Daniel 4 - MUKANDA USANDU WA ZAMBI 1975

¹ Yami mwanangana Nabukanezore ngunasoneka kuli akwa mavungu eswe, ni minyachi yeswe, ni malimi eswe atwama hano hashi. Sambukila yikalumbame kuli yenu.

² Ngunamono chipema ngunulweze yilayi ni yikomokeso yize Zambi Chitunda halinga kuli yami.

³ Yilayi yenyi yinene, yikomokeso yenyi ya ndundo. Wanangana wenyi wa mutolo; chiyulo chenyi chakola chize ku chisemuko ndo ku chisemuko.

⁴ Yami Nabukanezore napwile mu zuwo liami kanawa lume; nawahililile ni milimo yami mu palasiu.

⁵ Natetele chilota cha kungukolesa woma. Shimbu napombele ha muhela, manyonga ni usolwelo wa mutwe wami yangunehenene mwongo.

⁶ Kashika nahanyine shimbi angunehene akwa mana eswe a Babilonia angulumbunwine chilota chami.

⁷ Kashika yimbanda, ni tahi, ni A-Kaletea, ni aprofeta yeza; yingwalweza che chilota, alioze kahashile kungulumbunwinacho.

⁸ Ha kusula Daniel yeza kumeso jami—yoze amulukile Belteshazare mumu hali zambi yami, iye kali ni Spiritu ya mazambi asandu—yingumulweza chilota chami ngwami,

⁹ Ena Belteshazare, chimbanda wa lutwe, mungukulweza chilota chize namwene mumu ngunanyingika Spiritu ya mazambi asandu uli nenyi, kashika nichimwe chijimbikilo muchikukala naye; ungulumbunwinecho.

¹⁰ Usolwelo wa mutwe wami shimbu nguchili ha muhela, uno: namwene, kumanyi, umwe mutondo hakachi ka hashi, Chizundamo chawo chisuku chikolo.

¹¹ Mutondo yiutatuka, yiukola ndo songo liawo yiliheta kwilu, yilimoneka hashi heswe.

¹² Mafwo jawo apema ni mihuko yawo ya kulumbama, yapwile ya kulia eswe. Tushitu a mu yambu yawana chihuhumuke mushi liawo; tujila a mu tetela yatwama mu mitango yawo; mba akwa musunya eswe alileko.

¹³ Yingumona mu usolwelo wa mutwe wami ha muhela wami, kalayi kanda musandu kanahulumuka mwilu.

¹⁴ Yatambika mutambi ngwenyi, Pakulenu mutondo; sembenu mitango yawo; hululenu mafwo jawo; mwangenu mihuko yawo; tushitu amwangane mushi liawo; ni tujila amwangane ku mitango yawo.

¹⁵ Alioze hichikenu shina lia miji mu mavu nukalikase ni chikungo cha utale ni unengu hakachi ka mwambu wisu wa musenge. Akawule ni mume wa mwilu; akende ni tushitu mu yambu ya hashi.

¹⁶ Kunyonga chenyi cha mutu akamuchizecho, ukamwehe kunyonga cha kashitu, mba tungonde shimbiali akamupalike.

¹⁷ Upatwilo uno wa ku shimbi ja tulayi; chiyulo chino cha ku liji lia asandu hanga akwa mwono akanyingike, mwe Chitunda kakuyula mu wanangana wa atu, kakuuhana kuli mweswawo mapala; kakusa alelu chikolo hakachi ka atu akauyule.

¹⁸ Chilota chino yami mwanangana Nabukanezore namwene. Kashika yena Belteshazare ungulumbunwinecho, mumu akwa mana eswe a mu wanangana wami kahashile kungulweza ulumbunwiso wacho. Alioze yena unahase mumu Spiritu ya mazambi asandu katwama muli yena.

¹⁹ Aho Daniel, jina lienyi likwo Belteshazare, yatatajala shimbu linene, ni manyonga jenyi yamuvwisa woma. Mwanangana yamba ngwenyi, Belteshazare, chilota chino ni ulumbunwiso wacho kanda chikuvwisa woma. Belteshazare yakumbulula ngwenyi, Mwene wami, chilota chino chikapwe kuli waze akunuvwila kole, ni ulumbunwiso wacho ukapwe kuli akwa kole jenu.

²⁰ Mutondo uno wamona, uno watatukile ni kukola ndo songo liawo liaheta kwilu nikumoneka ndo ku songo lia hashi heswe,

²¹ mafwo jawo apema, ni mihuko yawo ya kulumbama, yapwile ya kulia eswe, ni tushitu a mu yambu awanyine chihuhumuke mushi liawo, ni tujila a mu tetela atwamine mu mitango yawo—

²² mutondo uno, yenu mwanangana; hinwatatuka hinwakola. Unene wenu watatuka, hiwaheta kwilu, ni chiyulo chenu hichaya ndo ku masongo a hashi.

²³ Mba haze enu mwanangana nwamwene kalayi, kanda musandu, kanahulumuka mwilu nikwamba ngwenyi, Pakulenu mutondo nukawenyeke, alioze hichikenu shina lia miji mu mavu, lia kukasa ni chikungo cha utale ni unengu, hakachi ka mwambu wisu wa mu musenge. Akawule ni mume wa mwilu, akende ni tushitu a mu yambu ndo tungonde shimbiali amupalike—

²⁴ ulumbunwiso kuli yenu mwanangana, uno: Chino cheza hali mwene wami mwanangana, shimbi ya mwe Chitunda,

²⁵ akanuhume hakachi ka atu; wendelo wenu muukapwa hakachi ka tushitu a mu yambu; makanulisa mwambu ngwe ngombe, munukawula ni mume wa mwilu, ndo tungonde shimbiali hanupalika, nukanyingike mwe Chitunda kakuyula mu wanangana wa atu nikuuhana kuli mweswawo mapala.

²⁶ Mba chize atumine kuhichika shina lia miji ya mutondo, chocho wanangana wenu muukola kuli yenu chize ku tangwa lize mununyingika ngwenu, Malilu, o kakuyula.

²⁷ Kashika mwanangana, tambulenu chiyulo chami. Tetenu milonga yenu, nukalinge ululi. Tetenu uhenge wenu ha kulinga keke kuli waze anaapinjisa hanga kuhwima chenu chikasuhe hanji.

²⁸ Chino cheswe chawanyine mwanangana Nabukanezore.

²⁹ Kulutwe lia kumi lia tukweji ni tukweji aali wapwile ni kwolola molu ha fulumba lia palasiu ya wanangana wa Babilonia,

³⁰ mba mwanangana yamba ngwenyi, Ayino, ngwami, ye Babilonia yinene ya kutunga yami mwene ni ndundo jami ja ngolo yikapwe zuwo lia wanangana ni uhenya wa wanangana wami nawa.

³¹ Shimbu te maliji achili mu kanwa lia mwanangana, kwejile liji lia mwilu ngwo, Mwanangana Nabukanezore! Kuli yena liji lino lineza ngwami, Wanangana hiwakukatuka,

³² mba makuhuma hakachi ka atu, ni wendelo we muukapwa hakachi ka tushitu a mu yambu. Muolia mwambu ngwe ngombe, mba tungonde shimbiali makakupalika ndo hiwalilongesa, mwe Chitunda kakuyula mu wanangana wa atu ni kuuhana kuli mweswawo mapala.

³³ Haze hene liji lino liamanunukine hali Nabukanezore. Amuhumine hakachi ka atu; yalia mwambu ngwe ngombe; mujimba wenyi wawulile ni mume wa mwilu ndo kambu jenyi jasuhile ngwe mangona a pupa, ni yala yenyi ngwe yala ya kajila.

³⁴ Ku songo Iia matangwa, yami Nabukanezore nahetwile meso jami kwilu, mba mana jami janguhilukile nawa. Nafumanyishine mwe Chitunda nikumuhalisa nikulemesa yoze watwama ni mwono ndo ku miaka yeswe ngwami, Mumu chiyulo chenyi chapwa cha mutolo, ni wanangana wenyi walinduluka chize ku chisemuko ndo ku chisemuko.

³⁵ Akwa hashi eswe kapwa ngwe nichimwe; iye kakulinga upale wenyi hakachi ka akwa mwilu ni hakachi ka akwa hashi. Iya makwika kwoko lienyi, hanji mamwamba ngwenyi, Yika unalingi?

³⁶ Haze hene mana jami anguhilukile nawa, ni ku ulemu wa wanangana wami, ulamba ni uhenya wanguhilukile nawa. Tuliamanga twami ni alemu jami angufupile nawa; angukolesele mu wanangana wami, ni ulemu ukwo anguwezelele helu.

³⁷ Kashika yami Nabukanezore ngunahalisa Mwanangana wa mwilu, ni kumwalakana, ni kumulemesa; mumu yitanga yenyi yinalulama, ni ndako jenyi jinalite; kanahase kukehesa waze eswe akwenda nikulilengela.