Daniel 2 - MUKANDA USANDU WA ZAMBI 1975

¹ Ha mwaka wamuchiali wa kuyula cha Nabukanezore, mwe Nabukanezore watetele yilota; kashika Spiritu yenyi yilifwita, kahashile kuya tulo.

² Henaho mwanangana yatuma kusanyika yimbanda, ni tahi, ni akwa tufutafuta, ni A-Kaletea akalumbunune kuli mwanangana yilota yenyi. O yeza, yamana kumeso ja mwanangana.

³ Mwanangana yamba kuli ayo ngwenyi, Nateta, Spiritu yami yinalifwichi ngukanyingike chilota chami.

⁴ A-Kaletea yamba kuli mwanangana mu limi lia A-Seria ngwo, Vulie, mwanangana. Nulweze chilota chenu kuli yetu tuvumbi twenu mba mutuchilumbununa.

⁵ Mwanangana yakumbulula A-Kaletea ngwenyi, Liji liami lia pundu; nyi kunwangulwezele che chilota ni ulumbunwiso wacho, manupapulula kwoko ni kulu, ni mazuwo jenu maapuzula.

⁶ Alioze nyi munulweza chilota ni ulumbunwiso wacho mungunwaha yawana, ni kwononona, ni ulemu wunji. Kashika ngulwezenu chilota ni ulumbunwiso wacho.

⁷ O yakumbulula kamuchiali ngwo, Mwanangana alweze chilota kuli yetu tuvumbi twenu mba mutuchilumbununa.

⁸ Mwanangana yakumbulula ngwenyi, Ngunanyingika pundu, nunazange kusuhisa pande, mumu nunamono, liji liami Hapwa lia pundu.

⁹ Nyi kunwangulwezele chilota upatwilo umuwika uliko kuli yenu. Hinwalitesa kuhanjika maliji a mahuza, maliji api kuli yami ndo yuma muyalumuka. Kashika ngulwezenu che chilota, mba mungunyingika ngwami, Munuhasa kungulumbunwinacho.

¹⁰ A-Kaletea yakumbulula mwanangana ngwo, Kuheshi umwe mutu hashi yoze mahasa kulinga chino mwanangana kanambe. Mumu niumwe mwanangana munene, wa ngolo, hafupa chuma chipwa haha kuli umwe chimbanda, hanji tahi, hanji Ka-Kaletea.

¹¹ Chuma chino mwanangana kanafupu, chuma chikalu; niumwe mahasa kuchilweza kuli mwanangana ndo mazambi wika, waze katwamine hamwe ni atu a musunya.

¹² Ha chikuma chino mwanangana yatenuka ni ufwatulo wunji. Yatuma kwonwona akwa mana eswe a mu Babilonia.

¹³ Chocho shimbi yayile akashihe akwa mana eswe, kashika yafupa Daniel ni masepa jenyi akaashihe.

¹⁴ Mba Daniel yahanjika ni mana ni malinjekela kuli Arioke, kapitau ka tulayi twa mwanangana, yoze te haya kushiha akwa mana a mu Babilonia.

¹⁵ Yamba kuli Arioke kapitau ka mwanangana ngwenyi, Kuchi te shimbi ya mwanangana yakala chocho? Arioke yalumbununa che chuma kuli Daniel.

¹⁶ Mba Daniel yanjila, yalembelela kuli mwanangana amusele ola akalweze kuli mwanangana ulumbunwiso.

¹⁷ Henaho Daniel yaya ku zuwo lienyi, yalumbununa chikuma kuli masepa jenyi, Hanania, ni Mishaele, ni Azaria,

¹⁸ nikwashinjila akalembele keke kuli mwe Zambi ya mwilu ha kutwala ku chijimbikilo chino, kuchina Daniel ni masepa jenyi akakuwe ni akwa mana akwo a mu Babilonia.

¹⁹ Henaho chijimbikilo achijimbwile kuli Daniel mu usolwelo ha ufuku. Kashika Daniel yahalisa Zambi ya mwilu.

²⁰ Daniel yamba ngwenyi, Akafumanyise jina lia Zambi ndo ku miaka ya mutolo, yoze uli ni mana ni ndundo.

²¹ Iye kakwalumuna miaka ni tungonde; kakuchiza mianangana; kakumika mianangana. Kakuhana mana kuli akwa mana; kakuhana yinyingi kuli waze yuma muyialumbunuka.

²² Kakufukula yuma yikalu ni yijimbikilo; kananyingika chize chili mu milima, pangu liatwama kuli iye.

²³ Kuli yena, Zambi ya tulamba twami, ngunasakwila, ngunahalisa, mumu wangwaha mana ni tachi. Hiwangunyingikisa chuma chize twechile kuli yena, mumu hiwatunyingikisa chikuma cha mwanangana.

²⁴ Kashika Daniel yaya kuli Arioke yoze mwanangana hasela kwonwona akwa mana a mu Babilonia. Yaya, yamba kuli iye ngwenyi, Kanda onwona akwa mana a Babilonia. Ngutwale kuli mwanangana, mba mungumulweza ulumbunwiso.

²⁵ Kashika Arioke yatwala Daniel kuli mwanangana fuji. Yamba kuli iye ngwenyi, Hinawana hakachi ka njize ja ku Yunda umwe lunga mahasa kulweza kuli mwanangana we ulumbunwiso.

²⁶ Mwanangana yamba kuli Daniel, jina lienyi likwo Belteshazare, ngwenyi, Yena muhasa kungulweza chilota chize namwene, ni ulumbunwiso wacho nyi?

²⁷ Daniel yakumbulula kuli mwanangana ngwenyi, Niamwe akwa mana, hanji tahi, hanji yimbanda, hanji aprofeta mahasa kulweza kuli mwanangana chuma chino hanechi.

²⁸ Alioze umwe Zambi mwilu mwali mukwa kujimbula yijimbikilo, mba iye hasolola kuli mwanangana Nabukanezore yuma yize muyikapwa ha matangwa a kusula. Chilota chenu ni usolwelo wa mutwe wenu shimbu nuli ha muhela wenu, yino:

²⁹ Kuli yenu mwanangana, shimbu nunachipombo ha muhela wenu kwejile manyonga a yuma yize muyiza kulutwe; ni mukwa kujimbula yijimbikilo wanulwezele chize muchiza kupwa.

³⁰ Alioze ha kutwala kuli yami, chijimbikilo chino hanangujimbwilacho hanga mwanangana akanyingike ulumbunwiso, hanga nukanyingike manyonga a mu mutwe wenu. Kuchapwile ngwe yami nguli ni mana kuhiana akwa mwono akwo.

³¹ Enu mwanangana nwamwene umwe kaponya munene. Kaponya yono wa ndundo ni uhenya wahiana wamanyine kumeso jenu, mba wasolokele kole ni woma.

³² Mutwe wa kaponya wapwile wa oru yipema; pambo lienyi ni moko yapwile ya prata; jimo lienyi ni mashina ja molu yapwile ya unengu;

³³ molu jenyi apwile a utale; ni yiliato yenyi chihanda cha utale ni chihanda cha uma.

³⁴ Shimbu munuchitala, liwe limwe alipulile, alioze hi ni kwoko lia mutu ko. Lialambile kaponya ha yiliato yenyi ya utale ni uma, yayipalwola.

³⁵ Henaho utale, ni uma, ni unengu, ni prata, ni oru, yeswe yafwenyokene hamuwika; yalumuka ngwe yizungu ya ha chizungwilo cha ha lwiza, mba fuji yiyiyihehula chocho kahashile kuwana chipwe kamwe kachinyingi kayo. Alioze liwe lize lialambile kaponya lialumukine lumulundu lunene; liazalishile hashi heswe.

³⁶ Che chilota chenacho; haliapwila mutulumbununa kuli mwanangana ulumbunwiso wacho.

³⁷ Enu mwanangana, mwe mwanangana wa mianangana, kuli yenu Zambi ya mwilu hananwehe wanangana, ni ndundo, ni ngolo, ni uhenya;

³⁸ kuli yenu hanakunjika ana ja atu kweswako atwama, ni tushitu a mu yambu, ni tujila a mu tetela, ni kunupwisa mukwa kwayula eswe—yenu nuli we mutwe wa oru.

³⁹ Kulutwe lia yenu mukusoloka wanangana ukwo kuwalemene ngwe yenu; ni wanangana ukwo nawa wamuchitatu wa unengu muukayula hashi heswe.

⁴⁰ Kumukukapwa nawa wanangana ukwo wamuchiwana, ukolo ngwe utale, mumu utale wakupalwola ni kushiha yuma yeswe. Chizechene ngwe utale wakufwenya, chocho wanangana uno nawa muupalwola nikufwenya yino yikwo yeswe.

⁴¹ Chize nwamwene yiliato ni minwe, chihanda cha uma wa tengi ni chihanda cha utale, chocho muupwa wanangana wa kupula. Hindu kukola cha utale muchipwamo chizechene ngwe nwamwene utale wa kuchinga ni uma wa malowa.

⁴² Chizechene ngwe minwe ya yiliato yapwile kanda ya utale kanda ya uma, chocho wanangana muukapwa kanda ukolo kanda ulelu.

⁴³ Chizechene ngwe nwamwene utale wa kuchinga ni uma wa malowa, chocho malinungisa umwe ni mukwo ni ana ja atu. Hindu kechi kakola hamuwika, chizechene ngwe utale kuushi kulikwata ni uma.

⁴⁴ Ha matangwa ja mianangana aze Zambi ya mwilu makakolesa umwe wanangana uze kuuchi kanonga. Chipwe chiyulo chawo kechi kachiswanyisa kuli atu eka. Muukafwenya mawanangana ano akwo ni kwasulisa, alioze wene muukakola wa mutolo,

⁴⁵ chizechene ngwe nwamwene liwe lia kupula ku mulundu, hi ni kwoko lia mutu ko, mba Mapalwola utale, ni unengu, ni uma, ni prata, ni oru. Mwe Zambi munene halweza kuli mwanangana chize muchikapwa kulutwe. Chilota cha pundu, ni ulumbunwiso wacho wamwenemwene.

⁴⁶ Aho mwanangana Nabukanezore yafulamana, yawayila Daniel. Yatuma akalambule mulambu kuli Daniel ni insensu.

⁴⁷ Mwanangana yamba kuli Daniel ngwenyi, Pundu, Zambi ye mwe Zambi ya mazambi, ni Mwene wa mianangana; kapwa nawa mukwa kujimbula yijimbikilo se yena hiwahasa kujimbula chijimbikilo chino.

⁴⁸ Mba mwanangana yahana kuli Daniel ulemu unene ni yawana yinji yinene. Yamupwisa mukwa kuyula provincia yeswe ya Babilonia, ni mukwa lutwe hakachi ka akwa mana ja Babilonia.

⁴⁹ Daniel yeta kuli mwanangana, mba yasela Shadrake, ni Meshake, ni Abedenego helu lia yiyulo ya provincia ya Babilonia; alioze Daniel watwamine ku zuwo lia mwanangana.