngwo, Kutuchi kuwana chitela hali yono Daniel shina mutuchiwana ha kutwala ku shimbi ja Zambi yenyi.

⁶ Kashika akwa lutwe ni yilolo yalitesa, yeza kuli mwanangana ngwo, Vulie mwanangana Dariu.

⁷ Akwa lutwe eswe a mu wanangana, ni tupitau, ni yilolo, ni tuliamanga, ni anguvulu, hitwanyonga hamuwika ngwetu, Chatamba yenu mwanangana kusa shimbi ni kukolesa koki ya kwamba ngwenu, Mweswe malemba kuli umwe zambi hanji kuli umwe mutu ha shimbu lia makumi atatu a matangwa, shina kuli yenu mwanangana, amunyase mu wina wa ndumba.

⁸ Kashika mwanangana, senu ye koki, senu jina ku mukanda, mba kuyichi kuhasa kwalumuka nikulita ni shimbi ja A-Media ni A-Persia jize kechi kuhasa kujishiha.

⁹ Kashika mwanangana Dariu yasa jina lienyi ha mukanda, he ha shimbi ya koki.

¹⁰ Daniel muze hanyingika ngwenyi, Hasa jina ku mukanda uze, yaya ku zuwo lienyi kuze te kali ni njanela mu chipatulo cha mwilu ya washi ya kutalikisa ku Yerusaleme. Yazondama ha makungunwa jenyi ni kulemba ni kusakwila kuli Zambi yenyi katatu ha tangwa chizechene ngwe wapwile nikulinga kulu.

¹¹ Kashika wano malunga, se halitesa kulu, yeza yawana Daniel kanalembe ni kuliumba kumeso ja Zambi yenyi.

¹² Mba yakundama ni kwamba kumeso ja mwanangana ha kutwala ku shimbi yize ya koki ngwo, Mwanangana, kunwasonekene jina lienu ha shimbi yimwe ya koki ngwenu, Mutu mweswe malemba kuli umwe zambi hanji umwe mutu ha makumi atatu a matangwa shina kuli yenu mwanangana, amunyase mu wina wa ndumba? Mwanangana yakumbulula ngwenyi, Chuma chinakolo nikulita ni shimbi ja A-Media ni A-Persia jize kechi kuhasa kujishiha.

¹³ O yamba kumeso ja mwanangana ngwo, Auze Daniel wa kuli njize a ku Yunda kanupanjikile, chipwe enu mwanangana, chipwe shimbi yize ya koki nwasonekene jina, alioze kakulemba katatu ha tangwa.

¹⁴ Mwanangana ha kwivwa maliji wano walifwichile chikolo mu mbunge. Wasele manyonga jenyi kupulula Daniel, ni kuhondangana ndo kunjila cha tangwa akamulamwine.

¹⁵ Henaho wano malunga yalitesa yeza kuli mwanangana ngwo, Nyingikenu mwanangana, shimbi ya A-Media ni A-Persia ngwetu, Shimbi yimwe ya koki, hanji chiyulo cha mwanangana, kechi kahasa kuchalumuna.

¹⁶ Kashika mwanangana yahana liji, yaneha Daniel, yamunyasa mu wina wa ndumba. Mwanangana yamba kuli Daniel ngwenyi, Zambi ye akufunge, yoze wakumuvumbika matangwa eswe.

¹⁷ O yaneha luliwe, yalusa ha wina. Mwanangana yasaho Chijikilo chenyi mwene ni Chijikilo cha alemu jenyi hanga nichimwe chuma akachalumune ha kutwala kuli Daniel.

¹⁸ Mba mwanangana yaya ku zuwo lienyi, yapalikisa ufuku weswe ni kulitwamina kulia; kamunehenene yisaji ya miaso; tulo kaamwene.

¹⁹ Ha kuvumbuka cha tangwa, mwanangana yakatuka, yaya kapupushi ku wina wa ndumba.

²⁰ Ha kukundama ku wina muze mwatwama Daniel, yatambika ni liji lia kupinda kuli Daniel ngwenyi, Daniel, kavumbi ka Zambi ya mwono, Zambi ye yoze wakumuvumbika matangwa eswe hahasa kukupulula kuli ndumba?

²¹ Daniel yamba kuli mwanangana ngwenyi, Vulie mwanangana.

²² Zambi yami watumanga mungelo wenyi kuyika makanwa ja ndumba. Kangulemekene mumu hanguwana chishi kapalia kumeso jenyi. Chipwe kumeso ja yenu mwanangana chalingile chipi nichimwe.

²³ Mba mwanangana wawahililile chikolo, yahana liji achize Daniel mu wina. Chocho yachiza Daniel mu wina, nikamwe kachilonda kakawanyine hali iye mumu hafuliela Zambi yenyi.

²⁴ Mwanangana yatuma, mba waze asumine Daniel, yaaneha, yaanyasa mu wina wa ndumba—ayo, ni ana jo, ni mapwo jo. Shimbu kanda achiheta ha mashima a wina ndumba yaakwata ni kupalwola yifwaha yo tuyipinji.

²⁵ Mba mwanangana Dariu yatuma mulanda kuli akwa mavungu eswe, ni minyachi yeswe, ni malimi eswe aze atwama hano hashi ngwenyi, Sambukila yikalumbame kuli yenu.

²⁶ Ngunase shimbi ngwami, Mu yifuchi yeswe ya wanangana wami atu eswe akachikime ni woma kumeso ja Zambi ya Daniel, mumu iye Zambi ya mwono, katwama wa mutolo. Wanangana wenyi kechi kahasa kuwonwona; chiyulo chenyi kuchichi kasula.

²⁷ Kakupulula, kakulamwina, kakulinga yilayi ni yikomokeso mwilu ni hashi, yono mwene hanalamwina Daniel, ku tachi ja ndumba.

²⁸ Chocho yono Daniel yawaha ni milimo yenyi mu wanangana wa Dariu, ni mu wanangana wa Ka-Persia Siru.