Daniel 5 - MUKANDA USANDU WA ZAMBI 1975

¹ Mwanangana Beleshazare walingile muzumbu unene kuli kanunu ka alemu jenyi. Yanwa vinyu kumeso ja mwe kanunu.

² Ha kunwa ye vinyu Beleshazare yatuma kuneha yikwachilo ya oru ni prata, yize tato Nabukanezore hachiza ku tembele mu Yerusaleme hanga mwanangana ni alemu jenyi, ni mapwo jenyi, ni *akonkubina jenyi, anwinemo.

³ Mba yaneha yikwachilo ya oru yize achijile ku tembele, lie zuwo lia Zambi mu Yerusaleme; ni mwanangana, ni alemu jenyi, ni mapwo jenyi, ni *akonkubina jenyi anwinyinemo.

⁴ Yanwa vinyu ni kuhalisa mazambi a oru ni prata, ni unengu, ni utale, ni mutondo, ni mawe.

⁵ Haze hene minwe ya kwoko lia mutu yiyisoloka nikusoneka ha ndambo ya kushingula ya ha yishimi ya palasiu ya mwanangana, hatalanganyi ni ndeya. Mwanangana kanamono shimbu kwoko mulisoneka.

⁶ Ku meso ja mwanangana kwalumukine ngwe chitofwi; manyonga jenyi amuvwishile woma; molu jenyi apekumukine; makungunwa jenyi aliwakaminyine.

⁷ Mwanangana yasanyika ni liji lia tachi anehe tahi, ni A-Kaletea, ni aprofeta. Mwanangana yamba kuli akwa mana a mu Babilonia ngwenyi, Mweswawo matanga sona jino ni kungulweza ulumbunwiso wajo, mungumujika ni mazalo a ufungo, mazala lenge lia oru ha kota yenyi, mapwa mukwa kuyula wamuchitatu mu wanangana.

⁸ Akwa mana eswe a mwanangana anjilile, alioze kahashile kutanga je sona, hanji kulweza kuli mwanangana ulumbunwiso wajo.

⁹ Kashika mwanangana Beleshazare wevwile woma wunji; ku meso jenyi kwalumukine, ni alemu jenyi akakashanyine.

¹⁰ Mwe mwazovu wejile ku zuwo lia muzumbu mumu ha maliji a mwanangana ni alemu jenyi. Mwazovu yamba ngwenyi, Vulie mwanangana! Manyonga je kanda akuvwisa woma. Kanda walumuka ku meso chocho.

¹¹ Mwali mu wanangana we umwe lunga kali ni Spiritu ya mazambi asandu. Ha matangwa a tatenu, pangu, ni yinyingi, ni mana awanyine muli iye, ngwe mana a mazambi. Tatenu mwanangana Nabukanezore wamupwishile mukwa lutwe hakachi ka yimbanda, ni tahi, ni A-Kaletea, ni aprofeta,

¹² mumu awanyine muli yono Daniel (mwanangana wamulukile Belteshazare) Spiritu mupema Wahiana, ni yinyingi, ni mana a kulumbununa yilota, ni kujimbula yijimbikilo, ni kupatula yuma yikalu. Kashika sanyika Daniel, mba makulweza ulumbunwiso.

¹³ Yaneha Daniel kumeso ja mwanangana. Mwanangana yamba kuli Daniel ngwenyi, Yena uli mwe Daniel, umwe wa njize aze a ku Yunda, mwanangana tata wachijile ku Yunda.

¹⁴ Hinevwa ha kutwala kuli yena ngwo, Spiritu ya mazambi uli nenyi, ni pangu, ni yinyingi, ni mana apema ahiana ayiwanyine muli yena.

¹⁵ Haliapwila haneha kumeso jami akwa mana, ni tahi, atange sona jino ni kungulweza ulumbunwiso wajo. Alioze kahashile kungulumbunwina chikuma chino.

¹⁶ Alioze hinevwa ngwo, Yena unahase kulumbununa ni kupatula yuma yikalu. Nyi muhasa kutanga je sona ni kungulweza ulumbunwiso wajo, mungukujika ni mazalo a ufungo, muzala lenge lia oru ha kota ye, muopwa mukwa kuyula wamuchitatu mu wanangana.

¹⁷ Daniel yakumbulula kumeso ja mwanangana ngwenyi, Yawana yenu yitwame kuli yenwene, ni kwononona chenu achihane kuli mweka, hindu mungutangila mwanangana je sona ni kunulweza ulumbunwiso wajo.

¹⁸ Enu mwanangana, Zambi Chitunda yahana kuli tatenu Nabukanezore wanangana, ni unene, ni uhenya, ni ulamba;

¹⁹ mba ha unene uze hamwaha akwa mavungu eswe, ni minyachi yeswe, ni malimi eswe achikimine ni woma kumeso jenyi. Mweswe yazanga kushiha, yamushiha; mweswe yazanga kufunga ni mwono, yamufunga ni mwono. Mweswe yazanga kunangamisa, yamunangamisa; mweswe yazanga kununguna, yamununguna.

²⁰ Alioze muze mbunge yenyi yalizachile, ni Spiritu yenyi yakalile akende nikulengumuka, mba yamuchiza ku ngunja ya wanangana wenyi, ni uhenya wenyi yamutambulawo.

²¹ Yamuhuma hakachi ka atu, ni manyonga jenyi yalumuka ngwe a kashitu, ni wendelo wenyi yiupwa hakachi ka yimbulu a mu yambu. Yamulisa mwambu ngwe ngombe, ni mujimba wenyi wawulile ni mume wa mwilu, ndo hasa chinyingi ngwenyi, Zambi Chitunda kakuyula wanangana wa atu; kakusaho kuyula mweswawo mapala.

²² Ni yenu mwanenyi Beleshazare nwanyingikine yino yuma yeswe, hindu kunwakehesele mbunge yenu,

²³ alioze hinwalizundula kulimika ni Mwene wa mwilu. Yikwachilo ya mu zuwo lienyi hinwaneha kumeso jenu, ni yenu ni alemu jenu, ni mapwo jenu ni *akonkubina jenu hinwanwinamo vinyu. Hinwahalisa mazambi a prata, ni oru, ni unengu, ni utale, ni mutondo, ni mawe, aze keshi kumona, chipwe kwivwa, chipwe kunyingika; alioze Zambi yoze kali ni mwiku wenu, ni yoze kali ni chiyulo cha majila jenu eswe, kunwamulemesene.

²⁴ Kashika kumeso jenyi hatuma kwoko lino ni je sona haiisoneka.

²⁵ Je sona hajisoneka jino: MENE, MENE, TEKELE, UPARSINE.

²⁶ Ni ulumbunwiso wa chikuma ngwami, chino: MENE, Zambi hanalula matangwa ja wanangana wenu; hanausulisa.

²⁷ TEKELE, hanakweseka mu pezu; hiwahona.

²⁸ PERESE, hanahandununa wanangana we, hanauhana kuli A-Media ni A-Persia.

²⁹ Mba Beleshazare yatuma, yajika Daniel ni mazalo a Ufungo; yasa lenge lia oru ha kota yenyi; yatambika mutambi ha kutwala kuli iye, wa kumutongola mukwa kuyula wamuchitatu mu wanangana.

³⁰ Ufuku uze wene Beleshazare mwanangana wa Kaletea amushihile.

³¹ Ka-Media Dariu watambwile wanangana, te kali ni makumi asambano a miaka ni miaka yiali.