Daniel 11 - MUKANDA USANDU WA ZAMBI 1975

¹ Ha kutwala kuli yami, mu mwaka utangu wa Ka-Media Dariu, ami namanyine kumukolesa ni kumutakamisa.

² Mba haliapwila mungukulumbunwina umwenemwene. Tala, mianangana atatu akwo makasoloka mu Persia; mba wamuchiwana mapwa pichi kuhiana o eswe. Muze hatambula tachi ku upite wenyi, mavundula eswe kulimika ni Ngresia.

³ Henaho umwe mwanangana wa ndundo masoloka; aye mayula ni chiyulo chinene nikulinga cheswacho mapala.

⁴ Mba muze hatatuka, wanangana wenyi maumakuna ni kuupangila ku mafuji awana a mwilu alioze hi kuli ana jenyi ko; ni kuyula kechi kayula nikulita ni chiyulo chenyi, mumu wanangana wenyi mautukula akauhane kuli akwo nawa helu lia wano.

⁵ Henaho mwanangana wa ku Sule mapwa ni tachi, alioze umwe wa akwa kuyula jenyi mamuhiana ni tachi, ni chiyulo chenyi muchipwa chiyulo chinene.

⁶ Kulutwe lia miaka yimwe makolesa usendo, ni mwana wa pwo, wa mwanangana wa ku Sule meza kuli mwanangana wa ku Norte akalikate. Alioze tachi ja kwoko lienyi mwene kechi katwama najo, ni mwe mwanangana wa ku Sule kechi kalinduluka, chipwe kwoko lienyi; ni mwana yoze wa pwo, mamukunjika, ni waze amunehene, ni yoze wamusemene, ni waze amutakamishine.

⁷ Ha miaka yize umwe mwana wa ku miji yenyi makasoloka kuma kwenyi. Kumeza kulimika ni tujita. Makanjila mu chihunda cha kukolesa cha mwanangana wa ku Norte; makalinwa no, makakumba.

⁸ Makambata mazambi jo, ni tuponya two a kuzuzulula, ni yuma yo yipema ya prata ni oru; makayitwala ku Engitu. Mba ha miaka yimwe mecha mwanangana wa ku Norte.

⁹ Mwanangana wa ku Norte makanjila mu chifuchi cha mwanangana wa ku Sule, alioze makahiluka ku chifuchi chenyi mwene.

¹⁰ Ana jenyi makasa jita ni kukungulula chihuji cha tujita a tachi, o makeza ni kusupwokela ni kupalika ndusu. Makahiluka ni kwasa jita ndo ku chihunda chenyi cha kukolesa.

¹¹ Mba mwanangana wa ku Sule makevwa ufwatulo, matuhuka ni kwasa nenyi jita, ngwami, ni mwanangana wa ku Norte. Aye makatuma chihuji chinene alioze chihuji chinene makachikunjika mu kwoko lienyi.

¹² Muze hakwata che chihuji, mbunge yenyi muyikazunduka, mba makanunguna makumi a tununu, hindu kechi kakumba.

¹³ Mba mwanangana wa ku Norte makeza nawa; makasaho chihuji nawa chahiana chize chikwo; makeza ku songo lia miaka ni tujita anji ni yikwata yinji.

¹⁴ Ha miaka yize anji malimika ni mwanangana wa ku Sule. Chikwo nawa amwe akwa upupilo hakachi ka atu je makakatuka akamanunune usolwelo; alioze makahona.

¹⁵ Chocho mwanangana wa ku Norte makeza; makalumbika mulumba; matambula chihunda cha kukolesa ni chipanga-cha-mawe; ni tujita a ku Sule kechi kahasa kukumba, chipwe atu jenyi a kusakula, chipwe tachi ja kukumba kujichi kapwako.

¹⁶ Alioze yoze makeza kulimika nenyi makalinga nikulita ni upale wenyi mwene; niumwe mahasa kujikiza kumeso jenyi. Makamana mu chifuchi cha uhenya; kwonwona muchikapwa mu kwoko lienyi.

¹⁷ Makasa meso jenyi kwiza ni tachi ja wanangana wenyi weswe ni akwa ululi hamwe nenyi. Kumakalinga upale wenyi. Makamwaha mwana wa pwo akamwenyeke, alioze chipwe iye kechi kamana, chipwe kumukwasa.

¹⁸ Kulutwe lia chino makasa meso jenyi ku yifuchi ya mbaka; makatambula yinji; alioze umwe mukwa kuyula makasulisa shino lienyi, ewa, makahilwisa shino lienyi hali iye mwene.

¹⁹ Mba makatalikisa meso jenyi ku yihunda ya kukolesa ya chifuchi chenyi mwene, alioze matalinga, malimbuka, kechi kamuwana.

²⁰ Umwe makasoloka kumusalakana, makatuma mukwa kufwetesa lijimu ndusu mu uhenya wa wanangana, alioze kulutwe lia matangwa makamakuka, hi mu utenu ko hanji mu jita, ka.

²¹ Mukwiza kumusalakana umwe mukwa kusauka, te uhenya wa wanangana kamuhelewo, alioze makeza ha mwaka wa kuhwima ni kuzuka wanangana ni kupepieka.

²² Mbunga ja tujita kumujikahungumuka kumeso jenyi, makajimakwona, chipwe mwe mukwa kuyula wa usendo.

²³ Chize ku mwaka wa kukolesa nenyi usendo makalinga ni mafwefwe; maliwezela tachi ni vungu likepe.

²⁴ Ha mwaka wa kuhwima makeza ndo ku yihanda ya chifuchi yize yili ni upite wunji. Makalinga yuma atato kalingile, chipwe akako, ni kumwanga hakachi ko upite wa kupupa, ni upite wa ku jita, ni yikumba. Makataka manyonga a kulimika ni yihunda ya kukolesa, alioze ha kashimbu wika.

²⁵ Makavundula tachi jenyi ni hamu lienyi ni mbunga yinene ya tujita kulimika ni mwanangana wa ku Sule. Mwanangana wa ku Sule makalitachika ni jita ni mbunga yinene yahiana ya tujita a ndundo, hindu kechi kahasa kujikiza mumu mamutakila yuma ya kulimika nenyi.

²⁶ Chipwe waze akulia kulia chenyi chipema, mamwonwona, ni tujita twenyi makahungumuka, ni anji makaashiha.

²⁷ Ha kutwala kuli mianangana wano aali, mbunge jo mujikapwa ja kulinga chipi. Makahanjika mahuza ku mesa yimuwika; hindu kuchichi kakola, mumu songo liacho mulipwa ha mwaka wa kufunjika.

²⁸ Makahiluka ku chifuchi chenyi ni yikumba yinji; alioze mbunge yenyi muyikalimika ni usendo usandu. Makalinga upale wenyi, mba makahiluka ku chifuchi chenyi mwene.

²⁹ Ha mwaka wa kufunjika makahiluka, makeza nawa mu chifuchi cha ku Sule, alioze chisuho chino kuchichi kapwa ngwe chisuho chitangu.,

³⁰ Mumu mato a ku Kitime makeza kulimika nenyi, kashika makevwa kupiha, makahiluka, makevwa ufwatulo ni usendo usandu, makalinga upale wenyi. Makahiluka kunyima akapanjike kuli akwa kwehuka usendo usandu.

³¹ Maswalale a kuli iye makasoloka; makajilula zuwo lisandu ni zuwo lia mbonge; makachiza mulambu wa kulumba wa matangwa eswe, mba makamika chizelwokeso cha kwenyeka.

³² Waze akulinga chipi ni usendo makaapepieka nikwahengesa; alioze atu aze ananyingika Zambi yo makatakama, makalinga.

³³ Ni akwa mana hakachi ka atu makalongesa anji. Hindu makafwa ni katana, ni kahia, ni ufunge, ni kwapwisa ngwe upite wa jita, matangwa anji.

³⁴ Muze malimbuka, maakwasa hakehe. Anji makalifutula no ni maliji a kupepieka.

³⁵ Amwe akwa mana makalimbuka hanga akaeseke nikwapemesa ni kwatomesa chipwe ndo ku mwaka wa kusula. Hindu che chuma muchitwaminyina mwaka wa kufunjika.

³⁶ Mwe mwanangana makalinga nikulita ni upale wenyi mwene. Makalinangamisa, ni kulifuza helu lia mazambi eswe. Makahanjika yuma ya kukomwesa ya kulimika ni mwe Zambi wa mazambi. Kumakaya kulutwe ndo utenu hiwamanunuka; mumu chize hanafunjika kumuchikalingiwa.

³⁷ Kechi kalemesa mazambi ja tulamba twenyi, chipwe usolo wa mapwo, chipwe kulemesa zambi niumwe, mumu makalinangamisa helu lia yuma yeswe.

³⁸ Alioze kusalakana yino yuma makalemesa zambi ya tachi ja jita; zambi umwe tulamba twenyi kamunyingikine aye kumakamulemesa ni oru, ni prata, ni mawe a ndando yilemu, ni yuma yipema.

³⁹ Makapupa mbonge ja tachi, ni umwe zambi weka mamukwasa. Makalemesa ni uhenya mweswe mamutayiza, makaapwisa kuyula anji. Kumakatetateta chifuchi ha ndando.

⁴⁰ Ha mwaka wa kusula mwanangana wa ku Sule makalitachika nenyi, alioze mwanangana wa ku Norte makeza kulimika nenyi ngwe chijimbi ni matemba-a-jita, ni akwa tuvwalu ni mato anji. Makanjila mu yifuchi ni kutanda ni kupalika ndusu.

⁴¹ Makanjila nawa mu chifuchi cha uhenya, ni anji makaanunguna. Alioze wano makapuluka ku kwoko lienyi: Endome, ni Moape, ni akwa lutwe ja A-Amone.

⁴² Kumakazoza kwoko lienyi nawa ha yifuchi, ni Engitu kuyichi kapuluka.

⁴³ Makapwa ni chiyulo ha upite wa oru, ni prata, ni ha yuma yeswe yipema ya Engitu, ni A-Lutu, ni A-Etiopia makapwa mu ngano jenyi.

⁴⁴ Alioze lusango wa ku Chivumbuko ni wa ku Norte makamuvwisa woma mba makaya ni ufwatulo unene akanongese nikwonwona liakulu anji.

⁴⁵ Makajika mbalaka ja palasiu yenyi hakachi ka kalunga-lwiji ni mulundu usandu wa uhenya. Hindu kumakaheta kwe ku songo lienyi, ni yoze mamukwasa wakuhi.