Daniel 10 - MUKANDA USANDU WA ZAMBI 1975

¹ Ha mwaka wamuchitatu wa Siru mwanangana wa Persia, limwe liji alihanyine kuli Daniel yoze uli ni jina likwo Belteshazare. Liji lize liamwenemwene; ye jita yisuku. Aye yasa chinyingi lie liji; usolwelo wamulumbunuka.

² Ha matangwa aze yami Daniel napwile ni chinyengo semana jitatu ja muwundu.

³ Chalile yuma yipema; chipwe yifwo, chipwe vinyu, kuyanjilile mu kanwa liami, chipwe kulikwita maji ka, ha semana jitatu ja muwundu.

⁴ Ha tangwa makumi aali ni liamuchiwana lia kakweji mutangu, shimbu munguchimana ha mbumbulu ya lwiji munene, mwe Hidekele,

⁵ yinguhetula meso jami kutala, kumanyi, umwe lunga kanazala mahina a linyu, mu zalilo yenyi yalijichika ni muya wa oru ya Ufaze.

⁶ Mujimba wenyi yiupwa ngwe turkeza; ku meso jenyi ngwe mihenyo; meso jenyi ngwe masoka a kahia; moko jenyi ni molu jenyi kanalejima ngwe unengu wa kucheka; lundunjila wa maliji jenyi yapwa ngwe chinumo cha chihuji cha atu.

⁷ Yami Daniel yingumona usolwelo ukawami mumu malunga aze napwile no kamwene usolwelo, alioze kuchikima chinji yichiakwata; yachina aswame.

⁸ Chocho yingusala ukawami, mba yingumona usolwelo uno unene. Tachi chapwile najo; kuwaha chami cha ku meso hichalumuka kupiha; chasalile nawa ni tachi.

⁹ Yingwivwa lundunjila wa liji lienyi, mba ha kwivwa lundunjila wa liji lienyi, nafulamanyine hashi ni tulo anji, ni meso jami mu mavu.

¹⁰ Kwoko yilingusunga ni kunguchikimisa ha moko jami ni makungunwa jami.

¹¹ Yamba kuli yami ngwenyi, Daniel, mutu wa kuzanga chikolo, panjika kanawa ku maliji jami kuli yena. Mana ha molu je mumu haliapwila hangutuma kuli yena. Shimbu machihanjika liji lino ni yami, yingumana nikuchikima.

¹² Aye yamba kuli yami ngwenyi, Daniel kanda wivwa woma, mumu chize ku tangwa litangu lize wasele manyonga je yino yuma yikulumbunuke, ni kulikehesa kumeso ja Zambi ye, hapanjika ku maliji je, mba yami hineza ha mukunda wa maliji je.

¹³ Mukwa kuyula wanangana wa Persia yalimika ni yami makumi aali a matangwa ni tangwa limuwika, alioze Mikele umwe wa akwa lutwe hakachi ka akwa kuyula yeza, yangukwasa, mba yingusalako ni mukwa kuyula wanangana wa Persia.

¹⁴ Haliapwila hineza ngukulumbunwine yize muyikawana atu je ha matangwa a kusula. Mumu usolwelo watwala ku matangwa aze meza kwiza.

¹⁵ Muze hangwamba maliji wano natalile hashi nikuhola.

¹⁶ Kumanyi, umwe wa kulifwa ni ana ja atu yangusunga ku mivumbo; mba napakwile kanwa liami ni kuhanjika. Yingwamba kuli yoze kanamana kumeso jami ngwami, Mwene wami, yikola hiyangukwata, chishi nawa ni tachi ha mukunda wa usolwelo.

¹⁷ Kuchi yami kavumbi ka mwene wami munguhanjika ni mwene wami? Tachi nijimwe chishi najo chipwe mwiku.

¹⁸ Cheka nawa umwe walifwa ni mutu wangusunga ni kungutakamisa.

¹⁹ Yamba ngwenyi, Mutu wa kuzanga chikolo, kanda wivwa woma, sambukila yikapwe kuli yena; takama ukapwe ni hamu linji. Ha kuhanjika ni yami yingwivwa tachi, yingwamba ngwami, Mwene wami ahanjike mumu hiwangwaha tachi.

²⁰ Mba iye yamba ngwenyi, Unanyingika chize changunehene kuno kuli yena? Alioze haliapwila munguhiluka ngukalitachike ni mukwa kuyula Persia; mba muze hinamana nenyi mukwa kuyula Ngresia meza.

²¹ Alioze mungukulweza chize chinasonewa mu mukanda wa umwenemwene. Niumwe kakungukwasa kulitachika ni wano shina Mikele wika, mukwa kunuyula.