Daniel 1 - MUKANDA USANDU WA ZAMBI 1975

¹ Ha mwaka wamuchitatu wa kuyula cha Jehoakime mwanangana wa Yunda, Nabukanezore mwanangana wa Babilonia yeza ku Yerusaleme, yayiseleka.

² Mwene yakunjika Jehoakime mwanangana wa Yunda kuli iye, hamwe ni yikwachilo yimwe ya mu zuwo lia Zambi. Yayineha ku chifuchi cha Shinare, ku zuwo lia zambi yenyi. Yasa yikwachilo mu zuwo lia kutulikila upite wa zambi yenyi.

³ Mba mwanangana yatuma Ashepenaji, unuku wenyi wa lutwe, kuneha amwe hakachi ka atu ja Izalele; amwe a ku munyachi wa mwanangana, ni amwe atu alemu;

⁴ akweze keshi kapalia, apema chikolo, ni akwa kujama ni mana eswe, ni yinyingi, akwa kulongoloka, waze mahasa kuvumbika mu zuwo lia mwanangana, akaalongese je sona ni limi lia A-Kaletea.

⁵ Mwanangana yaasela tangwa ha tangwa chihanda cha kulia chipema chize mwanangana alile, ni cha vinyu yize anwine. Te maalongesa miaka yitatu, mba ku songo lia miaka yize mamana kumeso ja mwanangana.

⁶ Hakachi ka wano kwapwile Daniel, ni Hanania, ni Mishaele, ni Azaria a ku munyachi wa Yunda.

⁷ Unuku wa lutwe waalukile majina: Daniel yamuluka ngwenyi, Belteshazare; Hanania yamuluka ngwenyi, Shadrake; Mishaele yamuluka ngwenyi, Meshake; ni Azaria yamuluka ngwenyi, Abedenego.

⁸ Alioze Daniel yasa mbunge yenyi ngwenyi, Chichi kulichisa ni kulia chino chipema cha mwanangana, chipwe ni vinyu yino akunwa. Kashika yeta kuli unuku wa lutwe amutayize kanda alichisa.

⁹ Zambi yanyongesa unuku wa lutwe vumbi ni keke ha kutwala kuli Daniel.

¹⁰ Unuku wa lutwe yamba kuli Daniel ngwenyi, Woma ngunevu kuchina mwene wami mwanangana, yoze wanuselele kulia chino ni kunwa chino, manumona ngwe akweze ni akwenu kanapeme, enu nunapiha. Chocho munusa mutwe wami mu Utoji kuli mwanangana.

¹¹ Mba Daniel yamba kuli kaselo yoze unuku wa lutwe hasela hali Daniel, ni Hanania, ni Mishaele, ni Azaria ngwenyi,

¹² Nutweseke yetu tuvumbi twenu kumi lia matangwa ni kutwaha yilimalima ha kulia chetu ni meya ha kunwa chetu.

¹³ Mba munutala chize mutupwa yetu ni chize mapwa akweze waze anali kulia chipema cha mwanangana. Hilingenu kuli tuvumbi twenu nikulita ni chize munumona.

¹⁴ Chocho yaapanjika ha chuma chino; yaeseka kumi lia matangwa.

¹⁵ Kulutwe lia kumi lia matangwa yamona o te kanapeme ku meso, kanatoho ku mijimba kuhiana akweze eswe waze alile kulia chipema cha mwanangana.

¹⁶ Kashika kaselo yaachiza kulia chize chipema ni vinyu yize aaselele kunwa; yaaha yilimalima.

¹⁷ Ha kutwala kuli wano akweze awana, Zambi yaaha chinyingi ni kulongoloka mu sona jeswe ni mana, ni Daniel wapwile ni chinyingi cha usolwelo weswe ni yilota.

¹⁸ Ku songo lia miaka yize muze mwanangana yaasanyika aanehe, unuku wa lutwe yaaneha kuli Nabukanezore.

¹⁹ Mwanangana yahanjika no, mba hakachi ko eswe kawanyine niumwe wa kulita ni Daniel, ni Hanania, ni Mishaele, ni Azaria. Kashika o amanyine kumeso ja mwanangana.

²⁰ Mu yikuma yeswe ya mana ni chinyingi mwanangana waahulile, yaawana hahiana kumi lia yisuho yimbanda eswe ni tahi eswe mu wanangana wenyi weswe.

²¹ Mba Daniel walindulukile ndusu ndo mwaka utangu wa mwanangana Siru.