Daniel 12 - MUKANDA USANDU WA ZAMBI 1975

¹ Ha mwaka uze Mikele, mwe mukwa kuyula munene yoze wakufunga ana ja atu je, makamana; kumukukapwa mwaka wa lamba limwe, kanda lisoloka chize ku uputukilo wa vungu lino ndo ku miaka yize. Ha mwaka uze atu je kumakaapulula, atu eswe aze makaawana a kusoneka mu mukanda.

² Anji a waze akupomba tulo mu mavu a hashi kumakahinduka, amwe ku mwono wa mutolo, amwe ku sonyi ni sau lia mutolo.

³ Waze ali ni mana kumakapanguka ngwe pangu lia mwilu. Waze matewulwila anji ku ululi makapanguka ngwe matongonoshi ndo ku miaka yeswe ya mutolo.

⁴ Alioze yena Daniel, yika maliji wano, jika we mukanda, ndo ku mwaka wa ku songo. Anji muzombokela kweka ni kweka; mokesa yinyingi.

⁵ Mba yami Daniel natalile, kumanyi kwamanyine atu akwo aali, umwe ha mbumbulu ya lwiji sali lino, ni mukwo ha mbumbulu ya lwiji sali lize.

⁶ Umwe wambile kuli lunga yoze unazala mahina a linyu, yoze te unamana helu lia meya a lwiji ngwenyi, Miaka yingahi ndo ku songo lia yikomokeso yino?

⁷ Nevwile lunga yoze wa mazalo a linyu, uli helu lia meya a lwiji, muze hazoza kwoko lienyi lia chindume ni kwoko lienyi lia chimeso kwilu, walishingile ni yoze watwama ni mwono ku miaka ya mutolo ngwenyi, Kumuchi kapwa ha mwaka, ni miaka yiali, ni chihanda cha mwaka. Muze hamana kumakwona tachi ja atu asandu, mba yuma yino yeswe muyihwa.

⁸ Ami nevwile, hindu kuchangulumbunukine, kashika nambile ngwami, Mwene wami, songo lia yuma yino kuchi mulipwa?

⁹ Aye yamba ngwenyi, Daniel, yako kwe, mumu wano maliji a kuyika ndo ku mwaka wa ku songo.

¹⁰ Anji malipemesa, ni kulitomesa, ni kulieseka; alioze yingulungulu malinga ungulungulu; mba yino yuma kuyichi kulumbunuka kuli niumwe chingulungulu. Alioze muyilumbunuka kuli waze ali ni mana.

¹¹ Chize ku tangwa lize makachiza mulambu wa kulumba wa matangwa eswe, ni kumika cha chizelwokeso cha kwenyeka, kumukukapwa kanunu ka matangwa ni kulakaji aali a matangwa ni makumi livwa a matangwa.

¹² Kawaha mukwa kutwaminyina akahete ku kanunu ka matangwa ni kulakaji atatu a matangwa ni makumi atatu a matangwa ni matangwa atano.

¹³ Alioze yena, yako kwe ndo mukukapwa songo; mumu kumukahwima, mba kumukamana kuma kwe ha songo lia matangwa.